|
Bakının Nərimanov rayonunda yerləşən 45 nömrəli
tam orta məktəbdə dünyanın ciddi probleminə
çevrilən "ağ ölüm"ə həsr olunmuş "Narkomaniyaya
yox deyirik!" mövzusunda tədbir keçirilib.
Tədbirdə Nərimanov Rayon Polis İdarəsinin rəisi
Muradəli Babayev, rəis müavini Azər Məmmədov,
17-ci polis bölməsinin sahə rəisi Elnur Quliyev,
narkoloq həkim Sənan Kazımov, ATƏT-in Bakı
ofisinin nümayəndəsi, polis eksperti Süleyman
Özdilek, KİV nümayəndələri və məktəb
direktorları iştirak ediblər.
Şagirdlərin ifasında Dövlət himninin səslənməsi
ilə başlanan tədbiri məktəbin direktoru Nazilə
Məmmədova açaraq "ağ ölüm"ün törətdiyi
bəlalardan danışıb. O, bu mövzuda məktəbdə
tez-tez tədbirlərin təşkil olunduğunu,
şagirdlərin ziyanlı vərdişlərdən uzaq qalması
məqsədi ilə onlarla vaxtaşırı olaraq
söhbətlərin aparıldığını, görüşlərin
keçirildiyini vurğulayıb.
Məktəbin şagirdləri tədbirdə narkotik
vasitələrdən istifadə edən insanların sonrakı
taleyindən bəhs edən müxtəlif səhnəciklər
nümayiş etdiriblər. Onlar böyük şairimiz
M.Ə.Sabirin satirik şeirlərindən parçalar
söyləyərək, narkotik vasitələrin
təhlükəliliyindən danışıblar.
Narkoloq həkim Sənan Kazımov narkotik
vasitələrdən istifadə nəticəsində yaranan
xəstəliklər barədə geniş məlumat verib. O,
gəncləri belə vərdişlərdən həmişə uzaq durmağa
səsləyib. ATƏT-in nümayəndəsi S.Özdilek bu
bəlanın ağır və təhlükəli fəsadları haqqında
danışıb. Narkomaniyanın ziyanı və fəsadları
barədə videoçarx nümayiş etdirilib. Çıxış
edənlər belə tədbirlərin təhsil ocaqlarında
keçirilməsini təqdirəlayiq hal kimi
qiymətləndirib, tədbirin təşkilinə görə məktəb
kollektivinə minnətdarlıqlarını bildiriblər.
Tədbirin sonunda Nərimanov Rayon Polis
İdarəsində yaradılmış Hüquqi Qaydaların Təmini
üzrə İctimai Şuranın üzvü seçilən məktəbin
direktoru Nazilə Məmmədovaya vəsiqə təqdim
edilib.
Rəşad ZİYADOV |
