|
 Mayın
26-da Təhsil Nazirliyində 2011-2012-ci tədris
ilində respublikanın ümumi təhsil
müəssisələrində işləyən ibtidai sinif
müəllimləri üçün fənn kurikulumlarının tətbiqi
üzrə təlim kurslarının təşkilinə dair
müqavilələrin imzalanma mərasimi keçirildi.
Azərbaycan Respublikasının təhsil naziri Misir
Mərdanov mərasimi açaraq iştirakçıları
salamladı.
Nazir mərasimdəki çıxışında bildirdi ki, ibtidai
təhsilin keyfiyyətini yüksəltmək üçün, ilk
növbədə, fənn kurikulumu, təlim strategiyaları
və yeni qiymətləndirmə mexanizminin tətbiqini
həyata keçirəcək müəllimlərin pedaqoji-metodiki
bacarıqlarını və fənn üzrə biliklərini artırmaq,
yeniləşdirmək lazımdır. Bu məqsədlə ibtidai
sinif müəllimlərinin yeni fənn kurikulumunun
tətbiqi üzrə təlim kurslarından keçirilməsi üzrə
son 3 il ərzində müəyyən təcrübə əldə
edilmişdir. Birinci siniflər üçün fənn
kurikulumunun tətbiqinə 2008-ci ilin
sentyabrından başlanıldığı nəzərə alınaraq
iyun-avqust aylarında Azərbaycanın bütün
rayonları əhatə olunmaqla 9 min nəfər ibtidai
sinif müəllimi təlim kurslarından keçmişdir. Bu
proses 2009-cu ildə də davam etdirilmiş və daha
7500 müəllim təlimdən keçmişdir.
2010-2011-ci tədris ilində isə bu işin həyata
keçirilməsində Dünya Bankının dəstəyi ilə yeni
bir addımın atıldığını deyən Misir Mərdanov
diqqətə çatdırdı ki, birinci siniflərdə dərs
deyəcək 8 minə yaxın ibtidai sinif müəllimi üçün
yeni fənn kurikulumları üzrə təlimlər Təhsil
Sektorunun İnkişafı üzrə İkinci Layihə
çərçivəsində müsabiqə yolu ilə yeni
ixtisasartırma modeli əsasında həyata
keçirilmişdir. Qaydaya əsasən, bu tenderdə
yalnız qeyri-hökumət təşkilatları iştirak edə
bilər. Aparılmış monitorinq və təlim
iştirakçıları ilə keçirilmiş sorğular
nəticəsində ixtisasartırma təhsilinin yeni model
əsasında təşkilinin daha səmərəli olduğu müəyyən
edilmişdir.
Təhsil naziri qeyd etdi ki, 2011-2012-ci tədris
ilində respublikanın ümumi təhsil
müəssisələrində I sinifdə dərs deyəcək, həmçinin
son 3 ildə təlim kurslarından keçməyən ibtidai
sinif müəllimlərinin fənn kurikulumlarının
tətbiqi sahəsində nəzəri və praktik hazırlığının
təmin edilməsi nəzərdə tutulmuş və bu
istiqamətdə müvafiq təşkilati işlər
aparılmışdır. Müəllimlərin ixtisasartırma
təhsilinin yeni modeli, modul-kredit sistemi ilə
həyata keçirilməsini nəzərdə tutan sənəd -
"Əlavə təhsilin məzmunu, təşkili və əlavə
təhsilin hər hansı istiqaməti üzrə təhsil almış
şəxslərə müvafiq sənədin verilməsi qaydası"
hazırlanmış və Nazirlər Kabinetinin qərarı ilə
təsdiq edilmişdir.
Misir Mərdanov 2011-2012-ci tədris ilində I
siniflərdə dərs deyəcək ibtidai sinif
müəllimləri üçün təlim kurslarını təşkil edəcək
qurumları müəyyənləşdirmək məqsədilə Təhsil
Nazirliyinin cari ilin yanvar-fevral aylarında
tender elan etdiyini və təlim xidmətlərinin
respublikanın bütün rayon və şəhərlərini əhatə
etməklə 9 iqtisadi zona üzrə həyata
keçirilməsinin nəzərdə tutulduğunu bildirdi.
Təhsil naziri diqqətə çatdırdı ki, tender
komissiyasına 7 qeyri-hökumət təşkilatından
müraciətlər olmuş, təqdim olunmuş sənədlərin
araşdırılması və qiymətləndirilməsi aparıldıqdan
sonra onlardan beşi Müasir Təhsil və Tədrisə
Yardım Mərkəzi, "İnkişaf" Elmi Mərkəzi, Azad
Müəllimlər Birliyi, "Yaşlıların təhsili
assosiasiyası" İctimai Birliyi və "Təhsilin
humanistləşdirilməsi" İctimai Birliyi təlim
kursları keçirmək hüququ qazanmışdır.
Daha sonra nazir ayrı-ayrı iqtisadi zonalar üzrə
təşkil olunacaq təlim mərkəzləri, kurslara cəlb
olunacaq müəllim və təlimçilərin sayı haqqında
ətraflı məlumat verdi. Aydın oldu ki, 9 iqtisadi
zona üzrə 86 təlim mərkəzində 9670 ibtidai sinif
müəlliminin təlim kursundan keçirilməsi
proqnozlaşdırılır və kurslar 164 təlimçi
tərəfindən aparılacaqdır.
Bu sahədə görülmüş işlərdən bəhs edən Misir
Mərdanov diqqətə çatdırdı ki, 2011-2012-ci
tədris ilində respublikanın ümumtəhsil
məktəblərində fəaliyyət göstərən ibtidai sinif
müəllimlərinin fənn kurikulumlarının tətbiqi
sahəsində nəzəri və praktik hazırlığını təmin
etmək məqsədilə 60 saatlıq (10 günlük) tədris
planı və proqramı təsdiq edilmiş və kursların
cari ilin iyun-avqust aylarında keçirilməsinə
dair müvafiq tapşırıqlar verilmişdir. Təhsil
Nazirliyi tabeliyindəki ümumi təhsil
müəssisələrinin, eləcə də məcburi köçkün
məktəblərinin I sinifdə işləyəcək ibtidai sinif
müəllimlərinin həmin müəssisələrin yerləşdikləri
ərazilərdə təşkil edilən təlim kurslarına cəlb
olunmaları nəzərdə tutulmuşdur. Nazir bu faktı
təqdirəlayiq hal kimi dəyərləndirdi və çox sayda
müəllimin mərkəzə gəlməsinin deyil, təlimçilərin
bu işi yerlərdə aparmasının daha məqsədəuyğun
olduğunu vurğuladı.
Qeyd olundu ki, Naxçıvan Muxtar Respublikasında
ibtidai sinif müəllimlərinin fənn kurikulumunun
tətbiqi üzrə təlim kurslarından keçirilməsinə
müvafiq şəkildə kömək göstərilməsinə dair Təhsil
Problemləri İnstitutunun Kurikulum Mərkəzinə
tapşırıq verilmişdir.
Nazir bildirdi ki, təlim kurslarını təşkil
edəcək qurumlar bağlanacaq müqavilə şərtlərinə
uyğun olaraq ilkin hesabatlarını hazırlayıb
təsdiq etdirməli, qrafik əsasında kursların
keçirilməsini, iştirakçıların fəaliyyətlərinin
test imtahanı yolu ilə yekun
qiymətləndirilməsini, proqramı mənimsəyənlərə
müvafiq sertifikatın verilməsini həyata
keçirməli, habelə fərdi iştirak səviyyəsi, hər
bir təlim qrupunun nailiyyətləri haqqında Təhsil
Nazirliyinə yekun hesabat təqdim etməlidirlər.
Təlim kurslarının yüksək səviyyədə təşkili və
keçirilməsi üçün təşkilatçıların üzərinə düşən
bir sıra öhdəlik və vəzifələrdən söz açan Misir
Mərdanov onların yerinə yetirilməsinin zəruri
olduğunu vurğuladı.
Sonra tədbirdə bu işin həyata keçirilməsi ilə
bağlı ayrı-ayrı məsələlər müzakirə olundu və
suallara aydınlıq gətirildi.
Sonda imzalanma mərasimi keçirildi. Sənədləri
təhsil naziri Misir Mərdanov və tenderin qalibi
olan qeyri-hökumət təşkilatlarının rəhbərləri
imzaladılar.
Hicran ƏKBƏROVA |
