|
 Laçın
mənfur qonşularımız ermənilər tərəfindən işğal
olunduqdan sonra rayonun digər təhsil
müəssisələri kimi Uşaq-Gənclər Şahmat Məktəbi də
öz fəaliyyətini dayandırmadı. Belə ki, mərkəzi
Bakı şəhəri olmaqla Sumqayıt, Abşeron və
Ağcabədidə yerləşən Laçın rayonunun ümumtəhsil
məktəblərində qruplar bərpa edildi və hazırda
həmin qruplar öz fəaliyyətini davam etdirir.
Laçın rayon UŞGM-nın direktor müavini Rüstəm
Həsənovun verdiyi məlumata görə, məktəbdə
hazırda 67 qrup fəaliyyət göstərir. Həmin
qruplara 850 şagird cəlb olunmuşdur ki, onlarla
61 məşqçi-müəllim məşğul olur. Son illər
respublikada şahmatın inkişafına dair aparılan
işlərdə fəallıq göstərən məktəb mütəmadi olaraq
ölkədaxili yarışlarda iştirak edir. Cari ilin
mart ayında məşqçi-müəllim Elçin Verdiyevin
rəhbərliyi altında Beyləqan rayonunda keçirilən
Respublika birinciliyinin seçmə yarışlarında
iştirak edən məktəbin idmançıları Pərvin Əlişli
və Yaqub Bəndəliyev yüksək nəticələr göstərmiş
və fəxri fərmanlarla təltif olunmuşlar.
Hazırda məktəbdə Vladimir Həsənov, Zülfiyyə
Hüseynova və Elşən Quliyev kimi bacarıqlı,
tələbkar məşqçi-müəllimlər çalışır. Şahmatla
bağlı keçirilən seminarlarda iştirak edən
məşqçi-müəllimlər Rəşad Aslanov, Əfsanə
Quliyeva, Hafizə Ağazədə, Nəsrəddin Paşayev,
Əzizağa Kərimli, Vahid İsmayıllı kimi istedadlı
gənclərə ümidlə baxırlar. Onların böyük
potensiala malik olduqlarına və gələcəkdə
keçirilən turnirlərdə uğurla iştirak
edəcəklərinə inanırlar.
Niyazi RƏHİMOV |
|
