|
Mayın 14-də Heydər Əliyev Fondunun dəstəyi ilə
Suraxanı rayonunun Qaraçuxur qəsəbəsində
Kəlbəcər rayonunun 23 nömrəli tam orta məktəbi
üçün tikilmiş yeni bina istifadəyə verilmişdir.
AzərTAc xəbər verir ki, açılış mərasimində
Kəlbəcər Rayon İcra Hakimiyyəti başçısının
müavini Novruz Çiraqov ulu öndər Heydər Əliyevin
anadan olmasının 88-ci ildönümünü xatırlatmış,
Azərbaycanın sürətli iqtisadi inkişafında,
çiçəklənməsində ümummilli liderimizin layiqli
davamçısı Prezident İlham Əliyevin əvəzsiz
xidmətlərini qeyd etmişdir.
Bildirilmişdir ki, Azərbaycanın birinci xanımı,
Heydər Əliyev Fondunun prezidenti, YUNESKO-nun
və İSESKO-nun xoşməramlı səfiri, Milli Məclisin
deputatı Mehriban Əliyevanın bilavasitə diqqəti
və qayğısı sayəsində ölkəmizdə yeni təhsil
ocaqlarının istifadəyə verilməsi artıq ənənəyə
çevrilmişdir.
Vurğulanmışdır ki, 170 şagirdin təhsil aldığı,
30 müəllimin çalışdığı 23 nömrəli tam orta
məktəbin yerləşdiyi əvvəlki bina tədris üçün
uyğunlaşdırılmış kiçik otaqlardan ibarət idi.
Fondun dəstəyi ilə inşa olunmuş, ən müasir
tələblərə cavab verən məktəb 240 şagirdin təhsil
alması üçün nəzərdə tutulmuşdur. Məktəbdə 11
sinif otağı, o cümlədən kimya, fizika və başqa
fənlər üzrə kabinetlər, kompüter otağı,
Azərbaycan ədəbiyyatına, tarixinə, mədəniyyətinə
dair kitablardan ibarət müasir kitabxana vardır.
Məktəbin foyesində yaradılmış stenddə Azərbaycan
xalqının ümummilli lideri Heydər Əliyevin mənalı
ömür yolunu və zəngin fəaliyyətini əks etdirən
fotoşəkillər nümayiş olunur.
Bildirilmişdir ki, müasir istilik sistemi ilə
təchiz olunmuş məktəbin həyətyanı sahəsində
abadlıq işləri aparılmış, asfalt salınmış və
mini-futbol meydançası inşa edilmişdir.
Heydər Əliyev Fondunun əməkdaşı İlqar
Mustafayev, Prezident Administrasiyasının məsul
əməkdaşı Rövşən Ağayev, Suraxanı Rayon İcra
Hakimiyyəti başçısının müavini Əhməd Talıbov,
məktəbin direktoru Mirsəyyaf Zamanov yeni məktəb
binasının istifadəyə verilməsinin təhsilimizin
inkişafına göstərilən diqqət və qayğının bariz
nümunəsi olduğunu diqqətə çatdırmışlar.
Valideynlər Qaraçuxur qəsəbəsində bütün zəruri
avadanlıqla təmin edilmiş yeni məktəbin
istifadəyə verilməsini Azərbaycanın birinci
xanımı, Heydər Əliyev Fondunun prezidenti
Mehriban Əliyevanın Kəlbəcər rayonunun məcburi
köçkünlərinə göstərdiyi diqqət və qayğısının
göstəricisi kimi qiymətləndirilmiş, bu gözəl
hədiyyəyə görə minnətdarlıqlarını bildirmişlər.
Yeni məktəb binasının rəmzi açılışını bildirən
lent kəsildikdən sonra mərasim iştirakçıları
məktəbdə yaradılmış şəraitlə tanış olmuşlar.
Azərbaycan Texniki Universitetinin professoru
Sabir Quliyev və Azərbaycan Dövlət Pedaqoji
Universitetinin professoru Yusif Əhmədov
şagirdlərə biologiya və riyaziyyat fənləri üzrə
"açıq dərs" keçmişlər.
Sonda Prezident İlham Əliyevə və Heydər Əliyev
Fondunun prezidenti Mehriban xanım Əliyevaya
mərasim iştirakçıları adından müraciət qəbul
olunmuşdur. |
