|
Mayın 18-də Xəzər Universitetində bu ali təhsil
ocağının yaranmasının 20 illik yubileyinə həsr
olunmuş tədbir keçirilmişdir. AzərTAc xəbər
verir ki, nazirlərin, Milli Məclisin
deputatlarının, xarici ölkə səfirlərinin və ali
məktəb rektorlarının, tanınmış ziyalıların
iştirak etdikləri tədbiri Xəzər Universitetinin
təsisçisi, professor Hamlet İsaxanlı açmışdır.
O, universitetin yaranma tarixi, keçdiyi inkişaf
yolu, qazandığı nailiyyətlər haqqında məlumat
vermişdir.
Tədbirdə təhsil naziri Misir Mərdanov çıxış
edərək Azərbaycanda rəsmi fəaliyyətə başlamış
ilk özəl ali məktəbin qurulmasında və ölkəmizdə
təhsilin inkişafında professor Hamlet
İsaxanlının xidmətlərindən, xüsusilə magistr
hazırlığında bu universitetin rolundan
danışmışdır. Nazir əlamətdar yubiley
münasibətilə universitetin professor-müəllim
heyətini təbrik etmiş və onlara yeni uğurlar
arzulamışdır.
Xəzər Universitetinin fəaliyyətini əks etdirən
videofilm göstərilmiş və Azərbaycan incəsənət
ustalarının konsert proqramı təqdim edilmişdir.
Tədbir iştirakçıları universitetin tələbələrinin
yaradıcılıq işlərindən ibarət sərgi ilə də tanış
olmuşlar. |
