|
Bu günlərdə Masallı rayon Xalq Teatrının
truppası Milli Qəhrəman Mübariz İbrahimovun
böyüyüb boya-başa çatdığı Biləsuvar rayonunun
Əliabad kəndində olub. Qonaqlar qəhrəmanın
vaxtilə yaşadığı evi ziyarət edib, valideynləri
ilə görüşüblər.
Sonra Azərbaycanın Milli Qəhrəmanı Mübariz
İbrahimovun təhsil aldığı şəhid Malik Piriyev
adına Əliabad kənd tam orta məktəbinə gedərək,
burada yaradılmış "Mübarizlik məktəbi" adlı
muzeylə tanış olublar. Təhsil ocağının müəllim
və şagirdləri ilə keçirilən görüşdə teatr
üzvləri yazıçı-dramaturq Hacı Miribadullanın "Ölümümə
inanma, ana" adlı əsəri əsasında hazırladıqları
ədəbi-bədii kompozisiya göstəriblər. Quruluşçu
rejisssoru Cəmaləddin Əliyev olan bu kompozisiya
maraqla qarşılanaraq, tamaşaçılarda kədərli bir
ovqat yaradıb.
Tədbirə qatılan Cəlilabad rayonunun Hacıtəpə
kənd orta məktəbinin tədris işləri üzrə direktor
müavini Həşim Abıyevin rəhbərlik etdiyi şagird
kollektivinin də Mübariz İbrahimov haqqında
etdikləri çıxışlar, söylədikləri şeirlər sonsuz
maraqla qarşılanıb, dinləyicilərin qəlbində
Vətənə, torpağa məhəbbət, düşmənə nifrət hissi
aşılayıb.
Tədbirin sonunda qonaqlar məktəbin direktoru
Bəsirə Rüstəmovaya, direktor müavini Böyükbəy
Quliyevə və müəllim kollektivinə Mübariz kimi
Vətənini, xalqını, millətini canından artıq
sevən belə bir oğul yetişdirdikləri üçün
minnətdarlıq etdilər.
ƏDALƏT |
