|
Azərbaycan Universiteti və Azərbaycan Bank
Tədris Mərkəzi (ABTM) arasında ikitərəfli
əməkdaşlıq sazişi imzalandı. Sazişə əsasən
tərəflər təlim və maarifləndirmə, beynəlxalq
əməkdaşlıq və birgə layihələrin həyata
keçirilməsi, informasiya mübadiləsi,
qanunvericilik-normativ baza və ictimai
fəaliyyət olmaq üzrə dörd sahədə əməkdaşlıq
edəcəklər.
Tərəflər maliyyə sektoru üçün kadr hazırlığının
keyfiyyətinin artırılması və işəgötürənlər üçün
daha hazırlıqlı kadrların hazırlanması
istiqamətində tədris proqramları üzrə
məsləhətləşmələrin aparılması, təhsil və təlimin
səviyyəsinin artırılması məqsədilə birgə "dəyirmi
masa"ların keçirilməsi, universitet müəllimləri
və ABTM-nin ekspertləri üçün birgə təlimlərin
təşkil edilməsi, birgə elmi konfransların,
seminarların, müzakirələrin, məsləhətləşmələrin,
forum və "dəyirmi masa"ların keçirilməsi,
Azərbaycanda maliyyə savadlılığının
artırılmasına yönəldilmiş birgə tədbirlərin
təşkili sahələrində razılığa gəliblər.
Beynəlxalq əməkdaşlıq və birgə layihələrin
həyata keçirilməsi sahəsində müəllim və
ekspertlərin, habelə maliyyə sektorunun
inkişafına yardım edəcək layihələrin
hazırlanması və maliyyələşdirilməsi üçün
mənbələrin birgə axtarılıb tapılması, Azərbaycan
maliyyə bazarı üçün kadrların hazırlanması
sahəsində beynəlxalq maliyyə təşkilatları ilə
qarşılıqlı əlaqələrin qurulması istiqamətində
səylərin göstərilməsi, diplom və sertifikatların
yerli və beynəlxalq akkreditasiyası üçün səylər
göstərilməsi, qarşılıqlı surətdə xarici
tərəfdaşların tapılmasında, birgə layihələrdə
təmsil olunmaqlarına köməklik göstərilməsini də
tərəflər öhdələrinə götürüblər.
İnformasiya mübadiləsi sahəsində isə
universitetin və ABTM-nin İnternet
səhifələrində linklər qoyulması, müntəzəm
informasiya mübadiləsinin aparılması nəzərdə
tutulur.
Tərəflər qanunvericilik-normativ baza və ictimai
fəaliyyət sahəsində də əməkdaşlıq edəcəklər.
Belə ki, Azərbaycanda maliyyə sektoru üçün
kadrların hazırlanması və maliyyə bazarının
fəaliyyətini tənzimləyən qanunvericilik
bazasının inkişafı üzrə birgə təkliflərin
hazırlanması, Azərbaycanda maliyyə sektoru üçün
kadrların hazırlanmasına yönəlmiş birgə
layihələrin həyata keçirilməsi məqsədilə
tərəflərin maraqlarının qanunvericilik, məhkəmə
və icra hakimiyyəti orqanlarında, həmçinin
Azərbaycanın kommersiya və digər ictimai
qurumlarında dəstəklənməsi üzrə qarşılıqlı
yardımın göstərilməsi, tərəflərin yaratdığı
qurumların (şuraların, komitələrin, işgüzar
qrupların və s.) fəaliyyətində qarşılıqlı
iştiraka təşəbbüs göstərilməsi də nəzərdə
tutulur.
Venera ŞƏRİFZADƏ,
Azərbaycan Universitetinin Mətbuat katibi |
|
