|
Naxçıvan Dövlət Universitetinin Tibb
fakültəsində Azərbaycanın görkəmli elm xadimi,
tanınmış oftalmoloq, akademik Zərifə Əliyevanın
anadan olmasının 88-ci ildönümünə həsr olunmuş
elmi konfrans keçirildi.
Tədbirdə giriş nitqi ilə çıxış edən ali məktəbin
tərbiyə işləri üzrə prorektoru, fəlsəfə
elmləri üzrə fəlsəfə doktoru Məmməd Rzayev
görkəmli dövlət və elm xadimi, bütün bilik və
bacarığını xalqa xidmətə sərf etmiş Əziz
Məmmədkərim oğlu Əliyevin ailəsində dünyaya göz
açmış Zərifə xanımın valideynlərinə layiqli
bir övlad, məşhur alim, tanınmış həkim,
istedadlı insan, sədaqətli ömür yoldaşı və
qayğıkeş ana, Azərbaycan oftalmologiyasını
dünya səviyyəsində tanıdan akademik olduğunu
söylədi.
Tibbi profilaktika ixtisası üzrə I kurs tələbəsi
Aybəniz Əhmədova "Zərifə Əziz qızı Əliyevanın
həyatı", pediatriya ixtisası üzrə I kurs
tələbəsi Günay Quliyeva "İnsanlara nur bəxş edən
ləyaqət mücəssəməsi", pediatriya ixtisası üzrə
II kurs tələbəsi Elvin Mustafayev "Oftalmologiyamızın
tükənməz xəzinəsi", tibbi profilaktika
ixtisası üzrə II kurs tələbəsi Könül Səmədova
"Vicdan həkimi" adlı məruzələrlə çıxış
etdilər.
Məruzələrdə qeyd olundu ki, əməlləri və
xidmətləri ilə dünyada, səhiyyə tarixində
silinməz iz qoyan, görkəmli dövlət xadimi Əziz
Əliyevin qızı, ulu öndər Heydər Əliyevin xanımı,
ölkə Prezidenti İlham Əliyevin anası, akademik,
həkim-oftalmoloq Zərifə Əliyeva oftalmologiya
elminin inkişafında müstəsna xidmətləri ilə
yadda qaldı.
Tədbirdə Zərifə Əliyevanın ömür yolunu əks
etdirən slayd da nümayiş olundu.
Nərmin CƏFƏROVA,
NDU-nun Mətbuat şöbəsinin əməkdaşı |
