|
Aprelin 27-də Azərbaycan Dövlət Pedaqoji
Universitetində (ADPU) "Azərbaycan təhsili və
elmi XXI əsrdə: inteqrasiya və qloballaşma"
mövzusunda elmi-nəzəri seminar keçirilmişdir.
AzərTAc xəbər verir ki, rektor, AMEA-nın müxbir
üzvü, professor Yusif Məmmədov çıxışında
ümummilli lider Heydər Əliyevin təhsilin
inkişafına, pedaqoji kadrların hazırlanmasına
daim böyük önəm verdiyini, ideyalarının
Azərbaycan Prezidenti İlham Əliyev tərəfindən
uğurla həyata keçirildiyini vurğulamışdır.
Rektor qeyd etmişdir ki, bu, seminarın ilk
toplantısıdır və belə toplantılar ayda bir dəfə
keçiriləcəkdir. Seminarlarda konkret mövzu
ətrafında müzakirələr aparılacaq, dünya təhsil
sistemində əldə olunmuş nailiyyətlərdən söz
açılacaq, dünya təcrübəsində olan qabaqcıl
yeniliklərin Azərbaycanda tətbiqi məsələlərinə
toxunulacaqdır.
Dünya təhsil sistemində müasir təhsil
standartlarının ön plana çəkildiyini qeyd edən
natiq Azərbaycan təhsil sisteminin beynəlxalq
standartlara uyğunlaşdırılmasının vacibliyini
vurğulamışdır.
Rektor Azərbaycanın Avropa təhsil məkanına -
Boloniya prosesinə qoşulduğunu xatırlatmış, bu
sahədə universitetdə həyata keçirilən
tədbirlərdən danışmışdır. Məlumat vermişdir ki,
təhsil ocağında bu proseslər başlanmışdır. Ali
təhsildə keyfiyyət əsas amildir.
Natiq sözünə davam edərək demişdir ki,
universitetin xarici ölkələrin ali məktəbləri
ilə əlaqələri ildən-ilə inkişaf edir və bu
əməkdaşlıq inteqrasiya və qloballaşma prosesinə
müsbət təsir göstərir. Müasir texnologiyaların
təhsildə tətbiqi, gənclərdə araşdırma
təfəkkürünün formalaşmasına və təhsilin
məqsədyönlü dinamik inkişafına xidmət edən
vasitələrdən istifadə olunması, qarşıya çıxan
problemlərin həlli yollarının axtarılması,
inkişaf perspektivlərinin müzakirəsi, beynəlxalq
təcrübənin öyrənilməsi çox əhəmiyyətlidir.
Gənclərin təhsilində, onların lazımi məlumatları
əldə etməsində müasir elektron-informasiya
texnologiyalarının rolu əvəzsizdir.
ADPU-nun professoru Mirzəli Murquzovun müasir
dövrün fiziki mənzərəsi ilə bağlı məruzəsi
dinlənilmişdir. Natiq təhsilimizin inkişaf
etdiyini qeyd etmiş, Azərbaycan təhsil
sisteminin dünya təhsil sisteminə inteqrasiyası,
elm və təhsildə inteqrasiya proseslərinin tarixi
mərhələləri ilə bağlı öz mülahizələrini
söyləmiş, nəzəri biliklərin müxtəlif sahələrə
tətbiqi məsələlərinin vacibliyini diqqətə
çatdırmışdır.
Fizika fakültəsinin hazırladığı "Kainatın
təkamülü və mənşəyi, böyük partlayış" adlı
videoçarx nümayiş olunmuşdur.
Seminar iştirakçıları mövzu haqqında fikirlərini
bölüşmüş, təkliflərini vermişlər. |
