|
Xəzər Universitetinin təşkilatçılığı ilə Şəki
şəhərində bu təhsil ocağının yaranmasının 20
illiyi ilə əlaqədar rayonun təhsil işçiləri və
məktəblilərlə görüş keçirilmişdir.
Dövlət Dram Teatrının salonunda keçirilən
tədbirdə şəhər təhsil şöbəsinin müdiri Südabə
İsmayılova universitetin müəllim və tələbələrini
əlamətdar yubiley münasibətilə təbrik etmiş,
onlara gələcək fəaliyyətlərində uğurlar
arzulamışdır.
Xəzər Universitetinin təsisçisi, Direktorlar və
Qəyyumlar Şurasının sədri, professor Hamlet
İsaxanlı, universitetin rektoru, professor Con
Rayder çıxış edərək bu təhsil ocağının qazandığı
uğurlar barədə məlumat vermişlər. Qeyd
olunmuşdur ki, universitet beynəlxalq əlaqələrin
qurulması, beynəlxalq layihə və proqramlarda
iştirak, dünyanın aparıcı universitetləri ilə
müəllim və tələbə mübadiləsi sahələrində təsirli
tədbirlər görmüş, kadr hazırlığı sahəsində
əsaslı nailiyyətlər əldə etmiş, böyük nüfuz
qazanmışdır. Xəzər Universiteti bu gün həm
Azərbaycanda, həm də ölkəmizdən kənarda
özünəməxsus yeri, özünün xüsusi çəkisi olan ali
təhsil müəssisələrindəndir. Universitet 2011-ci
ildə İspaniyanın məşhur Elmi Tədqiqat Mərkəzinin
Webometrics reytinqində dünyanın 6 min ən yaxşı
universiteti sırasına daxil edilmişdir.
Sonra universitetin rəhbərliyi tədbir
iştirakçılarının suallarını cavablandırmışdır.
Tədbir universitet tələbələrinin hazırladıqları
maraqlı konsert proqramı ilə başa çatmışdır.
AzərTAc |
