|
Bu günlərdə Azərbaycanın Milli Qəhrəmanı Mübariz
İbrahimov adına Biləsuvar məktəb-lisey
kompleksində yazıçı Müşfiq Muğanlının "Yurdun
Mübariz əfsanəsi" kitabının və rəssam Gündüz
Ağayevin "Mübariz" adlı rəsm əsərinin təqdimat
mərasimi keçirildi. Tədbir iştirakçıları öncə
qəhrəmanın adını daşıyan liseyin foyesində Milli
Qəhrəman Mübariz İbrahimovun vidalaşma həyat
yoluna həsr olunmuş guşə ilə tanış oldular.
Tədbir Azərbaycanın Dövlət himninin ifası ilə
başladı. Azərbaycan Respublikasının Prezidenti
İlham Əliyevin Milli Qəhrəman Mübariz
İbrahimovla vidalaşma mərasimi zamanı etdiyi
çıxışı səsləndirilərək tədbir iştirakçılarının
nəzərinə çatdırıldı. Sonra "Yurdun Mübariz
əfsanəsi" kitabının redaktoru Namiq Feyziyev,
Biləsuvar Rayon İcra Hakimiyyəti başçısının
müavini Mirnəsib Kazımov, Biləsuvar şəhər
bələdiyyəsinin sədri İlqar Abbasov, Ağayrı kənd
tam orta məktəbinin direktoru Alış İbayev,
Nizami adına şəhər 1 nömrəli tam orta məktəbin
direktoru Xanımgül Abıyeva, Biləsuvar məscidinin
axundu Hacı Əlifağa Murtuzov, Əliabad kənd tam
orta məktəbinin direktor müavini Böyükbəy Nəbili
və başqaları Milli Qəhrəman Mübariz İbrahimova
həsr olunmuş bu kitabın gənclərimizin
vətənpərvərlik tərbiyəsində oynayacağı müsbət
rolundan danışdılar.
Sonra aparıcı İlqar Dadaşov sözü Biləsuvar şəhər
1 və 6 nömrəli tam orta məktəblərin şagirdlərinə
verdi. Onlar "Yurdun Mübariz əfsanəsi"
kitabından seçmələr söylədilər.
Sonda kitabın müəllifi Müşfiq Muğanlı tədbirin
təşkilatçılarına və iştirakçılara təşəkkürünü
bildirdi.
ƏDALƏT |
