|
Aprelin 11-də Masallı şəhəri 4 nömrəli Digah
tam orta məktəbində təhsil naziri Misir
Mərdanovun iştirakı ilə "Müasir dövrdə innovativ
təhsil ideyalarının tətbiqi təcrübəsindən"
mövzusunda zona elmi-praktik konfrans keçirildi.
Konfransda Masallı Rayon İcra Hakimiyyətinin
başçısı Qəzənfər Ağayev, Təhsil Nazirliyinin,
Təhsil Problemləri İnstitutunun rəsmilərinin və
Masallı, Lənkəran, Astara, Lerik, Salyan,
Yardımlı, Cəlilabad və Biləsuvar rayonlarının
təhsil şöbələrinin işçiləri iştirak edirdi.
Öncə təhsil naziri Misir Mərdanov məktəbin
foyesində təşkil olunmuş şagirdlərin əl
işlərindən ibarət sərgiyə baxış keçirdi. Yeni
istifadəyə verilən Digah məktəbinin idman zalı,
kitabxana və sinif otaqları ilə tanış olan nazir
sonra "açıq dərs"lərdə iştirak etdi. Əməkdar
müəllim Əlinaz Talıbovun VII və Dadaşbala
Duniyevin isə VIII sinifdə keçdikləri riyaziyyat
dərsində iştirak edən Misir Mərdanov hər iki
dərsdən razı qaldığını bildirdi.
 Konfransı
giriş sözü ilə açan təhsil naziri Misir Mərdanov
respublikanın təhsil sistemində həyata keçirilən
islahatlardan, son zamanlar ölkədə xeyli sayda
yeni məktəb binasının tikilərək istifadəyə
verilməsindən və bütün ümumtəhsil
müəssisələrinin ən zəruri avadanlıqlarla, o
cümlədən kompüter texnologiyaları ilə təchiz
olunmasından bəhs etdi. Qeyd edildi ki, 2000-ci
ildən təhsildə aparılmağa başlanan islahatlar
artıq öz bəhrəsini verməkdədir. Son illər
respublikada 2000-dən çox məktəb tikilərək
istifadəyə verilib. Misir Mərdanov bildirdi ki,
Azərbaycan Respublikasının Prezidenti cənab
İlham Əliyevin imzaladığı sərəncamlara və
müvafiq göstərişlərinə əsasən hazırda respublika
üzrə qəza vəziyyətində olan 525 məktəbin hər
biri 2013-cü ilə kimi təmir olunacaq və müasir
tələblər səviyyəsinə çatdırılacaq. Ulu öndər
Heydər Əliyevin ideyaları əsasında formalaşan və
sürətlə inkişaf edən respublikamızda təhsilə
göstərilən diqqət və qayğıdan söz açan nazir
ölkəmizi işıqlı gələcəyə aparan Prezident
cənab İlham Əliyevin ümummilli liderimizin
layiqli davamçısı olduğunu qeyd etdi. Bildirildi
ki, təhsil işçiləri ölkə başçısının ətrafında
sıx birləşib və onun həyata keçirdiyi
islahatları dəstəkləyir.
Təhsil naziri Misir Mərdanov müasir dövrdə
innovativ təhsil ideyalarının tətbiqi
təcrübəsinin geniş yayıldığını iştirakçıların
nəzərinə çatdırdı. Qeyd edildi ki, əsası 1998-ci
ildə ümummilli liderimiz Heydər Əliyev
tərəfindən qoyulan təhsil islahatları ölkəmizdə
uğurla həyata keçirilməkdədir. İslahat proqramı
ölkəmizin tərəqqisinin yeni dövründə təhsil
siyasətinin əsas istiqamətlərini müəyyən etməklə
bu sistemin inkişafının, keyfiyyətinin və
rəqabət qabiliyyətinin yüksəldilməsini təmin
edir. Bütün bunların məntiqi nəticəsi isə
təhsilin keyfiyyətinin yüksəldilməsi, ölkəmizin
gələcək inkişaf və tərəqqisini təmin edəcək
yüksək intellektual səviyyəli, elmi
dünyagörüşlü, müstəqil düşünmək və yaradıcı
fəaliyyət göstərmək qabiliyyətinə malik olan
gənc nəslin yetişdirilməsindən ibarətdir.
İnteraktiv təlim metodlarından istifadə təhsilin
keyfiyyətinə öz müsbət təsirini göstərir. Misir
Mərdanov bildirdi ki, bu gün təlim-tərbiyə
prosesində şagirdlərə daha çox müstəqillik
verilməli, öz fikirlərini sərbəst, çəkinmədən
söyləməyə, arzu və istəklərinə müvafiq
məşğuliyyətlər seçməyə şərait yaradılmalıdır.
 Təhsil
naziri müəllimlərin sosial vəziyyətinin daha da
yaxşılaşdırılması üçün ölkə Prezidenti cənab
İlham Əliyevin xüsusi tapşırıqlarının olduğunu
vurğuladı. Bildirildi ki, son illər müəllimlərə
verilən fəxri adlar və pul mükafatları onlara
göstərilən dövlət qayğısının bariz nümunəsidir.
Lakin buna baxmayaraq, dövlətimiz müəllimlərin
problemlərinin aradan qaldırılmasını və onların
sosial vəziyyətlərinin yaxşılaşdırılması
məsələlərini daim diqqət mərkəzində saxlayır.
Nazir müəllimlərə "dövlət qulluqçusu" statusu
verilməsinin gündəlikdə duran məsələlərdən biri
olduğunu bildirdi.
"Ən yaxşı ümumtəhsil məktəbi" və "Ən yaxşı
müəllim" müsabiqələri haqqında danışan nazir bu
müsabiqələrdə regionlardan olan müəllimlərin də
fəal iştirak etdiyini təqdirəlayiq hal kimi
qiymətləndirdi. Digah məktəbində iştirakçısı
olduğu "açıq dərs"ləri nümunə göstərən nazir
belə müəllimlərin qiymətləndirilməsi və
mükafatlandırılmasının vacibliyini vurğuladı.
Nazir bütün müəllimlərə fəal təlim metodlarından
bacarıqla istifadə etmələrini və kompüterlə
işləmək vərdişlərini artırmaq üçün daha çox
çalışmalarını tövsiyə etdi.
Misir Mərdanov təhsildə uğurlarla yanaşı, bir
sıra problemlərin də olduğunu və bu problemlərin
mərhələli şəkildə öz həllini tapacağını
vurğuladı.
Nazir regionlarda belə tədbirlərin
keçirilməsinin təhsilimizə və təhsil işçilərinə
müsbət təsir etdiyini söyləyərək tədbiri yüksək
səviyyədə təşkil etdiklərinə görə təşkilatçılara
minnətdarlığını bildirdi.
Sonra söz Masallı Rayon İcra Hakimiyyətinin
başçısı Qəzənfər Ağayevə verildi. Q.Ağayev
bildirdi ki, ulu öndər Heydər Əliyevin qurucusu
olduğu Azərbaycan Respublikası özünün sürətli
inkişaf dövrünü yaşayır. Bu tərəqqi təhsil
sahəsində özünü daha qabarıq şəkildə göstərir.
Möhtərəm Prezident cənab İlham Əliyevin təhsilə
göstərdiyi diqqət və qayğıdan söhbət açan
Q.Ağayev dövlətin zənginliyinin və gücünün onun
elmi potensialında, böyük alimlərində və düşünən
beynində olduğunu bildirdi. Qeyd etdi ki,
vətənpərvər, müasir dünyagörüşlü və milli
dəyərlərinə bağlı bir nəslin yetişməsi üçün ən
böyük məsuliyyət təhsil işçilərinin üzərinə
düşür. Dövlətimiz bu məqsədləri həyata keçirmək
üçün bütün imkanlarını səfərbər edir.
Sevindirici haldır ki, təhsildə olan inkişaf
Masallı rayonunda da aydın şəkildə hiss olunur.
Belə ki, son illərdə rayonda 24 yeni məktəb
binası tikilib istifadəyə verilmiş, 5 məktəb
binası isə əsaslı təmir olunmuşdur. Hazırda 2
yeni məktəbin tikintisi və Masallı Rayon
Uşaq-Gənclər Şahmat Məktəbinin əsaslı təmir
işləri davam etdirilir. Görülən bütün işlərə
görə Masallı rayonu ictimaiyyəti adından
möhtərəm Prezident cənab İlham Əliyevə
minnətdarlığımızı bildiririk.
Tədbirdə çıxış edən Masallı Rayon Təhsil
Şöbəsinin müdiri Astan İbişov konfransın mövzusu
haqqında danışaraq bildirdi ki, artıq 2008-ci
ildən başlayaraq hər il I siniflərdə kurikulumu
tətbiq edən müəllimlər kurslardan keçirilir. Bu
istiqamətdə yerli mütəxəssislərin hazırlanması
rayonda maarifləndirmə mərkəzinin yaradılmasına
şərait yaradıb. Bu mərkəzdə ixtisasartırma
kursları təşkil olunub ki, bu da rayonun təhsil
həyatında böyük əhəmiyyət daşıyır. Rayonda
təşkil olunmuş 8 dayaq məntəqəsində - istinad
məktəblərində aparılan kurslarda təkcə ibtidai
sinif müəllimləri deyil, yuxarı siniflərdə dərs
keçən müəllimlər də həvəslə iştirak edirlər. Bu
gün yuxarı sinif müəllimləri ənənəvi üsullarla
işləməyin müasir tələblərə cavab vermədiyini
dərk edirlər. Masallı rayonunun 8 məntəqəsində
yerləşən istinad məktəblərinin mərkəzi 4 nömrəli
Digah tam orta məktəbidir. Bu məktəb həmçinin
"açıq dərs"lərin mərkəzidir. Vaxtaşırı yerli
təlimçilər burada toplaşır, təcrübə mübadiləsi
aparırlar. Seminarlar təşkil olunur ki, burada
fənn kurikulumları ilə bərabər, yeni
qiymətləndirmə mexanizmi, dərslik
komplektlərinin istifadəsi barədə müəllimlərə
geniş məlumatlar verilir. A.İbişov bu
istiqamətdə aparılan işlərin gələcəkdə uğurla
davam etdirilməsi üçün rayon təhsil işçilərinin
bütün qüvvələrini səfərbər edəcəklərini
bildirdi.
Digər çıxış edənlər də mövzu ilə bağlı öz
fikirlərini bildirdilər və təkliflər irəli
sürdülər.
Tədbirin sonunda təhsil işçilərini maraqlandıran
suallar cavablandırıldı.
Niyazi RƏHİMOV |
