|
Aprelin 5-də Azərbaycan Müəllimlər İnstitutunda
biraylıq təlim keçmiş Azərbaycan Tibb
Universitetinin bir qrup əməkdaşına
sertifikatların təqdim olunması mərasimi
keçirildi. Tədbirdə institutun professor-müəllim
heyəti və qonaqlar iştirak edirdilər.
 Tədbiri
giriş sözü ilə açan AMİ-nin rektoru, millət
vəkili, professor Aqiyə Naxçıvanlı ATU-nun bir
qrup əməkdaşının cəlb olunduğu "Təhsilin
əsasları" fənni bazasında hazırlanmış müasir
pedaqogika və psixologiya ilə bağlı biraylıq
təlim kursunun uğurla başa çatdığını bildirdi.
Qeyd etdi ki, AMİ-də və onun 11 filialında
rəhbər və digər kateqoriyalardan olan pedaqoji
işçilər tədris planlarına əsasən müxtəlif
müddətlərdə ixtisasartırma təhsilinə cəlb
olunurlar. ATU-nun rektoru, akademik Əhliman
Əmiraslanovun təşəbbüsü ilə ilk dəfədir ki,
qeyri-pedaqoji kateqoriya kimi universitetin
əməkdaşlarına pedaqoji, psixoloji və metodiki
təlimlərin təşkil olunması təklifini aldıq. Bu
məsələ ilə əlaqədar hər iki ali məktəb arasında
ikiillik müqavilə imzalandı və tədris planı
təsdiq edildi. Tədris üçün maksimum şərait
yaradıldı. Müqaviləyə əsasən, Tibb
Universitetinin 400 nəfər əməkdaşı təlimdən
keçəcək. Professor A.Naxçıvanlı əlavə təhsil
sahəsində təhsilin keyfiyyətinin yüksəldilməsinə
təsir göstərən amilləri öyrənmək və onları
düzgün planlaşdırmaqla inkişafa gedən yolun
strategiyasının dəqiq müəyyənləşdirilməsinin
aktual mövzu kimi qarşıya qoyulduğunu bildirdi.
Sonra söz ATU-nun tədris işləri üzrə
prorektoru, professor Sabir Əliyevə verildi. O,
ali təhsil müəssisələrinin birgə fəaliyyətini
yüksək qiymətləndirərək belə işlərin gələcəkdə
də uğurla davam etdirilməsinin vacibliyini qeyd
etdi. Azərbaycan Tibb Universitetində pedaqoji
təhsilin bu günə qədər aparılmadığını və bunun
da müəyyən çətinliklər törətdiyini qeyd edən
professor görülən işlər nəticəsində bu problemin
aradan qalxacağına ümidvar olduğunu bildirdi.
Sonda müdavimlərə kursu bitirdiklərinə dair
sertifikatlar təqdim olundu.
Niyazi RƏHİMOV |
