|
Martın 17-də Bakı Slavyan Universitetində
tanınmış yazıçı-alim Elçinin "Sosrealizm bizə nə
verdi?" kitabının təqdimat mərasimi oldu.
 Alimlərin,
müəllimlərin, tələbələrin və KİV
nümayəndələrinin iştirak etdiyi tədbiri BSU-nun
rektoru, AMEA-nın müxbir üzvü, professor Kamal
Abdullayev açaraq, xalq yazıçısı, filologiya
elmləri doktoru, professor Elçin Əfəndiyevi ötən
əsrin 60-cı illərindən bu günədək Azərbaycan
ədəbiyyatında orijinal dəst-xətti olan nasir,
ədəbiyyatşünas, dramaturq, ssenarist və
tərcüməçi kimi dəyərləndirdi. Vurğuladı ki,
Elçinin bu gün təqdimat mərasiminə toplaşdığımız
"Sosrealizm bizə nə verdi?" əsəri ədəbi
tariximizin ən vacib məsələlərindən birinin
həlli baxımından uğurlu bir elmi təşəbbüsdür.
Kitabda sosializm realizminin ədəbiyyatımızın
tarixində və ictimai fikrində rolu, mövqeyi,
əhəmiyyəti və uğursuz taleyi müfəssəl bir
şəkildə araşdırılıb. Elçin müəllim bu əsərdə
Azərbaycan sovet ədəbiyyatının qazandığı
nailiyyətləri və digər məsələləri göstərə bilib.
Tədbirdə BSU-nun professorları Məmməd Qocayev,
Rəhilə Qeybullayeva, Bədirxan Əhmədov, Rəhilə
Quluyeva, Tehran Əlişanoğlu, Flora Nacıyeva,
Nizami Tağısoy, AMEA-nın akademiki Arif Həşimov,
BSU-nun dosenti Rüstəm Kamal, BSU-nun tərcümə
kafedrasının müdiri, şair Etimad Başkeçid,
"525-ci qəzet"in baş redaktoru Rəşad Məcid və
digər çıxış edənlər əsərin əhəmiyyətini,
ədəbiyyatımızın dünəni ilə bağlı dəyərli və
obyektiv bir araşdırma olduğunu bir daha
iştirakçıların diqqətinə çatdırdılar.
Mərasim iştirakçılarına təşəkkür edən Elçin
bildirdi ki, ötən əsr Azərbaycan ədəbiyyatının,
mədəniyyətinin böyük bir hissəsi sosializm
realizmi ədəbi metodunun hökm sürdüyü bir dövrdə
yaradılıb. O dövrdə nəşr olunmuş ədəbi
nümunələrə qiymət verməyin vaxtı çatıb. Eyni
zamanda biz o dövrdə yazılmış nə varsa üstündən
xətt çəkə bilmərik. Şübhəsiz ki, zəif əsərlər
yazılıb, ədəbiyyatımıza güclü zərbələr vurulub.
Bununla belə, etiraf etməliyik ki, həmin dövrdə
gözəl ədəbi nümunələr də işıq üzü görüb, müəyyən
mənada ədəbiyyatımız, mədəniyyətimiz inkişaf
edib, yeni janrlar yaranıb. Bu kitabı yazmaqda
əsas məqsədim həmin dövrə obyektiv qiymət vermək,
Azərbaycan ədəbiyyatının itirdiklərini və
qazandıqlarını düzgün təhlil etmək olub.
Elçin müəllim çıxışının sonunda mərasim
iştirakçılarını və bütün Azərbaycan xalqını
Novruz bayramı münasibəti ilə səmimi-qəlbdən
təbrik etdi.
Ədalət DAŞDƏMİRLİ |
|
