|
 Naxçıvan
Dövlət Universitetində elmin, təhsilin inkişafı,
tədrisin yüksək səviyyədə təşkili məqsədilə
kənar mütəxəssislərin buraya cəlb olunması,
respublikanın, dünyanın tanınmış elm
xadimlərinin, pedaqoqlarının universitetdə
mühazirələrinin təşkili artıq ənənə halını
almışdır.
Azərbaycan
Tibb Universitetinin Uşaq xəstəliklərinin
propedevtikası kafedrasının müdiri, tibb elmləri
doktoru, professor İbrahim İsayev universitetin
tibb fakültəsinin tələbələrinə növbəti
mühazirəni oxudu. Mühazirədən öncə universitetin
tədris işləri üzrə prorektoru, əməkdar elm
xadimi Hüseyn Həşimli həmkarını kollektiv
adından salamlayaraq təmsil etdiyi ali məktəbin
Azərbaycan Tibb Universiteti ilə çoxşaxəli
əlaqələrindən, yerli tibbi kadrların yüksək
mütəxəssis kimi hazırlanmasında belə
mühazirələrin əhəmiyyətindən danışdı.
Sonra
professor İbrahim İsayev "Uşaqlarda həzm sistemi
və həzm sistemi üzvlərinin
xüsusiyyətləri" mövzusunda mühazirəyə başladı.
Professor öncə ölkəmizdə
uşaqların sağlamlığına, əqli və fizioloji
inkişafına, uşaq ölümünün sayının minimum həddə
endirilməsinə xüsusi diqqət ayrıldığını qeyd
etdi.
Bətndaxili düzgün qidalanmadan,
yenidoğulmuşların gələcək sağlamlığı üçün ana
südünün əhəmiyyətindən danışan həkim-alim
uşaqlarda ağız boşluğu, mədə, qida borusu, öd,
nazik və yoğun bağırsaq kimi həzm sistemi
üzvlərinin tez-tez rast gəlinən xəstəlikləri,
onların ilkin simptomları, müxtəlif müalicə
üsullarından ətraflı bəhs etdi. Məruzəçi
uşaqlarda həzm sistemi üzvləri xəstəliklərinin
profilaktikası, ağır infeksion xəstəliklər
zamanı düzgün diaqnozun qoyulması barədə gələcək
həkimlərə dəyərli elmi məsləhətlər verdi,
tələbələri maraqlandıran sualları cavablandırdı.
Universitet
ərazisindəki abadlıq-quruculuq işləri ilə tanış
olan professor İbrahim İsayev təəssüratlarını
universitet televiziyası ilə bölüşdü.
Mehriban SULTAN |
|
