|
"Azərbaycan dili və ədəbiyyatı tədrisi" jurnalı 60 ilə
yaxındır ki, dilimizin öyrənilməsinə
elmi-metodik yardım edir
Fevralın 21-də
Bakı şəhərindəki 190 nömrəli orta məktəbin akt
zalında Beynəlxalq Ana Dili Gününə həsr edilmiş
tədbir keçirildi. Tədbiri giriş sözü ilə açan
direktor Afət Bakıxanova qonaqları salamladıqdan
sonra bildirdi ki, dünyanın ən qədim dillərindən
sayılan dilimizi dərindən bilməli, sevməli və
qorumalıyıq. Elə bu tədbiri keçirməkdə də
məqsədimiz bundan ibarətdir.
Direktor
müavini Qənirə Əmircanova isə bildirdi ki,
Beynəlxalq Ana Dili Gününün bizim məktəbdə qeyd
edilməsi, pedaqoji mətbuat tariximizdə mühüm
əhəmiyyətə malik yer tutan, dilimizin
öyrənilməsində əvəzsiz xidmətlər göstərən
"Azərbaycan dili və ədəbiyyatı tədrisi"
jurnalının əməkdaşları ilə görüşümüz bizim üçün
ikiqat sevincdir. Jurnalın redaksiya heyətinin
üzvü, Azərbaycan Təhsil Problemləri İnstitutu
direktorunun müavini Ənvər Abbasov mərasimdə
çıxış edərək bu jurnalın dilimizin inkişafında
böyük xidmətləri olduğunu diqqətə çatdırdı.
Sonra çıxış
edən jurnalın baş redaktoru Məhəmməd Baharlı
bildirdi ki, əsası 1954-cü ildə qoyulmuş
"Azərbaycan dili və ədəbiyyatı tədrisi" uzun
illər "Azərbaycan məktəbi" jurnalının metodik
əlavəsi kimi fəaliyyət göstərib. 1990-cı illərdə
müstəqil redaksiyası yaradılaraq əvvəlcə "Ana
sözü" adı altında nəşr edilməyə başlanıb, sonra
isə yenidən ilk adına qaytarılıb. O, Azərbaycan
Respublikası Təhsil Nazirliyinin elmi-metodik
mətbu orqanıdır. Jurnalda ədəbiyyatşünaslıq və
dilçiliyə, dil və ədəbiyyatın tədrisi tarixinə,
qloballaşan dünyamızda baş verən mühüm ədəbi
proseslərə, yeniliklərə dair yazılara da geniş
yer verilir, - deyən baş redaktor çıxışının
sonunda xüsusilə Azərbaycan dili və ədəbiyyat
müəllimlərini jurnalla fəal əməkdaşlığa çağırdı.
Tədbirdə daha
sonra 190 nömrəli məktəbin dil-ədəbiyyat
müəllimi Təranə Yusifova, "Azərbaycan dili və
ədəbiyyatı tədrisi" jurnalının şöbə redaktoru
Oqtay Abbasov, Bakı şəhərindəki 62 nömrəli
məktəb-liseyin Azərbaycan dili və ədəbiyyat
müəllimi Nailə Əliyeva çıxış edərək qabaqcıl
müəllimlərin pedaqoji mətbuatdan
bəhrələndiklərini vurğuladılar.
Beynəlxalq Ana
Dili Gününə həsr olunmuş tədbirin sonunda
məktəbin yuxarı sinif şagirdlərinin ana
dilimizi vəsf edən şeirləri böyük məhəbbətlə,
sonsuz istəklə söyləmələri iştirakçıların
qəlbinə hakim kəsildi.
Ədalət DAŞDƏMİRLİ |
