| |
Ünvanı: |
Bakı şəhəri, Xətai rayonu Məzahir
Rüstəmov küçəsi, 14 |
 |
|
|
Yaranma tarixi: |
1992-ci il |
|
Müəllimlərin sayı: |
85 nəfər |
|
Şagirdlərin sayı: |
965 nəfər |
|
Direktoru: |
Aygün Əhmədli, elmlər namizədi, əməkdar
müəllim |
|
E-mail ünvanı: |
zekalar.litsey@gmail.com,
mekteb287@box.az |
Haqqında
 287
nömrəli "Zəkalar" liseyi 1992-ci ildə
yaradılıb. Liseyin yaranmasının ideya müəllifi
tanınmış riyaziyyatçı Rafil İmanov olmuşdur.
Liseyin yaradılmasında məqsəd Bakı şəhərində
yaşayan istedadlı şagirdləri aşkar edib, onları
layiqli vətəndaş kimi formalaşdırmaq idi.
Yarandığı müddətdən bu günə qədər fəaliyyət
göstərərək özünəməxsus mütərəqqi təlim modeli və
tədris üsulu, yaradıcı, demokratik mühiti,
yüksək intellektə malik bacarıqlı müəllim heyəti
və məhz bunların nəticəsində məzunlarının hər il
yüksək göstəricilər əldə etməsi ilə
ictimaiyyətin diqqətini cəlb edən lisey
Azərbaycan təhsilində yeni ənənələrin
təşəbbüsçüsü kimi tanınır. 287 nömrəli
"Zəkalar" liseyi fəaliyyətə ölkəmizin
intellektual potensialını artırmaq, xüsusi
qabiliyyəti və istedadı olan uşaqlardan
gələcək zəkalar yetişdirmək məramı ilə
başlamışdır. 19 illik fəaliyyəti dövründə bu
istiqamətdə böyük işlər görərək, təhsil
salnaməmizə bir çox uğurlar yazmışdır. Liseyin
adı son 10 ildə Tələbə Qəbulu üzrə Dövlət
Komissiyasının ali məktəblərə qəbulun
nəticələrinə əsasən müəyyənləşdirdiyi 10 ən
yaxşı məktəbin sırasındadır.
Liseyin əsas
vəzifəsi istedadlı şagirdlərin təbii imkanlarını
inkişaf etdirmək, onlara elmin əsaslarını
öyrətmək, fiziki, əqli, intellektual
imkanlarını, meyil, maraq və idrak
qabiliyyətlərini nəzərə alaraq onların
şəxsiyyətini formalaşdırmaq, ümumi mədəniyyətə
malik, milli mənəviyyatlı şəxsiyyətin
yetişdirilməsinə xidmət etmək, müstəqil və
demokratik Azərbaycan Respublikasının inkişafı
naminə fədakarlıqla çalışan ləyaqətli vətəndaş
tərbiyə etməkdən ibarətdir.
 Lisey
öz fəaliyyətində "Təhsil haqqında" Azərbaycan
Respublikasının Qanununda nəzərdə tutulmuş
prinsipləri əsas tutur. Liseydə təhsil dünyəvi
xarakter daşıyır, milli zəminə, Azərbaycan
xalqının azadlıq və demokratiya ənənələrinə və
ümumbəşəri dəyərlərə əsaslanır. Lisey
şəxsiyyətin Konstitusiya və "Təhsil haqqında"
Qanunda müəyyən edilmiş təhsil hüququnun həyata
keçirilməsində, uşaqların yaş, cins və fərdi
xüsusiyyətlərinə uyğun təlim-tərbiyə prosesinin
təşkilində, onların sağlamlığının qorunmasında,
tədris materiallarının keyfiyyətlə
mənimsənilməsində, şagirdlərin qabiliyyətlərinin
inkişaf etdirilməsində dövlət və xalq qarşısında
məsuliyyət daşıyır. Liseyin təlim mühiti
şagirdləri yaradıcılığa və axtarışa
həvəsləndirir, onların istedadını müxtəlif
yollarla üzə çıxarır, nümayiş etdirir və
dərsdənkənar təlim imkanlarını genişləndirir.
Lisey kollektivi çalışır ki, şagirdləri
gələcəkdə yaxşı mütəxəssis olmaq üçün erkən
yaşlarından müasir peşə vərdişləri ilə yaxından
tanış etsin. Liseydə vətənpərvərlik və xalqa
məhəbbət duyğuları ön plana çəkilir və hər bir
şagirdə dövlətçilik prinsiplərini qorumaq
aşılanır.
Liseydə
şagirdlərin biliyini dərinləşdirməyə xidmət
edən intellektual yarışlar, breyn-rinqlər, fənn
gecələri, viktorinalar tez-tez keçirilir,
onların proqram materiallarını hansı dərəcədə
mənimsədiyini müəyyənləşdirmək məqsədilə test
yoxlamaları təşkil olunur.
Liseydə
şagirdlə müəllim heyətinin sağlamlığını təmin
etmək üçün tibbi xidmət təşkil olunub. Hər
tədris ilinin başlanğıcında müəllimlər tibbi
müayinədən keçərək sağlamlıqlarını təsdiq
etdirirlər. Tibb bacısı Güləfruz Məmmədova
tədris ili ərzində şagirdlərin sağlamlığının
qayğısına qalır.
Liseyin
uğurları
 Lisey
"Əmək həyatımızın tələbi, müdriklik məqsədi,
"Zəkalar" isə mükafatıdır" devizini əsas
götürür. Liseyin bir çox uğurları var ki,
bunlardan biri də 2008-2009-cu tədris ilində
"Ən yaxşı ümumtəhsil məktəbi" müsabiqəsinin
qalibi olmasıdır. Liseyin müəllimləri "Ən
yaxşı müəllim" müsabiqəsində iştirak edərək
yüksək fəallıq göstərirlər. 2009-cu ildə
tarix müəllimi Musa Yaqubov, 2010-cu ildə isə
Maral Məmmədova və Fatimə Süleymanova
müsabiqənin qalibi olmuşlar. 2007-2008-ci tədris
ilində liseyin VII sinif şagirdi Günel Əsgərova
"İlin şagirdi" müsabiqəsinin qalibi olmuşdur.
Lisey respublika üzrə reytinqi yüksək olan 20
məktəb sırasındadır.
Liseyin
məzunları hər il qəbul imtahanlarında yüksək
nəticələr əldə edirlər. 2007-2008-ci tədris
ilində liseyi 62 şagird bitirmiş, onlardan 6
nəfər 600-dən, 9 nəfər 500-dən yuxarı bal
toplamış, Gültən Məmmədzadə isə 685 balla
Prezident təqaüdünə layiq görülmüşdür.
2008-2009-cu tədris ilində liseyi 39 nəfər
şagird bitirmiş, qəbul faizi 77 faiz olmuşdur.
3 nəfər 600-dən, 9 nəfər 500-dən yuxarı bal
toplamış, 2 nəfər - Eldar Ağayev, Vüqar Heydərov
Prezident təqaüdünə layiq görülmüşdür.
2009-2010-cu tədris ilində liseyin 84
məzunundan 68 nəfəri ali məktəblərə daxil olmuş,
11 nəfər 600-dən, 19 nəfər isə 500-dən yuxarı
bal toplamış, Qoşqar Məmmədzadə, Oruc Əhmədov
Prezident təqaüdünə layiq görülmüşlər.
Ümumiyyətlə, liseyin 8 nəfər məzunu Prezident
təqaüdünə layiq görülüb.
Liseyin
məzunlarından Tural Qurbanov Türkiyədə
Yeditəpə, Tural İsmayılov İngiltərə New Castle,
İslam Bağırov isə Ankara ODTU universitetlərində
təhsil alırlar.
 Ali
məktəblərə qəbulda olduğu kimi,
məktəblilərin respublika fənn
olimpiadalarında iştirakı baxımından da
liseyin uğurları diqqətçəkəndir. Şəhər və
respublika üzrə keçirilən müxtəlif olimpiada və
yarışlarda liseyin şagirdləri uğurla çıxış
edərək yüksək yerlər tutmuşlar. Bilik
yarışmasının məktəb turunda 100 nəfər şagird
iştirak etmiş, onlardan 60 nəfəri rayon turunda
iştirak etmək hüququ qazanmışdır. 27 şagird isə
şəhər turunda iştirak etmiş, 11 nəfər qalib
olmuşdur. Ulu öndərimiz Heydər Əliyevin anadan
olmasının 86-cı ildönümü münasibətilə keçirilən
"Azərbaycan dünyam mənim" müsabiqəsində müxtəlif
nominasiyalar üzrə liseyin 27 şagirdi iştirak
etmiş, onlardan 7 nəfəri şəhər, həmçinin 2
nəfəri respublika turunun qalibi olmuşdur.
"Natiqlər" müsabiqəsində iştirak edən Gövhər
Əlizadə I yerə layiq görülüb. Daha sonra Novruz
bayramı münasibəti ilə "Araz" kurslarının
keçirdiyi "Bilik yarışı"nda komanda heyətində 22
şagird iştirak etmiş və qalib gəlmişdir. Onların
hər birinə qiymətli hədiyyələr verilmişdir.
Şagirdlər
uğurlarını beynəlxalq müsabiqələrdə də davam
etdirirlər. "Çağ" Öyrətim İşlətmələri
Azərbaycan-Türkiyə Özəl liseylərinin təşkil
etdiyi "Ana dilimi sevək, sevdirək"
müsabiqəsinin zona turunda inşa kateqoriyası
üzrə IX sinif şagirdi Ləman Baxşıyeva və X sinif
şagirdi Türkanə Hidayətova I yeri tutmuşlar.
 "İdmanla
məşğul olan xalq fiziki və mənəvi cəhətdən
sağlamdır" söyləyən ulu öndərimiz Heydər
Əliyevin ideyalarını əsas tutan liseyin
şagirdləri idmanın müxtəlif növləri üzrə həm
respublika, həm də respublikadan kənarda
keçirilən beynəlxalq turnirlərdə yüksək
nəticələr əldə etmiş və uğurlar qazanmışlar.
Bunlardan VI sinif şagirdi Əlihüseyn Aslanlı
Ukraynada keçirilən cüdo üzrə Beynəlxalq
turnirin I mükafatına layiq görülmüş, III sinif
şagirdi Abdulla Qədimbəyli isə şahmat üzrə
Azərbaycan çempionu və oğlanlar arasında ikiqat
Avropa və I qat dünya çempionudur. Lisey
həmçinin Azərbaycan Futbol Federasiyaları
Assosiasiyasının keçirdiyi "Məktəblərarası
mini-futbol turniri"ndə III yerə layiq
görülmüşdür.
Təhsil
ocağının intellektli şagirdlərindən təşkil
olunmuş komandası müxtəlif telekanallarda
keçirilən "Ağıl dəryası" (ANS), "LG bilik
akademiyası"(ATV), "Virtual rinq"(İTV) kimi
intellektual yarışlarda iştirak edərək
uğurlu nəticələr göstərmişlər. 15 yanvar
2011-ci il tarixində İTV kanalında keçirilən
"Xəmsə" milli intellektual oyununda respublika
üzrə 16 ən yaxşı məktəbdən seçilmiş komandalar
arasında keçirilən yarımfinal və final
mərhələsində liseyin "Zəkalar" adlı komandası
qalib olmuş, komandanın kapitanı Əli Əliyev və
komanda üzvləri - XI sinif şagirdləri Gövhər
Əlizadə, Şahlar Məmmədov, Cəlal İbrahimov, Namiq
İsmayılov kubokla mükafatlandırılmışlar.
 Liseyi
bitirən məzunlar respublikamızın rifahı naminə
var gücləri ilə çalışırlar. Hazırda məzunlardan
Gündüz İsmayılov Dini Qurumlarla İş üzrə Dövlət
Komitəsində şöbə müdiri, Bəhruz Məmmədli "The
Consept of Self Determination the Conflikt
Naqorno Karabakh" adlı kitabın müəllifi, Türkiyə
İqtisadiyyat İnstitutunun doktorantı, Azərbaycan
mətbuatında işıq üzü görən "Yeni İqtisadiyyat"
jurnalının redaksiya heyətinin üzvüdür. Azər
Qurbanov isə ABŞ-ın Kolumbiya Universitetinin
müəllimi, Harvard Universitetinin professoru
N.Gregori Menkyunun "İqtisadiyyatın əsasları"
kitabının tərcüməçisi, Böyük Britaniya
hökumətinin və "Soros" Fondunun birgə
sponsorluğu ilə "London School of Economics"də
iqtisadiyyat üzrə magistr təhsili alır.
Pedaqoji
kollektiv
Təlim
keyfiyyətinin artırılması, İKT ilə işin
təkmilləşdirilməsi üçün liseyin müəllimləri
"İntel", "Mədəd" kurslarından keçərək elektron
tədris vəsaitləri hazırlayır. MIMIO -interaktiv
qurğuları ilə keçirilən dərslər təlimin
səmərəliliyini yüksəldərək şagirdlərdə fənlərə
marağın artırılmasına kömək edir.
Liseyin
müəllimləri kurikulum üzrə dərsliklərin
müəllifləri, rəyçiləri və təlimçiləri kimi
iştirak edərək təhsil islahatına öz töhfələrini
verirlər.
 Lisey
təlimdə müasir texnologiyalardan istifadə
məqsədilə müxtəlif fənlərə dair elektron
dərsliklərlə təmin olunmuşdur. Bu yeniliklər
mütəmadi olaraq dərslərdə tətbiq olunur. Lisey
yeni fənn kurikulumlarının tətbiqinə hazırlıqla
əlaqədar "pilot məktəb" seçilib, eksperiment
tədbirlər üçün fəaliyyət planı təsdiq olunub.
Bununla əlaqədar liseyin direktoru Aygün Əhmədli
kurikulum tədris materiallarının hazırlanması və
şagirdlərin qiymətləndirilməsi üzrə seminarın
fəal iştirakçısıdır.
Liseyin
pedaqoji kollektivi hesab edir ki, təhsilin
keyfiyyəti üç əsas amildən- kadrlardan,
proqram -dərslik təminatından və normal
təhsil üçün yaradılan şərait və mühitdən
asılıdır. Liseydə hər üç məsələ özünün
müsbət həllini tapmışdır. Belə ki, təhsil
ocağının yüksək ixtisaslı, öz işini sevən,
daim yaradıcı fəaliyyət göstərən peşəkar
müəllimlərdən təşkil olunmuş mehriban, işgüzar
pedaqoji kollektivi psixoloji şərait, əsl
işgüzar demokratik mühit yaradıb. Məktəb
rəhbərliyi və müəllimlər arasında sağlam,
qarşılıqlı hörmətə və səmimiyyətə əsaslanan
münasibətlər hökm sürür. Liseyin uğurlarında,
xüsusən də bu il ali məktəblərə qəbul olunmuş
məzunların yetişməsində müəllimlərdən Rafil
İmanov, Sabir Məmmədov (riyaziyyat), Şamxal
Məmmədov (fizika), Fərman Kərimov, Fərrux
Muxtarov (kimya), Fatimə Süleymanova (ingilis
dili), Abbasağa Səmədov (tarix), Tərlan Həsənova
(Azərbaycan dili və ədəbiyyat) və digərlərinin
rolu danılmazdır.
Pedaqoji
kollektiv üzvləri öz fəaliyyətlərində müasir
dərsə verilən tələbləri daim diqqət mərkəzində
saxlayır, şagirdlərin idrakını inkişaf
etdirən, müstəqilliyini artıran, bilikləri
sərbəst əldə etmək vərdişləri yaradan,
axtarıcılığı istiqamətləndirən fəal təlim
metodlarından, qeyri-ənənəvi tədris forma və
üsullarından geniş istifadə edirlər. Liseyin
ingilis dili müəllimi Fatimə Süleymanova Böyük
Britaniya konsulluğu və Azərbaycan Respublikası
Təhsil Nazirliyinin dəstəyi ilə keçirilən
ikiillik seminarda iştirak edib. Hazırda
"Mətnlərdən istifadə etməklə ingilis dilində
danışıq vərdişlərinin öyrənilməsi" layihəsini
işləyərək həyata keçirir. F.Süleymanovanın
təşkil etdiyi "açıq dərs"lər İctimai televiziya
kanalı ilə tez-tez yayımlanır və Britaniya və
amerikalı mütəxəssislər tərəfindən bəyənilir.
İbtidai sinif
müəllimlərindən, "Ən yaxşı müəllim"
müsabiqəsinin qalibi Maral Məmmədova Ankarada
dərsliklərin təkmilləşdirilməsi ilə əlaqədar
keçirilən seminarın iştirakçısı olub.
Lisey bu il
Müasir Təhsil və Tədrisə Yardım Mərkəzinin yeni
"Səmərəli məktəb layihəsi" nə qoşulub.
"Zəkalar
axtarırıq"
Lisey hər il
ənənəvi olaraq 28 May Respublika günündə
"Zəkalar axtarırıq" adlı məntiq yarışı keçirir.
Yarışı fərqləndirən cəhət onun şagirdlər
tərəfindən aparılması, yoxlanması və nəticələrin
çıxarılmasıdır. Yarışa nəzarəti respublikamızın
tanınmış ziyalıları və liseyin tanınmış
məzunları edir.
Yarışın əsas
özəlliklərindən biri də ona sponsorluq edən
lisey məzunlarının qaliblərə həvəsləndirici
hədiyyələr verməsidir.
Yarış
iştirakçıları məntiqi sualları cavablandırdığı
müddətdə valideynlərə məktəb haqda bilgilər
verilir. Həmçinin şagirdlərin iştirakı ilə
Respublika gününə həsr olunmuş bayram konserti
təqdim olunur. Sonda iştirakçılara hədiyyələri
tanınmış qonaqlar təqdim edir. Belə insanlar
tərəfindən verilən hədiyyələr şagirdlərdə əlavə
stimul yaradır və məsuliyyət hissini artırır.
Beynəlxalq
əlaqələr
Liseyin
direktoru Aygün Əhmədli Dünya Bankının
dəstəyi ilə "Azərbaycan Respublikasında
Təhsilin İdarə olunması" layihəsi çərçivəsində
"Sito Greop"-da kurikulum tədris materiallarının
hazırlanmasında, şagird nailiyyətlərinin
qiymətləndirilməsi üzrə seminarın iştirakçısı
olub. O, həmçinin Müasir Təhsil və Tədrisə
Yardım Mərkəzinin təşəbbüsü ilə "Məktəb
liderliyinin inkişafı" layihəsinin fəal
iştirakçısı olduğu üçün ABŞ-ın Konnektikut
ştatına və Nyu-York şəhərinə ezam olunmuşdu.
Burada məktəb rəhbərlərinin başlıca vəzifələri
işçi heyətinin istiqamətləndirilməsi və
perspektiv məqsədlərin müəyyən olunması kimi
liderlik xüsusiyyətləri ilə yanaşı, həm də
menecment, görülən işlərin səmərəliliyinin
artırılmasının da vacibliyi, strateji
planlaşmanın hazırlanması kimi çox önəmli
seminarların iştirakçısı olmuş, sertifikat
almışdır. Həmçinin fizika müəllimi Gülçin
Baxşəliyeva 2010-cu ildə Gürcüstanda keçirilmiş
"Enerjiyə qənaət və ətraf mühitin mühafizəsi"
adlı regional seminarda iştirak etmiş və
sertifikatla təltif olunmuşdur.
Liseyin
kollektivi keyfiyyətli təhsil, milli dəyərlərə
əsaslanan tərbiyə sisteminə yönələn, daim
dəyişən, inkişaf edən cəmiyyətə fəal inteqrasiya
edən, davamlı insan inkişafına nail olmaq üçün
əzmlə çalışır!
Liseyin
uğurları
* Lisey
2008-ci ildə "Ən yaxşı ümumtəhsil məktəbi"
müsabiqəsinin qalibi olub.
* Liseyin 3
müəllimi "Ən yaxşı müəllim" müsabiqəsinin
qalibidir.
* Liseyin
məzunlarından 8 nəfəri Prezident təqaüdçüsüdür.
* Liseyin
məzunu Azər Qurbanov ABŞ-ın Kolumbiya
Universitetinin müəllimi, "İqtisadiyyatın
əsasları" kitabının tərcüməçisidir.
* Gündüz
İsmayılov - Dini Qurumlarla İş üzrə Dövlət
Komitəsində şöbə müdiridir.
* Liseyin 8
yaşlı şagirdi Abdulla Qədimbəyli şahmat üzrə
Dünya və ikiqat Avropa çempionudur.
Niyazi RƏHİMOV |
