|
Mərasimdə Azərbaycanın birinci xanımı Mehriban
Əliyeva iştirak edib
 Fevralın
17-də Parisdə Azərbaycan Respublikasının
müstəqilliyini bərpa etməsinin 20-ci ildönümünə
və "Azərbaycan" kitabının təqdimatına həsr
olunmuş təntənəli mərasim keçirilmişdir.
Heydər Əliyev
Fondunun, ölkəmizin Fransadakı səfirliyinin
təşəbbüsü və dəstəyi ilə baş tutan mərasimdə
Azərbaycanın birinci xanımı, Heydər Əliyev
Fondunun prezidenti Mehriban Əliyeva iştirak
etmişdir.
Azərbaycan
mədəniyyətinin təntənəsi bu dəfə də dünyanın
mədəniyyət paytaxtı olan Parisdə yaşandı.
Prezident İlham Əliyevin Azərbaycanın
müstəqilliyini bərpa etməsinin 20-ci ildönümünün
qeyd olunması ilə bağlı imzaladığı sərəncama
əsasən təşkil edilən bu möhtəşəm mərasim
Azərbaycan mədəniyyətinin təbliği baxımından
mühüm addım oldu.
Fransanın
mədəniyyət naziri Frederik MİTTERAN Azərbaycanın
müstəqilliyinin bərpa edilməsinin 20-ci ildönümü
münasibətilə təbriklərini çatdıraraq dedi:
- Hörmətli
birinci xanım Mehriban Əliyeva!
Xanımlar və
cənablar!
- Hörmətli
dostlar!
 Bu
gün sizinlə bir yerdə olmaqdan çox
şadam və
bundan şərəf hissi duyuram. Bu tədbir Azərbaycan
Respublikasının müstəqilliyinin bərpasının 20-ci
ildönümünə həsr olunub. Qeyd etmək istərdim ki,
Fransa Azərbaycan mədəniyyətinin ən yaxın
dostlarından biridir. Təbii ki, sizin rəhbərlik
etdiyiniz Heydər Əliyev Fondu Azərbaycan
mədəniyyətinin təşviqi sahəsində mühüm işlər
görüb və bu sahədə böyük rol oynayıb.
Biz bilirik
ki, Azərbaycan muğam və aşıq musiqisi ölkəsidir.
Bu baxımdan Azərbaycan mütəmadi olaraq
festivallar və musiqi tədbirləri keçirir, bu
tədbirlər isə böyük uğurla nəticələnir.
Kinorejissor Maqsud İbrahimbəyov indi artıq çox
yaxşı tanınır və mən onun soyadını bu cür
tələffüz etməklə bildirmək istəyirəm ki, deməli,
biz həm də Azərbaycanı yaxşı tanıyırıq. Biz
cənab Rüstəm İbrahimbəyovu da tanıyırıq və bu
şəxslər gözəl əsərlərin müəllifləridir.
Azərbaycan, eyni zamanda, dahi Sabirin,
Nəsrəddin Xocanın vətənidir. Bütün bu zəngin
mədəni irsdən danışarkən demək istəyirik ki, biz
Üzeyir Hacıbəylinin də əsərlərinə yaxşı bələdik.
Bu əsərlər həm bizim auditoriya qarşısında
səslənib, həm də aşıqların gözəl çıxışlarını
fransız yazıçısı Jorj Sand öz əsərlərində təsvir
edib. Fransa çox şaddır ki, bu cür mədəni
zənginliyə malik olan Azərbaycan bizim ölkədə
getdikcə daha yaxşı tanınır. Biz istəyirik ki,
Azərbaycanın mədəni irsi burada daha çox təşviq
olunsun.
Hörmətli xanım
Əliyeva!
 Biz
bilirik ki, siz Azərbaycanın mədəni irsini
YUNESKO vasitəsilə də təbliğ edirsiniz və
Azərbaycanın paytaxtı Bakı muğam şəhəri kimi
məşhurdur. Ölkənizin xalçaçılıq məktəbi də
getdikcə tanınır. Bu onu göstərir ki, ölkənizin
mədəniyyəti zəngindir. Azərbaycan nəinki bu cür
möhtəşəm konsertləri təşkil etməklə fərqlənir,
eyni zamanda ölkəniz Luvr muzeyində aparılan
bərpa işlərində də öz rolunu oynayıb və muzey
tam bərpa olunduqdan sonra öz qapılarını
ictimaiyyətə açıb. Deyə bilərəm ki, bu məsələdə
Azərbaycan nümunəvi fəaliyyət göstərib. Mən onu
da qeyd etmək istərdim ki, ölkələrimiz arasında
mədəni mübadilə daimi olaraq genişlənir,
möhkəmlənir. Mən burada audiovizual milli
institutla Azərbaycandan olan həmkarlar arasında
qarşılıqlı səfərləri, təmasları qeyd etmək
istəyirəm. Biz, eyni zamanda arxeologiya
sahəsində də əməkdaşlığa başlamışıq. Azərbaycan
Milli Elmlər Akademiyası Fransanın müvafiq
qurumu ilə əməkdaşlıq edir. Bu əməkdaşlıq
2007-ci ildən başlayıb və bu da sizin böyük
arxeoloji irsinizin nümunələrinin qorunmasına
imkanlar verir. Hesab edirəm ki, bu əməkdaşlıq
nəticəsində əlaqələrimizdə yeni üfüqlər
açılacaqdır.
Hörmətli xanım
Əliyeva!
Qeyd edim ki,
bizim mədəniyyət sahəsində əməkdaşlığımız sizin
şəxsi iştirakınızdan qaynaqlanır. Siz Fransa
Respublikası Prezidentinin bir il əvvəl qəbil
etdiyi rəsmi qərarla Fransanın Fəxri Legionu
ordeni ilə təltif edilmisiniz. Bu orden Luvr
muzeyində aparılan bərpa işlərində göstərdiyiniz
xidmətlərə görə verilib. Eyni zamanda siz Bakıda
fransızdilli məktəbin açılmasında müstəsna rol
oynamısınız. Qeyd edim ki, gələn il Azərbaycan
"Plezyiğ düfğans" adlı sərgini qəbul edəcəkdir.
Bu, elə bir layihədir ki, mən bu layihəyə çox
bağlıyam və ona öz dəstəyimi verirəm. Bakıda
açılacaq həmin sərginin davamı da olacaqdır. Bu
sərgi vasitəsilə biz Fransanın incəsənət
nümunələrini Azərbaycanda daha yaxşı tanıda
biləcəyik. Beləliklə, Bakı bu prosesə böyük
təkan vermiş şəhər olacaqdır. İnanıram ki, biz
münasibətlərimizin keyfiyyətindən çıxış edərək
bu əməkdaşlığı daha da genişləndirməliyik. Hesab
edirəm ki, biz hamımız ölkələrimizin mənafeyi
uğrunda Prezident İlham Əliyevin qeyd etdiyi və
onun atasının çalışdığı kimi işləməliyik. Bu,
bir daha onu göstərir ki, Fransa ilə Azərbaycan
arasında keyfiyyətli dostluq əlaqələri mövcuddur
və biz istəyirik ki, bu irəliləyiş bundan sonra
da davam etsin.
 Diqqətinizə
görə çox sağ olun.
***
Azərbaycanın
birinci xanımı, Heydər Əliyev Fondunun
prezidenti, YUNESKO-nun və İSESKO-nun xoşməramlı
səfiri, Milli Məclisin deputatı Mehriban ƏLİYEVA
mərasimdə çıxış edərək dedi:
- Xanımlar və
cənablar!
Hörmətli
qonaqlar, hörmətli cənab nazir!
İlk növbədə,
cənab nazir, mən sizə öz dərin minnətdarlığımı
bildirmək istəyirəm. Ölkəmizə göstərdiyiniz
dostluq münasibətinə, mədəniyyətimizi belə
dərindən bildiyinizə və dəstək verdiyinizə görə.
Mənim fəaliyyətimə verdiyiniz yüksək qiymətə
görə də sizə dərin minnətdarlığımı bildirirəm.
Hörmətli
qonaqlar, mən sizin hamınızı səmimi - qəlbdən
salamlayıram və bu gün bizimlə olduğunuza görə
sizə minnətdarlığımı bildirirəm. Azərbaycan bu
il müstəqilliyinin bərpa olunmasının 20-ci
ildönümünü qeyd edir və mən çox şadam ki, bu
hadisəyə həsr olunmuş ilk tədbir Fransada
keçirilir. Dünyanın ən möhtəşəm, ən gözəl və ən
zövqlü şəhərlərindən biri olan Parisdə ölkəmi,
Azərbaycanı təqdim etmək mənim üçün böyük
şərəfdir.
Müstəqil ölkə
kimi Azərbaycan çox gəncdir. Lakin Odlar Yurdu
adlanan bu diyarın tarixi kökləri uzaq keçmişə
gedib çıxır. Burada - Cənubi Qafqazda, Xəzər
dənizinin sahilində ilk dövlətlər hələ eramızdan
əvvəl 2-ci, 1-ci minilliklərdə mövcud idi.
Ölkəmizin ərazisindən tarixi İpək Yolu keçir.
Sivilizasiyaların və mədəniyyətlərin qovuşduğu
strateji bir məkanda yerləşən Azərbaycan uğrunda
əsrlər boyu mübarizələr aparılmışdır. Baxmayaraq
ki, müxtəlif dövrlərdə Azərbaycan müxtəlif
imperiyaların tərkib hissəsi olub, xalqımız öz
tarixini, mədəniyyətini, dilini qoruyub
saxlayaraq milli mənliyini itirməmişdir.
Müstəqillik
yolumuz heç də asan və hamar olmamışdır. Bu
yolda itkilərimiz, ağrılarımız, acılarımız
kifayət qədər olub. 1918-ci ildə yaradılmış
Azərbaycan Xalq Cümhuriyyəti Şərqin ilk
demokratik parlament respublikası olmuşdur.
Həmin il, həmin dövr Azərbaycan müsəlman
dünyası, müsəlman Şərqi üçün əsl mayaka
çevrilmişdir. Müsəlman qızları üçün ilk dünyəvi
məktəb açılmışdır, Azərbaycan qadınları səsvermə
hüququnu qazanmışdır, Şərqin ilk operası və
baleti yazılmışdır. Lakin əfsuslar olsun ki,
xalq cümhuriyyətinin ömrü cəmi 23 ay çəkdi.
Respublika çox ciddi geosiyasi problem və
amillərlə üzləşdi. Bu amillərin sırasında Bakı
neftinə olan marağın artması da çox böyük rol
oynayırdı. Nəticədə ölkəmiz müstəqilliyini
itirdi və hərbi intervensiya yolu ilə
Azərbaycanda sovet hakimiyyəti quruldu. 70 ildən
çox sürən bu dövrdə xalqımız sovet rejiminin
sərt qanunları ilə üzləşdi. Lakin buna
baxmayaraq, həmin illərdə Azərbaycanın iqtisadi
potensialı formalaşdı, savadsızlıq tamamilə ləğv
olundu, təhsil şəbəkəsi yarandı, universitetlər
açıldı, Milli Elmlər Akademiyası fəaliyyətə
başladı. Bütün bu illər Azərbaycan xalqı
müstəqillik arzusu ilə yaşayırdı. Nəhayət,
1991-ci ildə Azərbaycan xalqı öz taleyinin, öz
torpağının, öz ölkəsinin sahibinə çevrildi.
Şübhəsiz ki, tarixi baxımdan 20 il o qədər də
böyük dövr deyildir. Lakin biz ötən illərə nəzər
salsaq, aydın olur ki, Azərbaycan qısa bir
zamanda çox böyük nailiyyətlər əldə edib.
Bu gün
Azərbaycan bölgənin ən sürətlə inkişaf edən
ölkəsidir. Cənubi Qafqaz dövlətlərinin ümumi
iqtisadiyyatının 75 faizi Azərbaycanın payına
düşür. Bu gün Avropa İttifaqı Azərbaycanı enerji
təhlükəsizliyi sahəsində strateji tərəfdaş kimi
tanıyır və Azərbaycan Avropanın neft və qazla
təminatında öz rolunu oynamağa hazırdır.
Ölkəmizin neft
və qaz kəmərləri, qeyri-neft sektorunun
yüksəlişi, yeni iri infrastruktur layihələri
inkişafımızı təmin edir.
Bu gün
Azərbaycanda sosialyönümlü siyasət aparılır.
2003-cü ildən bu günə qədər ölkəmizdə 900 mindən
çox yeni iş yeri açılıb, 2 mindən çox yeni
məktəb binası inşa olunub, yoxsulluğun səviyyəsi
49 faizdən 9 faizə enib. Paytaxtımızın və başqa
şəhərlərimizin yeni siması, ultramodern binalar,
yollar, körpülər, bərpa olunan və yeni tikilən
muzey və salınan parklar inkişafımızın
sübutudur.
Azərbaycanda
turizm sahəsi çox sürətlə inkişaf edir. Yalnız
bu il paytaxtımızda beşulduzlu 5 yeni hotelin
açılışı gözlənilir və bu da ölkəmizə ildən-ilə
artan marağın sübutudur. Əlbəttə, bizim əsas
varlığımız mədəni irsimizdir, Azərbaycanın qədim
xalçaçılıq məktəbi, nadir miniatürləri,
ədəbiyyatı və poeziyası, musiqisi, rəqsləri,
təsviri sənəti, memarlıq abidələridir.
Əziz qonaqlar,
mən xüsusi vurğulamaq istərdim ki, bütün bu
nailiyyətləri ölkəmiz Dağlıq Qarabağ münaqişəsi
kimi uzun sürən və hələ də həllini tapmamış
problemin mövcudluğu şəraitində əldə edib. Biz
əminik ki, gün gələcək və Azərbaycanın ərazi
bütövlüyü bərpa olunacaq, hər bir məcburi
köçkün, hər bir qaçqın öz doğma torpağına
qayıdacaqdır. Bizim hər bir nailiyyətimizin
arxasında Azərbaycan vətəndaşının zəkası,
biliyi, bacarığı, istedadı və əməyi durur.
Azərbaycan gələcəyə istiqamətlənən dövlətdir.
Biz böyük yolun əvvəlindəyik. Müstəqil və
dünyəvi dövlət olaraq, tariximizə və köklərimizə
sadiq olaraq, mədəniyyətimizi və ənənələrimizi
qoruyaraq biz ümumdünya dəyərlərinə, azadlıq,
demokratiya, aşkarlıq, dünya birliyinə
inteqrasiya yolunu seçmişik. Bu gün Azərbaycan
müstəqillik yubileyini Fransa kimi qədim
mədəniyyət və tarixə malik olan, müasir
demokratiyanın vətəni olan ölkədə qeyd edir.
Bunun böyük rəmzi mənası vardır.
Əziz dostlar,
sonda sizə ölkəmizə göstərdiyiniz dostluq
münasibətinə görə bir daha dərin minnətdarlığımı
bildirirəm. Fürsətdən istifadə edərək sizi
Azərbaycana dəvət edirəm. Əminəm ki, belə
görüşlər Fransa ilə Azərbaycanı ürəkdən keçən
tellərlə bağlayır.
Sizə
əmin-amanlıq, xoşbəxtlik və məhəbbət
arzulayıram. Diqqətinizə görə çox sağ olun.
***
Tədbirdə
ölkəmizin incəsənət ustaları maraqlı konsert
proqramı ilə çıxış etdilər. Xalq artisti Teymur
Göyçayevin dirijorluğu ilə Qara Qarayev adına
Azərbaycan Dövlət kamera orkestrinin ifasında
Üzeyir Hacıbəylinin "Koroğlu" operasının
uvertürası salona Azərbaycan ovqatı gətirdi.
Mərasimdə
Azərbaycan musiqisinin ən gözəl nümunələri
səsləndi, olduqca tələbkar auditoriyanı öz
sehrinə saldı. Şirzad Fətəliyevin balabanda
orkestrin müşayiətilə ifa etdiyi "Sən gəlməz
oldun" mahnısı, Üzeyir bəyin "Arşın mal alan"
musiqili komediyasına yazdığı uvertüra, Fikrət
Əmirovun bəstələdiyi əvəzsiz sənət əsərləri
Azərbaycan adlı məmləkətin sahib olduğu və
xalqımızın min illərdir qoruyub saxladığı
qiymətli xəzinəni Qərb tamaşaçısına uğurla
çatdırdı.
Dahi bəstəkar
Qara Qarayevin bəstələdiyi rəqs və İsfar
Sarabskinin ifa etdiyi "Novruz" caz
kompozisiyası, xanəndə Mirpaşa Şükürovun
ifasında "Qarabağ şikəstəsi" də mərasimə xüsusi
ovqat qatdı.
Son dərəcə
maraqlı konsert proqramı bir daha təsdiq etdi
ki, bu gün Azərbaycan mədəniyyətinin nadir
incilərinin sorağı mötəbər mərasimlərdən gəlir.
Bu da, ilk növbədə, Azərbaycan dövlətinin mədəni
irsimizə olan münasibətinin nəticəsidir. Təbii
ki, Heydər Əliyev Fondunun Azərbaycan
mədəniyyətinin təbliğində oynadığı rol da
əvəzolunmazdır. Elə bu mərasim də Fondun
prezidenti Mehriban Əliyevanın mədəni irsimizə
olan münasibətinin bariz nümunəsidir. Qara
Qarayevin "Vals"ı, Niyazinin "Arzu"su, "Küçələrə
su səpmişəm" məşhur xalq mahnısı, Natiq
Şirinovun "Azərbaycan ritmləri" bir daha
təsdiqlədi ki, Qərb tamaşaçısı son dərəcə
maraqlı koloriti olan, incə hisslərlə dolu bu
musiqini sevir. Azərbaycan musiqisinin ovsunu
istər-istəməz insanı öz təsiri altına salmağı
bacarır.
Ən nəhayət, bu
möhtəşəm gecənin yekununda Fikrət Əmirovun
dünyada məşhur "Min bir gecə" baletindən bir
parça ifa edildi. Bu sənət əsərləri Azərbaycan
musiqisinin zənginliyindən xəbər verdi, Fransa
mədəniyyətsevərlərində Azərbaycana, onun zəngin
musiqisinə böyük maraq oyatdı.
***
Sonra mərasim
iştirakçıları Azərbaycan sərgisinə baxdılar.
Sərginin ən əhəmiyyətli məqamı burada Qarabağ
xalılarının nümayiş etdirilməsi oldu. Ölkəmizin
ayrılmaz parçası olan Qarabağda toxunan xalılar
öz gözəlliyi, rəng çaları, ornamentlərin
quruluşu ilə tamaşaçıları heyran etdi. Bu
mədəniyyət nümunələri Qarabağın əzəli Azərbaycan
torpağı olduğunu bir daha təsdiqlədi, xalqımızın
sahib olduğu mədəni dəyərlərin zənginliyindən
xəbər verdi.
Xalçalarımıza
olan maraq təsdiqləmişdir ki, dünya
mədəniyyətinin inkişafına yetərincə təsir edən
Azərbaycan xalçaları tarix boyu öz gözəlliyi ilə
bütün dünyanı heyran qoymuşdur. İndi Azərbaycan
xalılarının sorağı ən məşhur saraylardan,
muzeylərdən gəlir. XVI əsrdə toxunan və Londonun
Viktoriya və Albert muzeyində qorunan "Şeyx
Səfi" xalısı ornamental xalçaların ən gözəl
nümunəsi kimi bu gün də Azərbaycan xalçaçılıq
məktəbini dünya miqyasında şərəflə təbliğ edir.
Sərgidə
nümayiş olunan qədim misgərlik məmulatları da
ölkəmizdə el sənətinə verilən dəyəri Avropa
tamaşaçısının diqqətinə çatdırdı.
Sərgi
çərçivəsində "Azərbaycan" kitabının fransız
dilində nəşr olunan versiyasının təqdimatı da
keçirildi. Heydər Əliyev Fondunun ən mühüm
layihələrindən olan "Azərbaycan" nəşrinin doğma
dilimizdə olan versiyası ötən ilin əvvəlində
Bakıda Prezident İlham Əliyevin və Azərbaycanın
birinci xanımı Mehriban Əliyevanın iştirakı ilə
təqdim olunmuşdur.
Nəşrə daxil
olan fotoşəkillər ölkəmizin tarixi, mədəniyyəti,
təbiəti, insan qaynaqları, bölgələrimiz haqqında
oxucuda kifayət qədər dolğun təəssürat yaradır,
Azərbaycanı, onun mavi Xəzərin sahilində qərar
tutmuş, Şərq və Qərb koloritlərinin cəmləndiyi
paytaxtını tərənnüm edir.
Qonaqlara
Azərbaycan milli mətbəxinin nümunələri təqdim
olundu.
Beləliklə,
Azərbaycan mədəniyyətinin Parisdə nümayişi,
sözün əsl mənasında, hadisəyə çevrildi.
Soydaşlarımızın arzu və istəklərinin əks
olunduğu bu mədəniyyət nümunələri xalqımızın
milli kimliyini, hər bir azərbaycanlının qəlb
döyüntüsünü Qərb tamaşaçısına uğurla çatdırdı.
Bu mədəniyyət nümunələri mərasimə gələn hər bir
kəsi xəyalən nağıllar aləminə, Azərbaycana
gətirdi.
AzərTAc |
