|
Bu günlərdə A.Aslanov adına İsmayıllı şəhər 2
nömrəli tam orta məktəbdə Azərbaycanın Milli
Qəhrəmanı Mübariz İbrahimovun anadan olmasının
23-cü ili münasibəti ilə anım mərasimi keçirilib.
Azərbaycanın Dövlət himni səsləndi. Qəhrəmanın
həyat və döyüş yoluna həsr olunmuş
videogörüntülər izlənildi.
Mərasimdə qəhrəmanlığı tərənnüm edən musiqilər
və şeirlər səsləndirildi. Məktəbin
şagirdləri-Xəyalə, Münasib, Gülnar, Aysel və
Əfsanə Milli Qəhrəman Mübarizə həsr olunan
şeirlərlə onun ən yüksək zirvədə - qəhrəmanlıq
zirvəsində olduğunu söylədilər. IX sinif şagirdi
Seymur Səmədzadə isə hərbi geyimdə Mübariz
İbrahimovun atasına və anasına yazdığı son
məktubunu oxudu.
Məktəbin müəllimi Sədaqət İsazadənin Milli
Qəhrəmana həsr etdiyi "Mübarizi düşünərkən"
şeiri öz emosionallığı ilə hamını duyğulandırdı.
Tədbirdə iştirak edən İsmayıllı Rayon Qarabağ
Müharibəsi Əlilləri, Veteranları və Şəhid
Ailələri İctimai Birliyinin, İsmayıllı RTŞ-ın,
YAP Rayon Təşkilatının məsul şəxsləri və
məktəbin direktoru Ramil Dadaşov çıxış edərək
Azərbaycan gənclərinə örnək olan Mübarizin
misilsiz qəhrəmanlığından danışdılar.
Sonda şagirdlər Milli Qəhrəmanın həyat və döyüş
yolundan bəhs edən guşənin önünə tər çiçək
dəstələri qoyaraq öz ehtiramlarını bildirdilər.
Qonaqlar Mübariz İbrahimova həsr olunmuş "Xatirə
kitabı"na ürək sözlərini yazdılar.
Eminə ORUCOVA,
A.Aslanov adına İsmayıllı şəhər
2 nömrəli tam orta məktəbin müəllimi |
