|
Dünya şöhrətli
müdrik siyasətçi, qüdrətli dövlət xadimi, böyük
mütəfəkkir Heydər Əliyevin 2011-ci il mayın
10-da anadan olmasının 88-ci ildönümü tamam olur.
Ulu öndər
Heydər Əliyevin adı bəşər tarixində müstəsna
xidmətlər göstərmiş sayılıb-seçilən ən məşhur və
nüfuzlu şəxsiyyətlərlə bir sırada çəkilir.
Azərbaycanın xalqımıza şərəf və başucalığı
gətirən müasir tarixinin zəfər salnaməsinin
yaradılmasında böyük rəhbərimizin ölçüyəgəlməz
xidmətləri danılmaz və unudulmaz həqiqətdir. O,
nəsillərin yaddaşında dövlət müstəqilliyimizin,
milli mənəvi və bəşəri dəyərlərə, xalqa,
dövlətçiliyə sadiqliyin, azərbaycançılıq
məfkurəsinin rəmzi, ölkəmizi tənəzzül və
vətəndaş müharibəsi təhlükəsindən azad edən
böyük xilaskar, Azərbaycanı beynəlxalq aləmdə
ali nüfuz məqamına yetirən dahi şəxsiyyət olaraq
əbədiyyət qazanmışdır.
İllər
bir-birini əvəz etdikcə Heydər Əliyev dühasının,
onun parlaq gələcəyə ünvanlanmış işıqlı
ideyalarının, dövlət quruculuğu və idarəetmə
məharətinin əzəməti daha aydın hiss olunmaqdadır.
Bu gün dünyanın siyasət aləmində Heydər Əliyev
fenomeni öyrənilməli və bəhrələnməli məktəb kimi
qəbul edilir.
Tarix ulu
öndərə şərəfli həyat və fəaliyyətinin bütün
dövrlərində möhtəşəm quruculuq, sosial-iqtisadi
inkişaf və ictimai-siyasi sabitliyin təminatçısı
olmaq səadətini bəxş etmişdir. Ümummilli
liderimizin Azərbaycanda siyasi hakimiyyətə
yüksəlişinin hər iki dövrü məhz tarixi
zərurətdən irəli gələn həmin xoşməramlı
missiyalara parlaq sübutdur.
Təhsilə,
təhsil işçilərinə müntəzəm diqqət və qayğı
Azərbaycana rəhbərlik etdiyi bütün illərdə ulu
öndərin çoxsahəli və genişmiqyaslı fəaliyyətində
prioritet istiqamət olmuşdur. Müstəqillik
dövründə ölkəmizdə novator və innovativ ruhlu
təhsil siyasəti ilə müşayiət olunan islahatlara
başlanması, inkişafyönümlü Dövlət proqramlarının
qəbul edilməsi, ümumtəhsil məktəb şagirdlərinin
dərsliklərlə pulsuz təmin olunması bilavasitə
ümummilli liderimizin adı ilə bağlıdır.
Bu gün hər bir
Azərbaycan vətəndaşının, dünyanın müxtəlif
ölkələrində yaşayan hər bir azərbaycanlının
qəlbində Heydər Əliyev işığının sönməz zərrəsi
şölələnir. Heydər Əliyev yolunu özünə həyat
idealı seçmiş indiki nəsil, ilk növbədə, təhsil
işçiləri gələcəyimiz hesab edilən müasir
gənclərin ümummilli liderimizin nümunəsində
tərbiyə olunmasını, onun zəngin irsinin dərindən
öyrənilməsini təmin etməli, bu şərəfli işin
yerinə yetirilməsinə Vətən və xalq qarşısında
müqəddəs vəzifə kimi münasibət bəsləməlidirlər.
Qeyd
edilənlərin tarixi zərurət olduğunu nəzərə
alaraq
ƏMR EDİRƏM:
1. Naxçıvan MR
Təhsil Nazirliyi, Bakı Şəhəri üzrə Təhsil
İdarəsi, Gəncə Şəhər Təhsil İdarəsi, rayon (şəhər)
təhsil şöbələri, texniki peşə, ali və orta
ixtisas təhsili müəssisələrinin, Təhsil
Nazirliyi nəzdindəki ümumi təhsil
müəssisələrinin rəhbərləri 2011-ci il fevral
ayından başlayaraq ümummilli lider Heydər
Əliyevin anadan olmasının 88-ci ildönümü
münasibətilə xüsusi tədbirlər müəyyənləşdirib
həyata keçirilməsini təmin etsinlər.
2.
Respublikanın ümumtəhsil məktəblərinin VII-XI
sinif şagirdlərinin və ilk peşə-ixtisas təhsili
müəssisələri şagirdlərinin iştirakı ilə ulu
öndər Heydər Əliyevin zəngin həyat və
fəaliyyətinə həsr olunmuş inşa yazı müsabiqəsi
keçirilsin. Müsabiqənin məktəb və rayon (şəhər)
mərhələləri aprel ayının 10-dək yekunlaşdırılsın.
3. İnşa
müsabiqəsinin yekun mərhələsi Təhsil
Nazirliyinin müəyyən etdiyi vaxtda Bakı
şəhərində keçirilsin.
4. Müsabiqənin
yekun mərhələsinin iştirakçıları üçün aşağıdakı
qaydada kvota müəyyənləşdirilsin:
4.1.
Ümumtəhsil məktəbləri üzrə - hər rayon və
şəhərdən 1 (bir) nəfər.
4.2. Təhsil
Nazirliyi nəzdindəki ümumi təhsil müəssisələri
üzrə - 5 (beş) nəfər.
4.3. İlk
peşə-ixtisas təhsili müəssisələri üzrə - 10 (on)
nəfər.
5. Naxçıvan
Muxtar Respublikasında bu əmrdə qeyd olunan
tədbirlərin müəyyən edilən müddətlərdə Naxçıvan
MR Təhsil Nazirliyi və digər aidiyyəti təhsil
müəssisələri tərəfindən müstəqil yerinə
yetirilib yekunlaşdırılması məqsədəuyğun hesab
edilsin.
6. İlk
peşə-ixtisas təhsili müəssisələri və Təhsil
Nazirliyi nəzdindəki ümumi təhsil müəssisələri
şagirdlərinin inşa yazılarının nəzərdən
keçirilərək yekun mərhələdə iştirak üçün
qaliblərin müəyyənləşdirilməsi işinin təşkili
Təhsil Nazirliyi Aparatının rəhbəri
İ.Pirməmmədova həvalə olunsun.
7. Kənd
rayonları üzrə ümumi təhsil şöbəsi (A.Əhmədov)
inşa yazı müsabiqəsinin yekun mərhələsinin
səmərəli təşkili, başa çatdırılması, qaliblərin
müəyyənləşdirilməsi məqsədilə lazımi tədbirlər
görsün, ən yaxşı inşaların toplu şəklində nəşr
olunması üçün İqtisadiyyat şöbəsi (Ş.Əliyev) və
Dərslik və nəşriyyat şöbəsi (F.Şahbazlı) birgə
təkliflər hazırlasınlar.
8. Ali və orta
ixtisas təhsili şöbəsi (İ.Mustafayev), Elm
şöbəsi (G.Hüseynova) 2011-ci ilin fevralından
etibarən ali və orta ixtisas təhsili
müəssisələrinin rəhbərləri ilə birlikdə
ümummilli lider Heydər Əliyevin elm, təhsil və
iqtisadiyyatın inkişafı sahəsində genişmiqyaslı
fəaliyyətinə həsr olunmuş elmi-praktik konfrans,
"dəyirmi masa" və seminarların keçirilməsi üzrə
lazımi tədbirlər görsünlər.
9. Tərbiyə və
məktəbdənkənar müəssisələrlə iş şöbəsi (A.İbrahimov)
2011-ci ilin fevral-aprel aylarında ümumtəhsil
məktəbləri şagirdlərinin iştirakı ilə "Heydər
Əliyev və müstəqil Azərbaycan" mövzusunda rəsm
müsabiqəsi və sərgisinin, habelə müxtəlif növlər
üzrə idman turnirlərinin keçirilməsini təmin
etsin.
10.
İctimaiyyətlə əlaqə şöbəsi (B.Hüseynzadə) əmrin
"Azərbaycan müəllimi" qəzetində və "Təhsil
xəbərləri" məcmuəsində dərc olunmasını təmin
etsin.
11. Əmrin
icrasına nəzarəti öz üzərimdə saxlayıram.
Misir MƏRDANOV,
Azərbaycan Respublikasının təhsil naziri
25 yanvar 2011-ci il |
