|
 Ulyanovsk
vilayətinin qubernatoru Sergey Morozov
AzərTAc-ın müxbirinə eksklüziv müsahibəsində
demişdir: "Azərbaycanla bizim çox səmimi
münasibətlərimiz vardır. Biz xalqınızın
ümummilli lideri Heydər Əliyevi yaxşı
xatırlayırıq və ən çətin vaxtda - hələ 1983-cü
ildə çoxlu sayda insanın həlak olması ilə
üzləşdiyimiz bir dövrdə buraya gəldiyinə və
bizim bu bəladan tezliklə yaxa qurtarmağımıza
kömək etdiyinə görə ona ürəkdən minnətdarıq. Biz
keçən il onun şərəfinə iki prezidentin - Dmitri
Medvedevin və İlham Əliyevin iştirakı ilə
şəhərimizdə Heydər Əliyev meydanı açdıq".
Sergey Morozov
demişdir: "Biz Azərbaycanın indiki Prezidentinin
xanımı Mehriban Əliyevaya da ürəkdən
minnətdarıq. O, keçən il 1 sentyabr ərəfəsində
Ulyanovsk şəhərinin ən gözəl məktəblərindən
birinin bərpasında bizə kömək etmişdir. Bu
məktəb ən müasir texnika ilə tam həcmdə təchiz
edilmişdir. Məktəb praktiki olaraq yenidən
tikilmiş, orada çox gözəl bir muzey
yaradılmışdır. Bu muzeyə müxtəlif millətləri
təmsil edən çoxlu sayda insan gəlir. Hesab
edirəm ki, bizim yaxşı perspektivləri olan
kifayət qədər mehriban münasibətlərimiz vardır.
Heydər Əliyev Fondunun vitse-prezidenti Leyla
Əliyevanın da Ulyanovska gəldiyinə görə biz ona
səmimi təşəkkür edirik. Burada həm məktəbin
abadlaşdırılması ilə, həm də Azərbaycan
milli-mədəni muxtariyyətindən olan azərbaycanlı
uşaqlara yardım göstərilməsi ilə əlaqədar bir
neçə layihəmiz vardır".
Qubernator
nəzərdə tutulan müştərək layihələr haqqında
sualı şərh edərkən bildirmişdir ki, Leyla
Əliyevanın Ulyanovska səfərinin gedişində bir
neçə layihənin həyata keçirilməsi məsələsi
müzakirə edilmişdir. O demişdir: "Lakin biz indi
həmin layihələr barədə danışmayacağıq. Bunun
səbəbi çox sadədir - həmin layihələr hələlik
rəsmən elan edilməmişdir. Lakin bu gün
Ulyanovskın MDB məkanında mədəni hadisələr
marafonunun keçiriləcəyi ərazi kimi tanınması
çox cəhətdən sizin dövlətinizin sayəsində mümkün
olmuşdur. Ona görə ki, Azərbaycan səfiri Polad
Bülbüloğlu vilayətimizin MDB məkanında mədəni
tədbirlər keçirilməsi üçün əsas mərkəzə
çevrilməsinə çox fəal kömək etmişdir".
Sergey Morozov
Ulyanovsk vilayətinin iqtisadi potensialının
Azərbaycanın Moskvadakı səfirliyində
təqdimatının praktiki davamı olub-olmaması
barədə sualın cavabında demişdir: "Bir şeyi deyə
bilərəm, Rusiya Federasiyasının iqtisadiyyatına
Azərbaycan Respublikası tərəfindən sərmayə
qoyuluşunun nisbi payına görə biz Rusiyada ən
birincilər sırasındayıq". |
