|
Yanvarın
15-də Təhsil Nazirliyində Ümumi şöbənin və
Təsərrüfathesablı Əsaslı Tikinti İdarəsinin
2010-cu ildə görülmüş işlərə dair hesabatları
dinlənildi.
 Ümumi
şöbənin müdir müavini Hicran Məmmədova şöbənin
əsas fəaliyyət istiqamətləri, strukturu,
əməkdaşlar arasında vəzifə bölgüsü haqqında
məlumat verdi. Sonra ötən il ərzində görülən
işlər diqqətə çatdırıldı.
Qeyd olundu
ki, 2010-cu ildə Təhsil Nazirliyinə ümumilikdə
51552 sənəd daxil olmuşdur. Onların 23600-ü
ərizə və şikayət, 27952-si məktubdur. Təqdimatda
ərizələrin təşkilatlar üzrə bölgüsü, struktur
bölmələr üzrə paylanması, şəhər və rayonlar üzrə
daxilolma göstəriciləri, 2010-cu ildə icra
olunan nəzarət xarakterli məktublar və s.
haqqında məlumatları əks etdirən slaydlar
nümayiş etdirildi.
Hesabat
dövründə vətəndaşların qəbulu vəziyyətindən
danışan H.Məmmədova bildirdi ki, ötən il
nazirlikdə 7251 nəfər qəbul edilmiş, 4758
müraciət cavablandırılmışdır.
Ümumi
şöbənin müdir müavini daha sonra mövcud
problemlərdən söz açdı və 2011-ci ildə qarşıda
duran vəzifələri diqqətə çatdırdı.
Sonra
Təhsil Nazirliyinin Təsərrüfathesablı Əsaslı
Tikinti İdarəsinin rəisi Allahverdi Dəmirovun
hesabatı təqdim olundu. Çıxışda Nazirlər
Kabinetinin 5 may 2004-cü il qərarı ilə
yaradılmış idarənin əsas vəzifələri diqqətə
çatdırıldı.
Hesabatdan
aydın oldu ki, ötən il 27 yeni məktəb və 1
məktəbdə 840 şagird yerlik əlavə korpus tikilib
istifadəyə verilmiş, 7 tədris müəssisəsində
bərpa-gücləndirmə və əsaslı təmir işləri
aparılmışdır. Ümumtəhsil məktəblərinin və uşaq
bağçalarının təmiri və yenidən qurulması işləri
üçün 20,65 milyon manat vəsait ayrılmış, 388
obyekt, o cümlədən 356 məktəb və 32 uşaq bağçası
təmir edilmişdir. Respublika üzrə 2011-ci ildə
təhvil veriləcək 24 yeni məktəbin və 1 məktəbdə
560 şagird yerlik korpusun tikintisinə
başlanmışdır və s.
Təqdimatda
ümumtəhsil məktəblərinin tədris avadanlıqları
ilə təminatı, məktəbəqədər təhsilin
yeniləşdirilməsi, şahmatın və texniki peşə
təhsilinin inkişafı ilə bağlı Dövlət Proqramları
çərçivəsində görülmüş işlər barədə də ətraflı
məlumat verildi.
Yanvarın
17-də Nazirlik Aparatının hesabatı dinlənildi.
Təhsil Nazirliyi Aparatının rəhbəri İlham
Pirməmmədov öncə əsas fəaliyyət istiqamətləri,
struktur, əməkdaşların vəzifə bölgüsü haqqında
məlumat verdi.
İ.Pirməmmədov görülən işlərlə bağlı bildirdi ki,
hesabat ili ərzində Təhsil Qanununa uyğun olaraq
40-a yaxın normativ-hüquqi sənədin layihəsinin
hazırlanması, müzakirəsi və digər aidiyyəti
nazirliklərlə razılaşdırılması təşkil
olunmuşdur. Prezident Aparatından 30-a yaxın,
Nazirlər Kabinetindən isə 70-ə yaxın sənədin
digər şöbələrlə birlikdə icrası təşkil olunmuş
və icranın nəticəsi barədə müvafiq qurumlara
məlumat verilmişdir. Ötən il Təhsil Nazirliyinin
6 kollegiya iclası keçirilmişdir. Aparatın
əməkdaşları vətəndaşların qəbulunun təşkilində
yaxından iştirak etmiş, nəticədə 3500-ə yaxın
vətəndaşın məsələsi həll olunmuş, digərlərinə
isə müvafiq izahat verilmişdir.
Təqdimatda
daha sonra özəl təhsil müəssisələrində vahid
dövlət siyasətinin həyata keçirilməsinə və
təhsil qanunvericiliyinin icrasına nəzarət,
saxta təhsil sənədlərinin aşkar olunması və
onların mövcud qaydada ləğvi, müxtəlif tender
prosedurlarının təşkili və icrasına nəzarət,
"Təhsil tarixi" kitabının yazılması və
"Azərbaycan milli maarifinin korifeyləri"
layihəsinin icrası istiqamətlərində görülən
işlərdən bəhs olundu.
Məruzəçi
2011-ci ildə işlərin hesabatın əvvəlində
göstərilən əsas fəaliyyət istiqamətlərinə uyğun
davam etdiriləcəyini qeyd etdi.
Həmin
iclasda daha sonra Təhsil sənədlərinin tanınması
işi üzrə, Hüquq, Məktəbəqədər təhsil sektorları
və Xüsusi şöbənin illik fəaliyyətlərinə dair
hesabatlar təqdim olundu. İlham Pirməmmədov
həmin təqdimatlarda diplomların tanınması ilə
bağlı ümumi vəziyyət, 2010-cu ildə təhsil
sənədlərinin uçotu, məktəbəqədər təhsil
sektorunun əsas vəzifələri, funksiyaları və s.
haqqında ətraflı məlumat verdi. Qeyd olundu ki,
il ərzində 4 yeni uşaq bağçası inşa edilmiş,
6-sı əsaslı təmir olunmuş, 32 müəssisədə cari
təmir işləri aparılmışdır. Təhsil Nazirliyinin
sifarişinə əsasən "Şərq-Qərb" ASC tərəfindən 39
adda müxtəlif təlim vəsaitləri hazırlanaraq
ölkənin bütün məktəbəqədər təhsil müəssisələrinə
paylanmışdır.
Yanvarın
18-də Təhsil Nazirliyinin İctimaiyyətlə əlaqə
şöbəsinin və Bakı Şəhəri üzrə Təhsil İdarəsinin
hesabatları dinlənildi.
İctimaiyyətlə əlaqə şöbəsinin müdiri Bayram
Hüseynzadə təqdimatında öncə şöbənin yaranma
tarixi, strukturu, əsas vəzifələri, fəaliyyət
istiqamətləri və əməkdaşların vəzifə bölgüsü
haqqında məlumat verdi.
Görülən
işlərdən söz açan şöbə müdiri ötən il 200-ə
yaxın tədbirdə media nümayəndələrinin
iştirakının təmin olunduğunu, mətbuat
konfranslarının keçirildiyini, nazirliyin 30-dan
çox əməkdaşının, tanınmış təhsil
mütəxəssislərinin, beynəlxalq məsləhətçilərin
müxtəlif televiziya və radio verilişlərində
iştirak etdiyini, onların 450-yə yaxın
müsahibəsinin təşkil olunduğunu, rəsmi məlumat,
press-reliz və təqdimatların kütləvi informasiya
vasitələrinə çatdırıldığını və s. diqqətə
çatdırdı. Hesabatda daha sonra Təhsil Nazirliyi
və Mətbuat Şurasının 2010-cu ildə imzaladığı
KİV-lə əməkdaşlığın daha da təkmilləşdirilməsinə
dair Fəaliyyət Planına əsasən həyata keçirilən
tədbirlərlə bağlı ətraflı məlumat verildi.
Çıxışında jurnalistlər arasında keçirilən
yazı-müsabiqəsi, Təhsil Sektorunun İnkişafı üzrə
İkinci Layihə çərçivəsində görülmüş işlər,
Təhsil Nazirliyinin rəsmi İnternet saytından
bəhs edən B.Hüseynzadə nəinki ölkəmizdə, hətta
xarici ölkələrdə də bu sayta böyük maraq
göstərildiyini vurğuladı və saytın "Milli
Net-2010" müsabiqəsinin qalibi olduğunu
xatırlatdı. Şöbə müdiri "Azərbaycan müəllimi"
qəzetində son illər edilən dəyişikliklər
haqqında məlumat verdi və rəhbərlik etdiyi
qəzetin yeni İnternet saytının istifadəyə
verildiyini, bu mətbu orqanının çapa
hazırlanmasında İKT-nin imkanlarından geniş
istifadə olunduğunu bildirdi.
Yanvarın
19-da Təhsil Problemləri İnstitutu və Bakı
Pedaqoji Kadrların İxtisasartırma və
Yenidənhazırlanma İnstitutunun hesabatları
dinlənildi. Öncə çıxış edən TPİ-nin direktoru,
professor Abdulla Mehrabov müəssisənin yaranma
tarixindən danışdı və qarşıya qoyulan əsas
vəzifələri diqqətə çatdırdı.
Təqdimatda
institutda fəaliyyət göstərən mərkəzlər, bu
mərkəzlərin hər birinin strukturu və tədqiqat
istiqamətləri haqqında ətraflı məlumat verildi.
Hesabatdan
aydın oldu ki, 2010-cu ildə institutda 13
problem sahəni əhatə edən 71 mövzu üzrə
araşdırmalar aparılmış, onlardan 4 problem
sahəni əhatə edən 8 mövzu üzrə işlər
tamamlanmış, bu işlərin hamısının nəticələri
ümumiləşdirilərək tətbiq üçün təhsil
müəssisələrinə göndərilmişdir. TPİ-də çalışan
224 nəfərdən 167-si elmi işçidir. Onlardan 17
nəfəri elmlər doktoru, professor, 56 nəfəri
pedaqogika və psixologiya üzrə fəlsəfə doktoru,
95 nəfəri yüksək ixtisaslı mütəxəssisdir.
TPİ-nin
direktoru hesabat ili ərzində institutun
əməkdaşları tərəfindən aparılan tədqiqat
işlərinin nəticələri əsasında çox sayda
monoqrafiya, dərslik və əsər nəşr olunduğunu
bildirdi.
Hesabatın
sonunda 2010-cu ildə instituta daxil olmuş
məktublar və ərizələr haqqında məlumat verildi.
Sonra Bakı
Pedaqoji Kadrların İxtisasartırma və
Yenidənhazırlanma İnstitutunun rektoru,
professor Asəf Zamanov 2010-cu ildə görülən
işlərə dair hesabatla çıxış etdi.
Təqdimatda
institutun strukturu, professor-müəllim heyəti,
fəaliyyət istiqamətləri, digər təşkilat və
qurumlarla əməkdaşlıq əlaqələri haqqında məlumat
verildi.
Hesabatdan
aydın oldu ki, ötən il institutun Elmi Şurasının
11 iclası keçirilmişdir. "İKT-nin köməyi ilə
tədris prosesinin təşkili" mövzusunda keçirilən
kurslara, ümumilikdə 726 müdavim cəlb olunmuş,
onlardan 611 nəfəri kursları uğurla bitirmiş və
müvafiq sertifikatla təmin olunmuşdur.
Beynəlxalq əlaqələrdən söz açan A.Zamanov
diqqətə çatdırdı ki, institut Fransanın
Beynəlxalq Pedaqoji Tədqiqatlar Mərkəzi,
Parisdəki Texniki İncəsənət Konservatoriyası,
Versalda fəaliyyət göstərən Fransa Milli Təhsil
Menecerləri Kolleci, Volqoqrad Təhsil
İşçilərinin İxtisasartırma və Yenidənhazırlanma
Akademiyası və Latviyanın Sosial İş və Sosial
Pedaqogika ali məktəbi ilə əməkdaşlıq edir.
Qeyd olundu
ki, aparılmış müzakirələrin nəticəsi olaraq
2010-cu ildə Qazaxıstan Elm və Təhsil
Nazirliyinin Milli Akkreditasiya Mərkəzi ilə
əməkdaşlığa dair müqavilə imzalanmışdır. Hazırda
Qazaxıstan Respublika İxtisasartırma İnstitutu
ilə əməkdaşlığa dair hazırlıq işləri görülür.
Təqdimatda
daha sonra elmi konfranslar, tədbirlər,
institutun mətbu orqanları, nəşrlər,
kitabxananın fəaliyyəti və s. məsələlərdən bəhs
olundu və 2011-ci ildə görüləcək işlər diqqətə
çatdırıldı.
İclasın
sonunda təhsil naziri Misir Mərdanov ayın
əvvəlindən başlayaraq verilən hesabatların artıq
başa çatdığını qeyd edərək bu işin nazirliyin
struktur bölmələrinin gələcək fəaliyyətinə
müsbət təsir göstərəcəyinə inandığını bildirdi.
Hicran ƏKBƏROVA |
