|
Azərbaycan Dövlət Aqrar Universitetinin bir qrup
əməkdaşı Türkiyənin Frat Universiteti ilə
əlaqələr qurmaq məqsədi ilə qardaş ölkədə
olmuşdur.
Səfər zamanı Azərbaycan alimləri Frat
Universitetində müxtəlif fakültələrdə
məşğələlərdə iştirak etmiş və fikir mübadiləsi
aparmışlar. Onlara məlumat verilmişdir ki,
1975-ci ildən fəaliyyət göstərən, Türkiyənin
zəngin elmi bazaya malik bu universitetində
balıqçılıq üzrə də mütəxəssislər hazırlanır.
Qonaqlar balıqçılıq fakültəsində, həmçinin bu
fakültənin tədris-təcrübə sahəsində olmuşlar.
Nümayəndə heyətinin rəhbəri, Azərbaycan Dövlət
Aqrar Universitetinin elmi katibi Səbuhi
Məmmədov AzərTAc-a bildirmişdir ki, ikitərəfli
əlaqələr çərçivəsində bir çox sahələr, o
cümlədən elmi əməkdaşlıq və tələbə mübadiləsi
ilə bağlı işgüzar danışıqlar aparılmışdır.
Hər iki universitet arasında əlaqələrin
qurulması üçün niyyət protokolunun imzalanmasına
hazırlıq işlərinə başlanılmışdır. Xüsusilə
Azərbaycan Dövlət Aqrar Universitetində balıqçı
mütəxəssislərin hazırlanmasında Frat
Universitetinin iş təcrübəsinin öyrənilməsi
diqqət mərkəzində saxlanılacaqdır. |
