|
Xüsusi qayğıya ehtiyacı olan uşaqlar üçün
reallaşdırılan və məsafələri qısaldan layihə
onlara yaşıdları arasında təmas imkanı
yaratmaqla yanaşı, bir çox üstünlükləri ilə də
seçilir. "Nobel-T" MMC-nin direktoru Salam
Əliyev bildirib ki, bu layihə "Azərbaycan
Respublikasında təhsil sisteminin
informasiyalaşdırılması üzrə Dövlət Proqramı
(2008-2012-ci illər)" çərçivəsində həyata
keçirilir. Layihə xüsusi qayğıya ehtiyacı olan
məktəbyaşlı uşaqların təhsilə maraqlarının daha
da artırılması, valideynlərinin övladlarının
təhsilində rolunun müəyyən edilməsi, uşaqların
psixoloji vəziyyətinin yaxşılaşdırılması
məqsədi daşıyır. Layihənin həyata keçirilməsi
üçün Bakıdakı 219 nömrəli evdə məktəbi, bu
məktəbin 30 nəfər xüsusi qayğıya ehtiyacı olan
şagirddən təşkil olunmuş 7-ci sinfi və sinifdə
dərs deyəcək yüksək elmi-pedaqoji təcrübəyə
malik müəllim heyəti cəlb olunub.
"Nobel-T" müəssisəsinin əməkdaşları və
psixoloqları layihədə iştirak edən 30 nəfər
qayğıya ehtiyacı olan şagirdin hər biri ilə
fərdi qaydada görüşüb, onların fiziki-psixoloji
vəziyyəti, ev və təhsilalma şəraiti ilə
yaxından tanış olublar. Layihə çərçivəsində
"Müasir məktəb" adlı İnternet portalının
yaradılması, uşaqlar arasında xüsusi istedada
malik olanların müəyyən edilməsi, təhsilin bu
səviyyəsi üzrə yüksək ixtisaslı müəllimlərin
hazırlanması da nəzərdə tutulub. "Nobel-T"
MMC-nin tərkibində "Məsafədən tədris" mərkəzi
yaradılmışdır. Bu mərkəzdə 3 bölmə -metodoloji
tədris bölməsi, psixoloji-pedaqoji təhsilin
fəaliyyəti bölməsi və məsafədən təhsilin
elmi-texniki bölməsi fəaliyyət göstərir.
Layihənin İnternet portalı "Elektron
Təlimləndirən Sistemlər"in davamlı və uğurlu
inkişafı üçün nəzərdə tutulub. Burada mütəmadi
olaraq müəllim və şagirdlərin interaktiv təlim
metodlarına əsaslanan elektron dərs vəsaitləri,
hazırladıqları təqdimatlar, əl işləri
yerləşdiriləcək, ən yaxşı işlər, fəal müəllim və
şagirdlər layiqincə qiymətləndiriləcək.
Sifai SƏFƏROVA |
|
