|
Paytaxtın ümumtəhsil məktəblərində vahid
məktəbli formasının seçimi ilə bağlı yekun qərar
qəbul edilib. Həmin qərara əsasən, 2011-2012-ci
tədris ilindən VII-XI sinif şagirdləri də vahid
məktəbli formasına keçəcək. Beləliklə, I-VI və
VII-XI siniflərin şagirdləri üçün eyni olmaqla
iki formada vahid məktəbli geyimi tətbiq
olunacaq.
 Bu
barədə yanvarın 12-də Bakı Şəhəri üzrə Təhsil
İdarəsində keçirilən mətbuat konfransında
məlumat verildi və formalar nümayiş etdirildi.
İdarənin Beynəlxalq və ictimaiyyətlə əlaqələr
sektorunun təşkil etdiyi konfransda məktəbli
formalarının seçim prosesini reallaşdıran Milli
Valideyn-Müəllim Assosiasiyasının icraçı
direktoru Təranə Şərifova və həmin qurumun İdarə
Heyətinin üzvləri, məktəbli formalarını istehsal
edən Bakı Tikiş Evi İdarə Heyətinin sədri Fədai
Rəhimov və müəssisənin bir qrup əməkdaşı,
valideynlər və şagirdlər iştirak edirdilər.
Mətbuat konfransını açan Bakı Şəhə
ri üzrə Təhsil İdarəsi Beynəlxalq və
ictimaiyyətlə əlaqələr sektorunun müdiri Zəminə
Əliqızı öncə vahid məktəbli formasının tətbiqi
istiqamətində son illər aparılan işlər barədə
məlumat verdi. Bildirdi ki, paytaxtın ümumtəhsil
müəssisələrində məktəbli formasının tətbiqinə
2007-2008-ci tədris ilindən başlanmış və uzun
illər məktəbə sərbəst geyimlə gələn şagirdlərin
məktəbli formasına psixoloji baxımdan
uyğunlaşması üçün bu prosesin 3 mərhələdə həyata
keçirilməsi planlaşdırılmışdı. İlkin mərhələdə
məktəbli formasının hər bir məktəb üzrə
seçilməsi və tətbiqi nəzərdə tutulurdu. Lakin
2010-2011-ci tədris ili bu prosesə keçidin
ikinci əsas mərhələsinin başlanğıcı elan olundu
və vahid məktəbli formasının tətbiqinə qərar
verildi. Beləliklə, cari tədris ilinin ilk
günlərindən başlayaraq Bakının bütün
məktəblərinin I-IV sinif şagirdləri vahid
məktəbli formasına keçməyə başladılar. Bununla
əlaqədar ötən ilin noyabr-dekabr aylarında Bakı
Şəhəri üzrə Təhsil İdarəsi tərəfindən paytaxtın
ümumtəhsil məktəblərində aparılan monitorinqlər
göstərdi ki, I-IV sinif şagirdlərinin 90 faizi
artıq vahid məktəbli geyiminə keçiblər.
Z.Əliqızı vahid məktəbli geyiminə keçid
prosesində Azərbaycan Milli Valideyn-Müəllim
Assosiasiyasının böyük rolu olduğunu xüsusi qeyd
edib, onun köməyi ilə valideynlərin,
müəllimlərin və şagirdlərin seçimdə yaxından
iştirak etdiklərini bildirdi. Diqqətə çatdırdı
ki, 2011-2012-ci tədris ilindən başlayaraq
paytaxt məktəblərində I-VI siniflərlə yanaşı
VII-XI siniflərin vahid geyim formasına keçməsi
də məhz Assosiasiyanın gəldiyi qərara əsasən
tətbiq olunur.
Mətbuat konfransında çıxış edən Milli VMA-nın
icraçı direktoru Təranə Şərifova I-IV
siniflərin hazırda istifadə etdikləri məktəbli
formasının V-VI sinif şagirdlərinə də şamil
olunması, VII-XI sinif şagirdləri üçünsə fərqli
formanın tətbiqi barədəki qərarlarını bunun
iqtisadi baxımdan valideynlər üçün daha sərfəli
olması, məktəblərdə çox rəngarəngliyin
yaranmaması ilə əlaqələndirdi və həmin qərarın
qəbulunda, məktəbli formalarının rənglərinin və
modellərinin müəyyənləşdirilməsində
valideynlərin, müəllim və şagirdlərin yaxından
iştirak etdiklərini bildirdi.
Bakı Tikiş Evi İdarə Heyətinin sədri Fədai
Rəhimov da konfransda çıxış edərək
müəssisələrinin fəaliyyəti, məktəbli forması
üçün parçaların, modellərin seçilməsi
istiqamətində aparılan işlər barədə məlumat
verdi, formalar üçün parça və modellər
müəyyənləşdirilərkən şagirdlərin zövqünün və
sağlamlığının nəzərə alındığını, onların
keyfiyyət sertifikatları olduğunu, məktəbli
formalarının iqtisadi baxımdan valideynlərin
imkanlarına uyğun olmasına çalışıldığını
söylədi.
Konfransda Bakının müxtəlif təhsil
müəssisələrindən dəvət edilmiş məktəblilər V-VI
və VII-XI sinif şagirdləri üçün nəzərdə tutulmuş
vahid geyim formalarını nümayiş etdirdilər.
Tədbirdə habelə vahid məktəbli formasının qış və
yay geyimləri olmaqla iki formada hazırlandığı
da qeyd edildi və onların qiymətləri açıqlandı.
Bildirildi ki, ölçülərindən asılı olaraq
qiymətlər 35-55 manat arasında dəyişir.
Mətbuat konfransında jurnalistləri maraqlandıran
suallar cavablandırıldı.
Yusif ƏLİYEV |
