|
Şərur rayonunun müasir məktəbləri sırasına biri
də əlavə olunmuşdur. Zeyvə kəndində 612 yerlik
yeni məktəb binası istifadəyə verilmişdir.
 Bu
münasibətlə keçirilən mərasimdə məktəbin
müəllimi Xeyrənsə Əsgərova demişdir ki,
istifadəyə verilən məktəb binası 31 dekabr-
Dünya Azərbaycanlılarının Həmrəylik Günü və Yeni
il bayramı ərəfəsində pedaqoji kollektivə,
şagirdlərə ən qiymətli hədiyyədir. Ulu öndərimiz
Heydər Əliyevin təhsilə qayğı siyasəti muxtar
respublikada əzmlə və yaradıcılıqla davam
etdirilir. Təkcə 2010-cu ildə Şərur rayonunda
iki yeni məktəb binası istifadəyə verilmişdir.
Naxçıvan Muxtar Respublikası Ali Məclisinin
sədri Vasif Talıbov məktəb binasının istifadəyə
verilməsi münasibətilə kollektivi təbrik etmiş,
müəllimlərə pedaqoji fəaliyyətlərində uğurlar
arzulamışdır. Natiq demişdir: "Zeyvə kəndi
muxtar respublikanın abad yaşayış məntəqələri
sırasına daxil olmuşdur. Ötən illər ərzində
burada icra nümayəndəliyi, bələdiyyə yaradılmış,
kəndin sosial problemləri həll edilmiş, həkim
ambulatoriyası üçün yeni bina istifadəyə
verilmiş, kənd mərkəzi, ticarət mərkəzi
tikilmiş, 2,5 kilometrlik kəndarası yola asfalt
salınmış, artezian quyusu qazılmış və digər
tədbirlər həyata keçirilmişdir.
Kənd orta məktəbinin nailiyyətləri də
qənaətbəxşdir. Belə ki, 2009-2010-cu tədris
ilində məktəbin 35 məzunundan 7-si ali
məktəblərə daxil olmuşdur. Onların 3-ü 500-700
arası bal toplamışdır. Orta və əsas təhsil
bazasından 3 məzun orta ixtisas məktəblərinə, 3
şagird isə Heydər Əliyev adına Hərbi Liseyə
qəbul olunmuşdur. Bundan başqa, məktəbin bir
müəllimi "Ən yaxşı müəllim" adına layiq
görülmüşdür.
Ali Məclisin sədri ulu öndərimiz Heydər Əliyevin
bu sözlərini xatırlatmışdır: "Cəmiyyət haradan
olursa-olsun, nədən olursa-olsun kəsib təhsilə
xərcləməli, gənc nəslin təhsilinə, müəllimə
kömək etməlidir". Ümummilli liderimizin yolunun
uğurla davam etdirilməsinin nəticəsidir ki,
ölkəmiz müharibə vəziyyətində yaşasa da, qaçqın
və məcburi köçkünlərimiz olsa da, təhsilə yüksək
diqqət göstərilir. Məktəblər tikilir, onlar
müasir avadanlıqla təchiz olunur. Müəllimlər
yaradılmış şəraitdən düzgün istifadə edərək
nailiyyətləri daha da artırmalı, məktəbin muxtar
respublikamızın nümunəvi məktəbləri sırasındakı
yerini möhkəmləndirməlidirlər.
V.Talıbov tədbir iştirakçılarını Dünya
Azərbaycanlılarının Həmrəylik Günü və Yeni il
bayramı münasibəti ilə təbrik etmiş, onlara
uğurlar arzulamışdır.
Açılışı bildirən rəmzi lent kəsildikdən sonra
yeni məktəb binasına baxış olmuşdur.
Üçmərtəbəli məktəb binasında 34 sinif otağı,
kimya-biologiya kabineti, 2 elektron lövhəli
sinif, hərbi kabinet, 2 kompüter otağı,
kitabxana və idman zalı fəaliyyət göstərəcəkdir.
Həmin gün Zeyvə kəndində Ticarət Mərkəzi və
Şərur rayonunda 10 əlil ailəsi üçün tikilmiş
fərdi evlər istifadəyə verilmişdir.
AzərTAc |
