Paytaxt  uşaqlarının ən çox sevdikləri məkandır  A.Şaiq adına Azərbaycan Dövlət  Kukla Teatrı. Burada izlədikləri  maraqlı tamaşalar  onlarda həmişə  xoş ovqat yaradır. Sevindirici haldır ki, bu xoş ovqatı onlarda yaradanlar da elə  həmyaşıdları olan kiçikyaşlı aktyorlardır. Uşaqların könlünü ovsunlamaqla bərabər  onlar öz  istedadlarını da  həvəslə nümayiş etdirirlər. Qəzetimizin növbəti nömrəsi üçün yazı hazırlamaq  məqsədilə  teatrın “Oyuq” studiyasına baş çəkdim və  haqqında  çox eşitdiyim balaca istedadlı aktyorlardan biri ilə - Ağa Şeydayevlə  görüşüb  həmsöhbət oldum.

Bildiklərimi dostlarımla bölüşür və dostlarımı maarifləndirirdim

Mən, Ağa  Şeydayev 2009-cu ildə Bakı şəhərində anadan olmuşam.  Bakı Avropa Liseyinin şagirdiyəm. Riyaziyyat və ana dili fənlərini  çox sevirəm.  Paytaxtdakı  I nömrəli Uşaq-Gənclər İnkişaf  Mərkəzinin yol hərəkəti qaydaları  dərnəyinin üzvüyəm. Hər il mərkəzdə yol qəzaları qurbanlarının anım gününə həsr olunmuş tədbir keçirilir. Məqsədimiz yol qəzalarında həlak olanları yad etmək  və yol hərəkəti qaydalarını uşaqlara çatdırmaqdır. Yol hərəkəti qaydalarını daha yaxşı öyrəndikdən sonra üzərimə yeni bir missiya düşürdü: bildiklərimi öz dostlarımla bölüşmək və dostlarımı maarifləndirmək.

Özüm də elə  “Mən böyümüşəm”də böyümüşəm

İlk  dəfə 2012-ci ildə  AzTV-nin “Biləyən” verilişində çıxış  etdim. Çəkilişdə Səməd Vurğun küçəsində yolda hərəkət edən piyadalara yol hərəkəti qaydalarını izah edirdim. Sonra dəfələrlə Space TV-nin “Mən böyümüşəm” verilişində iştirak etmişəm. Demək olar ki,  özüm də elə  “Mən böyümüşəm”də böyümüşəm. Bu verilişlərdə yol polisinin gənc köməkçiləri komandasının digər üzvləri də, yəni gənc polis dostlarım da iştirak edirdilər. İştirak etdiyim verilişlər maarifləndirici xarakter daşıyırdı.

“Uşaqlar yol qəzalarına yox dedilər!”

2013-cü ilin aprelində “Buta” uşaq bağçasında yol hərəkəti qaydalarına aid keçirilən tədbirdə “Buta”-nın  uşaqları, Bakı Şəhər Dövlət Yol Polis İdarəsinin şöbə müdiri Vaqif Əsədov, müəllimim Fəridə Süleymanova,  mərkəzin üzvləri və mən də  iştirak edirdim.  Həm bağça uşaqları, həm də yol polisinin gənc köməkçiləri komandası kiçik səhnəciklərlə yol hərəkəti qaydalarını izah edirdik. “Uşaqlar yol qəzalarına yox dedilər!” şüarı altında 2013-cü ildə  “Park Bulvarda” Nəqliyyatı İntellektual İdarəetmə Mərkəzində, dövlət yol polisi işçiləri və mərkəzin  üzvləri ilə birlikdə keçirilən tədbirdə də iştirak etdim. 2014-cü ilin mayında   Qızıl Xaç və Qızıl Aypara Hərəkatında fəal iştirakıma görə Azərbaycan Qızıl Aypara Cəmiyyəti tərəfindən  tərifnamə və diplomla təltif olunmuşam.

“Yol  nişanları əlifbasını birlikdə öyrənək!”

İlk olaraq  2016-cı  ilin aprelində  uşaqlar və yol təhlükəsizliyi layihəsinə uyğun olaraq “Yol  nişanları əlifbasını birlikdə öyrənək!”  maarifləndirici seminarımı mərkəzdə böyük auditoriya qarşısında keçirdim. Bu seminarda  sinif yoldaşlarım, dostlarım, bir çox məktəb şagirdləri iştirak edirdilər. Sonralar isə müxtəlif məktəblərdə - 157  nömrəli tam orta məktəbdə, Bakı Oksford məktəbində, təhsil aldığım liseyin ayrı-ayrı siniflərində  keçirdim. Təlimçi kimi - AzTV, Xəzər, ATV, Lider, Space, İctimai telekanallarında, ARB-nin  “Günəş”  verilişində iştirak etmişəm. “Uşaqlar və yol  təhlükəsizliyi layihəsi” adlı tədbirlərdə daim iştirakçı oluram. Daxili İşlər Nazirliyi Baş Dövlət Yol  Polisi İdarəsi tərəfindən  mənə fəxri fərman verilib. Yaşımın  az olmasına baxmayaraq  Bakı Şəhər  Dövlət Yol Polisi İdarəsinin  məsul işçisi, polkovnik Vaqif Əsədovun həm dostu, həm də köməkçisiyəm.

Azərbaycan  və  Avropa  xalq nağıllarını oxumaq hobbimdir

5 yaşımdan  Firudin bəy Köçərli adına Respublika Uşaq Kitabxanasının üzvüyəm. Azərbaycan  və  Avropa  xalq nağıllarını,  Erdal Çakırcıoğlunun, Qrim qardaşlarının nağıllarını,   Jül Vernin  “15 yaşlı kapitan”, “Kapitan Nemo”, “Sirli ada”, Ceyms Fenimor Kuperin “Sonuncu mogikan”, A.Sent Ekzüperin  “Balaca şahzadə”  və sair kitabları oxumuşam.

“Diqqət, uşaqlar!”

2014-cü ildə  ümummilli lider Heydər Əliyevin anadan olmasının  91-ci ildönümünə həsr olunmuş tədbirdə “Nağıl və debat” dərnəyinin üzvləri ilə birlikdə  çıxış  etmişəm və diplomla  mükafatlandırılmışam. 2014-cü ilin oktyabrında 32  nömrəli tam orta məktəbdə “Həyat” Beynəlxalq Humanitar Təşkilatı tərəfindən “Diqqət, uşaqlar!” devizi altında keçirilən tədbirdə  iştirak etdim. Fəal iştirakıma görə  təşəkkürnamə və diplomla  təltif olundum. Həmin məktəbin şagirdləri mənim maarifləndirici çıxışımı çox diqqətlə  dinlədilər, öyrənib və əməl edəcəklərinə  söz verdilər. 

Şahmatla da məşğul oluram

İdmanı da çox sevirəm. I saylı İxtisaslaşdırılmış Olimpiya Ehtiyatları Uşaq-Gənclər Şahmat-Dama İdman Məktəbində  şahmatla  da məşğul oluram. 2016-cı ilin  martında  Respublika Şahmat Mərkəzində keçirilən “Bahar kuboku” turnirində 9 oyuna 6,5 xalla IV dərəcəmi aldım və hazırda  mən də güclülər sırasındayam.  

Teatr studiyasının həm aktyoru, həm də aparıcısıyam

2017-ci ilin sentyabrında isə “Oyuq” teatr  studiyasına müsabiqə yolu ilə  daxil olmuşam. Teatr studiyasının  həm aktyoru, həm də aparıcısıyam.  Burada mənə aktyorluğun bütün sirlərini öyrədirlər. Nitqin inkişaf etdirilməsi, səhnə hərəkətləri və başqa aktyorluq dərsləri öyrədilir. Məşqlər o qədər əyləncəli və maraqlı keçir ki, yorulmaq bilmirik.  2016-cı ilin noyabrında “Oyaq gözəl” tamaşasında Cırtdan obrazında rol aldım. Ən çox sevdiyim personaj Cırtdan obrazıdır, bəlkə də ilk rolum olduğuna görədir.  Səidə müəllimin mənim üçün yazdıgı Cırtdana aid monoloqu hətta  müxtəlif tədbir və verilişlərdə  də məharətlə ifa edirdim. “Şahın xudpəsənd oğlu” tamaşasında Ələddin obrazı yaddaqalan rollarımdan  biridir.

İfa etdiyim mahnı Prezidentimizin xoşuna gəldi

Teatr  studiyamızda xüsusi qayğıya ehtiyacı olan uşaqlarla birgə ərsəyə gətirilən “Sehrli dünya” adlı tamaşa-konsert oldu. Bu tamaşada Məlikməmməd obrazında idim, ilk dəfə idi ki, xüsusi qayğıya ehtiyacı olan bir dostla səhnəyə çıxırdım. Çox həyəcanlı idim. Amma dostum Rüfət çox sevinirdi. 2017-ci ilin  aprelində Heydər Əliyev Mərkəzinin önündə “Oxu günü” adlı tədbir keçirilirdi, mən də “oyuq”çu dostlarımla tədbirdə iştirak etdik və gözəl bir mahnı səsləndirdik.   Baku shoping festivalında  müxtəlif yerlərdə, İçərişəhərdə, 28 Mallda, Gənclik Mallda, Park Bulvarda konsertlərdə çıxış edirdim.  Sinif müəllimim Aytəkin xanımın  ilk tamaşamda mənə “Oskar” mükafatı suvenirini verməsi  unudulmazdır. Prezidentimiz İlham Əliyev və xanımı, Birinci vitse-prezident Mehriban Əliyevanın iştirak etdiyi Novruz şənliyi tədbirində  istedadımı nümayiş etdirmişəm. Mənim “oyuq”çularla birlikdə ifa etdiyim mahnı   Prezident İlham Əliyevin və Birinci vitse-prezident  Mehriban xanımın çox xoşuna gəldi, hətta  onlar bizimlə şəkil də çəkdirdilər.

“Oyuq”çu dostlarımla çox mehribanıq

“Oyuq” teatr studiyası bir oyuq ailəsidir, ailə başçısı kimi Səidə müəllimi çox sevirəm, çünki  o, çətin məşqlərdə, tədbirlərdə bizim qayğımıza qalır, hətta bizi  ekskursiyalara, əyləncə mərkəzlərinə  gəzintiyə aparır. “Oyuq”çu dostlarımla da çox mehribanıq. Onlarla beynəlxalq festivallarda iştirak edir, bir-birimizin  uğurlarına sevinirik. Hazırda 2 serialda baş rolda iştirak edirəm. İlk serialım “Ürək ağrısı”, digəri “Kabusun gəlişi”. Klip və reklam çəkilişlərinə dəvət alıram. Çəkiliş zamanı gülməli və maraqlı hadisələr də olur. Məsələn, bir səhnənin çəkilişi zamanı texniki səbəblərə görə dublların sayı bir az çox oldu və mən “Ana, narahat olma, atam indi gələr” cümləsini o qədər təkrarladım ki,  bir dublda da ana əvəzinə ata dedim, çox gülməli alındı. Əvvəllər bir təlimçi kimi telekanallarda verilişlərə çıxırdımsa, indi isə aktyor və aparıcı kimi verilişlərə dəvət alıram. 2017-ci ilin  sentyabrından 26 nömrəli M.Maqamayev adına musiqi məktəbində kislofon-zərb alətləri ixtisası ilə də məşğul oluram.

Onun güclü yaddaşı, sərbəst, səlist nitqi var

Fəridə Süleymanova: Mən Ağanı gözəl siması və düşüncəli baxışına görə seçmişdim, ancaq zaman keçdikcə başqa qabiliyyətlərini də  kəşf etdim. Onun güclü yaddaşı, səlist, sərbəst nitqi məni valeh edir. Rast gəldiyi  hadisələri çox maraqlı, bədii təsvirlərlə danışır, özünəməxsus araşdırmalar aparır. Dəstəmizə yeni qoşulan uşaqlarla elə mehriban rəftar edir ki, sanki  əvvəlcədən bunları tanıyırmış. Ağada həm də yumor hissi var. O, yol polisi  gənc köməkçilər komandasına lap uşaq vaxtlarından qoşulub. Onun iştirakı ilə maarifləndirici verilişlər hazırlanıb. Ağada olan öyrənmək, öyrətmək qabiliyyətini xüsusilə qeyd edərdim. O, 3  ildir ki, təlimçi kimi yaşıdlarına yol hərəkəti qaydalarını öyrədir. Onun bu fəaliyyəti Azərbaycan Respublikası Daxili İşlər Nazirliyi Baş Dövlət Yol Polisi İdarəsinin rəisi, polis general-mayoru Ramiz Zeynalov tərəfindən fəxri fərmanla qiymətləndirilib. Təhlükəsizliyin təmin edilməsi, yol nəqliyyat hadisələrinin sayının azaldılması məqsədilə təbliğat xarakterli verilişlərin hazırlanmasında Ağanın xüsusi əməyi var.

Ağa kimi fəal bir köməkçim var

Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov: - Ağa Şeydayev  haqqında söz demək, fikir söyləmək  lap ürəyimcədir. O, öz çalışqanlığı ilə hamıda  qürur hissi yaradır. Təbii ki, yol hərəkəti qaydalarına dair bilik və  bacarığı, qabiliyyəti ilə hətta özündən yaşca böyük olan uşaqlardan belə fərqlənən Ağanın bu sahə üzrə  müəllimi kimi onun haqqında çox danışa bilərəm. Əslində bu gün Ağa Bakı şəhəri Dövlət Yol Polisinin təbligat bölməsinin dostudur və azyaşlılar arasında təbliğat  işinin aparılmasında yeganə şagirdlərdən biridir. Həmçinin  telekanallarda canlı olaraq çıxışları ilə o, böyük nümunədir. Bakı şəhər məktəblərində  maarifləndirici seminarların təşkil edilməsində Ağanın çox böyük əməyi olub. Mən onunla fəxr edirəm və sevinirəm ki,  Ağa kimi olduqca fəal bir köməkçim var.

Sifai SƏFƏROVA