...Bəlkə də bu yazımı  haqqında söhbət açacağım qeyri-adi istedad sahibinin - Fidan balamızın  ecazkar səsinin təsiri altında  qələmə alsaydım, bu, sadəcə  bir məqalə  deyil, şeir, romans, nə bilim yeni bir mahnı mətni, gözəl, hətta  poema  da alına bilərdi. Yəqin nə vaxtsa bir şairin, nasirin nəzm əsərlərinin, povest və romanlarının baş qəhrəmanı kimi də təqdim oluna bilər bu “qəhrəmanım”. İstedad da qəhrəmanlıq  kimi daxili qüvvənin təzahürü nəticəsində özünü  büruzə verir. O, sanki vulkan mənbəyi olur və məqamında püskürür. Hələ kiçik yaşlarında  Avropanın ən izdihamlı  konsert  salonlarında dünya şöhrətli vokal ifaçıları ilə bərabər səhnə bölüşən bu yeniyetmə  istedad sahibinin  canlara məlhəm olan ecazkar səsinin  vurğunu olmamaq mümkün deyil. Dünyaca məşhur olan  artistlərin  özlərinin məftun olduqları bu səsin sorağı artıq milyonlarla tamaşaçının və dinləyicinin sevgisini, məhəbbətini qazanıb. Onun Azərbaycan, rus və ingilis dillərində  məharətlə təqdim etdiyi mahnılar musiqi bilicilərinin, bəstəkar və tənqidçilərin, vokal ustalarının müzakirə mövzusuna  çevrilib. Artıq  haqqında yeniyetmə bir ifaçı  kimi deyil, səhnədə  sözünü  deyən, özünü təsdiq edən bir ifaçı kimi danışılır. Böyük məmnuniyyətlə  bu kiçik yazımın baş  “qəhrəmanını” sizə də təqdim edirəm  və  həmsöhbət olmaqdan doymaq mümkün olmayan Fidan balamızın  özü haqda  və yaradıcılıq  uğurları barədə  söylədiklərini  qələmə aldım.

5 yaşımdan  şahmatla məşğul oluram

Mən 2005-ci ildə Moskva şəhərində anadan olmuşam. “Baku Oxford School”da  təhsil alıram. Fransız və ispan dillərini öyrənirəm.  Orta təhsilimlə yanaşı   paytaxtdakı Tofiq Quliyev adına 12 nömrəli musiqi məktəbində vokal ixtisasına yiyələnirəm. Həmçinin  5 yaşımdan  şahmatla da  məşğul oluram.  Artıq bir çox  şahmat turnirlərinin iştirakçısı olmuşam və  diplomlar qazanmışam. 4 yaşımdan  isə  rəsm  çəkməklə də məşğul oluram və  əl işlərim “Azərbaycanın uşaq təsviri sənəti” jurnalında dərc olunub.

“Je suis Malade” mahnısını ifa  etdim

YARAT Müasir İncəsənət Mərkəzinin Yay Qalereyasının təşkil etdiyi avstriyalı rəssam Dejan Kaludjerovicin sərgisində iştirak etdim və orada fransız dilində “Je suis Malade” mahnısını ifa  etdim.  Həmin mahnını  2014-cü ildə Bakıya öz möhtəşəm konsert proqramı ilə təşrif buyuran dünya şöhrətli müğənni Lara Fabian ilə də bir səhnədə bölüşdük. 2015-ci ildə isə  Lara Fabianın İstanbuldakı konsertində də müğənni ilə birgə “Je t'aime” mahnısını səsləndirdim və tamaşaçıların alqışlarını qazandım.

“Biz uşaqlara müharibə verməyin”

Azərbaycan Respublikasının Ailə, Qadın və Uşaq Problemləri üzrə Dövlət Komitəsi tərəfindən 2015-ci ildə keçirilən “İstedadlı uşaqlar festivalında”  iştirak etdim və uğurlu çıxışıma görə  diplomla mükafatlandırıldım.  Həmin il “Saf rənglər” adlı I Beynəlxalq Uşaq Yaradıcılıq Festivalına da qatıldım və diploma layiq görüldüm.  

Bakıda  2016-cı il 25-27 aprel tarixlərində Heydər Əliyev Mərkəzində keçirilən BMT Sivilizasiyalar Alyansının  VII  Qlobal Forumundan sonrakı konsertdə   Xalq artisti Teymur Göyçayevin rəhbərliyi  və Uşaq Kamera Orkestri  solistlərinin müşayiəti ilə “Tell me Why” mahnısını ifa etdim və  mahnım bitdikdən sonra  zaldakı tamaşaçılara müraciətlə “Biz uşaqlara müharibə verməyin” deyə səsləndim.  Bu sözlərimlə  tamaşaçılarda xoş ovqat yaratdım.

Azərbaycan Respublikasının Prezidenti İlham Əliyev cənablarının  6 oktyabr 2016-cı il tarixli  sərəncamı ilə    musiqi sahəsində xüsusi istedadı olan şəxs kimi adım Azərbaycanın gənc istedadlarının “Qızıl kitabı”na daxil edilib və  xüsusi aylıq təqaüdə layiq görüldüm.

Yaradıcılıq hesabatlarımdan biri

2016-cı ildə Heydər Əliyev adına Sarayda keçirilən “ZİMA” Uşaq Estrada musiqi festivalında iştirak etdim. Festival çox maraqlı keçdi. Oxuduğum mahnılara görə qazandığım alqışlar ruhuma rahatlıq bəxş edirdi.  İtaliyada keçirilən  “Sanremo Junior 2018” festivalına qatıldım və  III yerə layiq görüldüm. Bu,  mənim bəlkə də ən məsuliyyətli yaradıcılıq hesabatlarımdan biri  idi.

Vokal üzrə I yer

2017-ci ilin martında  İtaliyanın “TESTENE ART BAKU” Beynəlxalq İncəsənət Festivalı Müsabiqəsində iştirak edib, 9-12 yaşlı uşaqlar arasında vokal üzrə  I yerin sahibi oldum.  2018-ci ilin yanvarında Vyanadakı Azərbaycan Mədəniyyət Mərkəzində “Mahnılarla körpü yaradaq” adlı konsert proqramı təqdim etdim. Konsertdə  çoxlu  tanınmış musiqiçilər, sənət adamları və musiqisevərlər var idi. Təqdim etdiyim hər mahnı yüksək alqışlarla qarşılanırdı və   bir ifaçı  olaraq  bu, mənə  ruh yüksəkliyi  bəxş edirdi.

Klipin təqdimatı uğurlu keçdi

2018-ci ilin  fevralında    müğənni Elnur Hüseynovla   birlikdə “Say Hallelujah” mahnısını  birgə ifa etdik və həmin mahnıya klip çəkdirdik. Klipin təqdimatı Flame Towersda uğurla baş tutdu və   bütün iştirakçıların marağına səbəb oldu. Tanınan, sevilən müğənnilərlə bir səhnəni bölüşmək, onlarla bir klipdə  çəkilmək sevinclə bərabər məsuliyyəti də artırır. Kim bilir, bəlkə də mənim  inkişafıma belə tarixçələr daha çox təkan verir.

Hədəfim qalib olmaq idi

2018-ci il sentyabrın 18-də İctimai Televiziya və Radio Yayımları Qrupunda iclas  keçirildi və həmin iclasda  Azərbaycanı Uşaq Avroviziya Mahnı Müsabiqəsində təmsil edəcəyim açıqlandı.  Bu mötəbər yarışda Azərbaycanı təmsil etməli olduğumu biləndə  çox həyəcanlandım. Axı, necə olmasa bu, nə sıradan bir konsert olacaq, nə də ki,  bir  festival, bu, mənə görə  olduqca çətin və məsuliyyətli  musiqi yarışması olacaq və bu yarışmada yalnız güclülərin güclüsü qalib ola bilər. Bu məsuliyyəti mən dərindən dərk edirdim. Ancaq bununla bərabər açığını deyim ki, sevinirdim də. Çünki bu, mənə yönələn  böyük etimad idi və mən onu doğrultmalı idim. Bacardığım qədər doğrultdum da.  Bir aydan sonra  Avroviziya səhnəsində ifa edəcəyim “I Wanna Be Like You” (Sənin kimi olmaq istəyirəm) mahnısının təqdimatı baş tutdu. Mahnının  müəllifləri İsa Məlikov və Aytən İsmixanova, klipun yaradıcı heyəti isə Alexey Krupina və Maxim Tsurkov idilər. Müsabiqənin qaydalarına əsasən ifa olunacaq mahnının geniş hissəsi ifaçının doğma dilində olmalı idi. Buna görə  də “I Wanna Be Like You” mahnısının 60 faizi Azərbaycan, 40 faizi isə ingilis dillərindədir. Nəhayət, 2018-ci ilin noyabrında Azərbaycanı “I Wanna Be Like You”( Sənin kimi olmaq istəyirəm) ifam ilə Belarusun Minsk şəhərində keçirilən “Junior Eurovision” mahnı yarışmasında  təmsil etdim və 47 xalla 16-cı yeri tutdum. Özümü çox xoşbəxt sayıram.

Qızıl medala sahib oldum

2018-ci ilin dekabrında “4th Science Fair” 4-cü Elm Sərgisində Baku Oxford Məktəbini təmsil etdim və yarışın qalibi olaraq qızıl medala sahib oldum.  Həmçinin bir çox dövlət tədbirlərində fəal iştirakıma görə dəfələrlə fəxri fərmanlara və diplomlara layiq görülmüşəm.

... Hə, dəyərli oxucular, əminik  ki, 13 yaşlı  istedadlı  bir  məktəbli qızın  yaradıcılıq tarixçəsi və bu çətin yolda- vokal ifaçılığı sahəsində   qazandığı  uğurlar  sizi  də hədsiz sevindirdi. Çox vaxt   istedadı bəxt ulduzu adlandırırlar, kimin  taleyinə qondu, qondu deyirlər.  Biz də həmin fikirlə razılaşırıq bir şərtlə ki, o ulduzu  daim  parlaq,  uzunömürlü etmək üçün Fidan balamız kimi  öz üzərində  çalışmaqdan bezməyəsən.

Sifai SƏFƏROVA