Koreya Respublikası 2018-2019-cu tədris ili üzrə təqaüd proqramı elan edir. Təhsil  magistratura, doktorantura və tədqiqat səviyyələrini əhatə edir.  Proqramdan  40 yaşadək şəxslər  yararlana bilər. Təqaüdün müddəti   magistratura təhsil səviyyəsi üzrə 3 il,  doktorantura təhsil səviyyəsi üçün 4 il, tədqiqat proqramı üçün 6 ay təşkil edir.  Tələbələrin aylıq təqaüd, təhsil haqqı, dil kursu, yol,  sığorta  və s.  xərcləri qarşı tərəfdən təmin olunur.  Namizədlər sənədlərini  Koreya Respublikasının Azərbaycandakı   səfirliyinə təqdim etməlidir. İngilis (TOEFL və IELTS Academic) və Koreya (TOPİK) dilləri üzrə sertifikatı olanlara üstünlük verilir. Təqaüd proqramı ilə daha ətraflı edu.gov.az/az/page/228/14729 səhifəsindən məlumat əldə etmək olar.

Təqaüd proqramı əcnəbi tələbələrin Koreya universitetlərində müvafiq istiqamətlər üzrə təhsil alması, ölkədə beynəlxalq təhsilin inkişafı və ölkələr  arasında sıx dostluq münasibətlərinin möhkəmləndirilməsinə  xidmət edir.

Qeyd edək ki, Cənubi Koreya hökumətinin təqaüd proqramı istedadlı əcnəbi tələbələrin  ali təhsil alması üçün ölkə  universitetlərinə dəvət olunması yolu ilə gələcək qlobal liderlərin dəstəklənməsi və təhsil sahəsində beynəlxalq əməkdaşlığın inkişafı məqsədi ilə yaradılmışdır. 

Oruc MUSTAFAYEV