Bu gün incəsənətin müxtəlif sahələrində uğurlara imza atan yeniyetmə və gənclərimiz az deyil. Əminliklə söyləmək olar ki, onlar sabahın tanınmış ulduzları olmağa qadirdirlər. Gəlin, onlardan  bir neçəsi ilə tanış olaq.

Ayşə  Məmmədova  2021-ci ildə Suraxanı rayonundakı  Hövsan qəsəbə   280 nömrəli tam orta məktəbi  bitirib. 33 nömrəli musiqi məktəbini fərqlənmə diplomu ilə başa vurub. Dərslərini  yaxşı və əla qiymətlərlə  oxuyan  Ayşə  orta təhsilini başa vurduqdan sonra  musiqiyə hədsiz həvəs göstərib.  Gənc istedad Milli Konservatoriyanın nəzdində Musiqi Kollecinin “Fortepiano“ ixtisasına qəbul olub.  Fortepiano müəllimi, Respublika və Beynəlxalq müsabiqələr   laureatı Esmira Əliyevanın tələbəsi olan  

Ayşə Məmmədova  ilk uğuruna 2022-ci ildə Qazaxıstanda keçirilən  Astana Stars- Divertisment adlı  müsabiqədə imza atıb  və fortepiano ifaçılığı üzrə  I yerə layiq görülüb. 2023-cü ildə Ümummilli Lider Heydər Əliyevin anadan olmasının 100 illik yubileyinə həsr olunan  “Sən elə bir zirvəsən” adlı Respublika  müsabiqəsində “Azərbaycan bəstəkarlarının estrada mahnıları” nominasiyası üzrə  I yeri tutaraq, qalib adını qazanıb. Həmçinin,  həmin il dahi şəxsiyyətin  yübileyinə  həsr olunan  ali təhsil ocaqlarının, ümumtəhsil  məktəblərinin və orta ixtisas təhsili  müəssisələrinin, musiqi məktəblərinin  şagird və tələbələri arasında keçirilən Gənc ifaçıların IV Respublika müsabiqəsində  də fəal iştirak edərək nailiyyətlər qazanıb. Ayşənin qazandığı  uğurlar  davamlı olub. O, daima yüksək nəticələr nümayiş etdirir. Bütün arzularına çalışqanlığı və  əzmkarlığı ilə çatır. Bu isə onu xoşbəxt gələcəyə  aparan  işıqlı  və etibarlı yoldur.

Ayşən  Məmmədova hazırda Musiqi Kollecinin   IV kurs tələbəsidir. Gənc istedadın fəth edəcəyi zirvələr  hələ qabaqdadır.  Arzusu kolleci bitirdikdən sonra ali  musiqi təhsili  almaq, milli estrada janrında dünyaca tanınan  ifaçılardan biri olmaqdır. Gənc tələbə estrada janrının  sirlərini ona  əzmkarlıqla öyrədən  müəllimi   Esmira Əliyevanın əziyyətlərinin qarşılığını  musiqi sahəsində  qazanacağı daha böyük uğurlarla verəcəyinə əmindir. Deyir ki, o də müəllimi kimi istedadlı  uşaqları üzə çıxaracaq, onları  düzgün istiqamətləndirəcək, gözəl musiqiçi kimi yetişdirəcək.

Elton  Şıxəliyev  Lerik şəhər R.Nurullayev adına Cəngəmiran kənd tam orta məktəbini  bitirib. Lerik şəhər E. Rufullayev adına Uşaq İncəsənət Məktəbində tar ixtisası üzrə təhsil alıb. Bu məktəbin yekun konsertində o, istedad və bacarığı  ilə  fərqləndiyinə görə təltif edilib. Müxtəlif illərdə- III Respublika Elmi-İfaçılıq müsabiqəsində,I İyun- Uşaqların Beynəlxalq Müdafiəsi Günü, İstedadlı Uşaqlar festivalı, III Respublika Elmi-ifaçılıq, 2 Fevral- Gənclər  Günü,  uşaq və gənclər arasında Xalq Çalğı Alətləri İfaçılarının IV Respublika müsabiqələrində, 2023-cü il Ümummilli Lider  Heydər Əliyevin anadan olmasının 100 illiyinə həsr edilmiş ali, umumtəhsil və orta ixtisas təhsili  müəssisələri, müsiqi məktəblərinin şagird və tələbələri arasında keçirilən gənc ifaçıların  IV Respublika müsabiqəsində  I yerləri qazanıb.

Elton asudə vaxtlarında  mütaliə edir, xarici və  milli  klassik bəstəkarların əsərlərinə qulaq asır. Ən böyük arzusu ölkəmizi daha mötəbər yarışlarda təmsil etmək,  Azərbaycan bayrağını iştirak etdiyi bütün müsabiqə və festivallarda dalğalandırmaqdır. Deyir ki, bunun öhdəsindən  gələcəyinə əmindir:”İfalarım tamaşaçılar tərəfindən maraqla  qarşılanır.  Amma daha  əzmkarlıqla çalışmalıyam ki, sənətin sirlərinə dərindən yiyələnim. Azərbaycanın musiqi tarixini, mədəniyyətini gələcəkdə inkişaf etdirməyə qadir olum”.

O,  hazırda  Milli Konservatoriyanın nəzdində Müsiqi Kollecinin III kurs tələbəsidir. Müəllimləri, tələbə yoldaşları onun əsl  istedad sahibi olduğunu söyləyirlər. Deyirlər ki, Eltonuu gələcəyi parlaqdır.

Sifai SƏFƏROVA