İngiltərədə təhsil müəssisələri  müəllimləri  məktəbə cəlb etmək üçün  ciddi səylər göstərir.  Daha çox müəllim  heyəti çatışmazlığı problemi paytaxt Londonda yaşanır. "The Guardian" qəzetinin yazdığına əsasən, 2012-ci ildə ixtisaslaşmadan keçmiş müəllimlərin  yalnız  57 %-i   2017-ci ilə qədər məktəbdə qalaraq  işləyiblər. Rəsmi məlumatlara görə,  2010-cu ildə paytaxtda işə başlamış 35 min gənc  müəllimdən 11 mini  məktəbi tərk edib.   Vəziyyət 2011-ci ildən pisləşməyə başlayıb.  2015-ci ildən 2017-ci ilə qədər müəllimlərin dörddə birindən çoxu məktəbdən uzaqlaşıb. Hökumət bu vəziyyəti  çox  həyəcanlı hal kimi qiymətləndirir.  Məmurların fikrincə, müəllim  çatışmazlığı böhranı dünən başlamayıb və əlverişsiz ümumi iqtisadi situasiya ilə  izah olunur: yaşayış xərcləri artıb, ev almaq imkanı yoxdur və.s. Bundan başqa, bu tendensiyanın qarşısını alacaq dəqiq plan da yoxdur.Vəziyyəti xüsusilə kəskinləşdirən məqam odur ki, bu cür situasiya  yerlərdə, xüsusən də paytaxtda şagirdlərin sayının artması fonunda baş verir.

Təhsil Nazirliyi (Department for Education – DfE)  2025-ci ilə qədər orta məktəblərdə şagird sayının 19,4 faiz artacağını proqnozlaşdırır. Hökumətin təhsil proqramlarını tənqid edən ekspertlər baş verənlərin səbəblərinin maliyyə  vəsaitlərinin qeyri-rasional xərclənməsi ilə izah edirlər. Məsələn, yeni müəllimlərin təliminə xərclənən vəsaitin həcmi mövcud məktəb müəllimlərinin  inkişafına xərclənən vəsaitlərdən 10 dəfə artıqdır.
  

Təhsil Nazirliyinin nümayəndələri inandırırlar ki, problem haqqında məlumatlıdırlar və onun  həlli üzün  bütün gücləri səfərbər ediblər.  "Biz məktəblərə müəllimlərin cəlb edilməsi üzrə səyləri davam etdirəcəyik. Biz bütün  ən yaxşı müəllimlərin bu peşədə qalması və həmçinin onların yükünün azaldılması üçün mümkün bütün  təşəbbüsləri göstərəcəyik", - deyə nazirliyin nümayəndəsi bildirib.

Oruc MUSTAFAYEV