Kamançanı xalq çalğı alətləri ansamblının canı adlandırırlar. Trio sayılan üçlüyün (tar, kamança və qaval) təqdim etdiyi  musiqi nömrələrində  də  kamança əhəmiyyətli  rol oynayır. Konsertlərdə bu üçlüyün müşayiəti ilə təqdim olunan   muğam parçaları və xalq mahnıları öz  təsir gücü ilə  dinləyiciləri daha çox ram edə bilir.

Yeri gəlmişkən, Heydər Əliyev Fondunun təşəbbüsü və təşkilatçılığı ilə paytaxtda keçirilən silsilə muğam müsabiqələrində trionun sağ qanadı sayılan kamançanın  xüsusi rolu  barədə münsiflər dəfələrlə maraqlı fikirlər səsləndiriblər. İfaçıları öz məharətilə gah zilə qaldıran, gah da bəmə endirən, canımıza ruh, qanımıza  coşqunluq hissi qatan tarla bərabər kamança olur.

Haqqında söhbət açmaq istədiyim yeniyetmə kamança ifaçısı Abid Çələbiyev də uşaq yaşlarından ustad Habil Əliyevin mahnılarını ehtirasla dinləyib, onun ecazkar ifaçılıq məharətindən kifayət qədər  bəhrələnib. Təsadüfi deyildir ki, yeniyetmə ifaçı ilk müəllimi də elə üzünü görmədiyi  ustadının  dizi üstündə nalə qoparan kamançanın olduğunu qürur hissi ilə söyləyib. Onunla gimnaziyada  görüşüb bu ecazkar musiqi aləti ilə dostluğu barədə ürək sözlərini dinləmək qərarına gəldim. Niyə məhz tar yox, qarmon yox, başqa musiqi aləti yox, ancaq kamança olub onun seçimi?

Respublika və beynəlxalq müsabiqələr laureatıyam

2008-ci ildə Şəkidə anadan olmuşam. Şəki şəhər 7 nömrəli  tam orta məktəbində təhsil almışam. Uşaq yaşlarımdan klassik və retro musiqiləri çox  dinləmişəm, musiqi alətlərinə gəlincə isə xüsusilə kamança ilə daha çox  maraqlanmışam. Elə bu arzu və istəklə də Şəki Şəhər Uşaq İncəsənət Məktəbində İlqar Mikayılovun kamança sinfində təhsil almışam. Hazırda isə Milli Konservatoriyanın  tərkibində İncəsənət  Gimnaziyasında təhsilimi davam etdirirəm. Artıq mən  respublika və beynəlxalq müsabiqələr laureatıyam.

Həyəcan hissi, birincilik sevinci...

...Belə ki,  müxtəlif illərdə  beynəlxalq müsabiqələrdə - Türkiyədə “Evde sənət var” musiqi  yarışmasında. Londonda keçirilən  “Golden Time” musiqi  festivalında, Avstriyada “AUSTRİAN STARS” beynəlxalq musiqi müsabiqəsində, Tatarıstan və  Rusiyada “Cantabilee presto”, İsraildə  keçirilən  “Gates of Hope” və “Qara Qarayev ”adına musiqi müsabiqələrində  I yeri tutaraq  C.Cahangirovun Rondo əsərinin virtouz ifaçısı diplomuna layiq görülmüşəm. Fransada keçirilən  Adilia Aliyeva  XVII  beynəlxalq musiqi  yarışmasında  da I yeri tutdum. Paytaxtımızda və regionlarda keçirilən   musiqi müsabiqələrində də  həmişə məharətlə çıxış etmişəm. Habil Əliyev adına gənc kamança ifaçıları müsabiqəsində laureat adını qazandım.  “Üç alov”, “Art Olimpia 2021-ci il”, “Payız əfsanələri  2021-ci il” musiqi müsabiqələrində I yerə yüksəldim. “Böyük Qafqaz İncəsənət və Rəqs Kuboku” 2 nominasiya üzrə  müsabiqədə I yerə layiq  görüldüm. “Könlüm keçir Qarabağdan” Respublika müsabiqəsində də birincilik  mənim oldu.

“Gənclərə dəstək” layihəsində

2022-ci ilin yanvarında yeniyetmə kamança ifaçısı Abid Çələbiyev bədii rəhbər və dirijor, Azərbaycan Respublikasının Xalq artisti Ağaverdi Paşayevin və Əməkdar artist İlahə Hüseynovanın rəhbərliyi ilə “Gənclərə dəstək” layihəsində,  iyul ayında isə “Şuşa İli” çərçivəsində “Milli musiqi alətlərimiz - Milli sərvətimizdir” adlı layihədə, M.Maqomayev adına Azərbaycan Dövlət Filarmoniyasında xalq çalğı alətlərinin müşayiəti ilə  təşkil olunan konsertlərdə  məharətlə çıxış edib.

Teatra böyük marağım var

Qeyd edim  ki,  teatra da böyük maraq göstərirəm. İncəsənət Gimnaziyasının tədbirlərində böyük həvəslə çıxış edirəm. 2022-ci ildə  İncəsənət Gimnaziyasının müəllim-şagird kollektivi ilə Türkiyənin Antalya şəhərində bir sıra tədbirlərdə  öz aktyorluq məharətimi nümayiş etdirərək   böyük təəssüratla vətənə döndüm. Bu yaxınlarda   Başqırtıstanda  keçirilən müsabiqəyə də qatıldım və  II  dərəcəli laureat  adını qazandım.  Türkiyədə baş vermiş zəlzələ qurbanlarının xatirəsinə həsr olunan  proqramda da iştirak edərək uğur qazandım  və Iğdır Universitetinin diplomuna layiq görüldüm.

...Göründüyü kimi, yeniyetmə istedadın bu yaş dövründə  tək kamança ifaçılığı ilə deyil, eyni zamanda  başqa sahələrdə də  imza atdığı uğurlar onun  gələcəkdə   yaradıcılıq  yolunda  hansı pilləni fəth edə biləcəyi barədə   ümidləri  artırır. Bu ümidlərin  reallaşacağı zaman isə şübhəsiz  hələ qabaqdadır. Abid Çələbiyevi qarşıda   çoxlu  böyük səhnələr, müsabiqələr, daha məsuliyyətli yaradıcılıq yarışmaları gözləyir. İnanırıq ki,  kamanından güc alacaq, pillə-pillə ucalacaq, ümidləri doğruldacaq bu oğlan.

Sifai SƏFƏROVA