“İngilis dili müəllimləri klubu” yay düşərgəsi layihəsi çərçivəsində müəllimlərin (iştirakçıların) seçimi prosesinə artıq başlanılıb.

Şəmkir Heydər Əliyev Mərkəzində layihənin məlumatlandırma  sessiyası  təşkil  edilib  və  ingilis dili müəllimlərinə layihənin məqsədi və layihə çərçivəsində görüləcək işlər, seçim kriteriyaları və müraciət forması haqqında məlumat verilib.  İştirakçıların seçimi prosesi elektron müraciətlər əsasında  həyata  keçiriləcək  və  layihədə  iştirak  etmək  istəyən  şəmkirli  müəllimlər  elektron  ərizə formalarını  Şəmkir  Rayon  Təhsil  Şöbəsinin  rəsmi internet  səhifəsinə  daxil  olaraq  göndərə  bilərlər.

Layihə Azərbaycan Respublikası Təhsil Nazirliyinin Təhsildə inkişaf və innovasiyalar üzrə  2-ci  qrant  müsabiqəsi  çərçivəsində  həyata   keçirilir və layihənin keçirilməsində əsas məqsəd yay tətili müddətində ingilis dili müəllimlərinin xarici dildə ünsiyyət və tədrisetmə bacarıqlarının zənginləşdirilməsi  nəticəsində birbaşa və dolayı yolla şagirdlərin ingilis dilində ünsiyyət bacarıqlarının inkişaf etdirilməsinə nail olmaqdır.

Seçilmiş müəllimlər təşkil ediləcək düşərgə çərçivəsində müxtəlif mövzular üzrə təlimlər və workshop-larda, gəzintilərdə iştirak etmək hüququ qazanacaqlar.