Sevindirici haldır ki, uşaq və yeniyetmələr   asudə vaxtlarını səmərəli və faydalı  keçirmək,  hələ erkən yaşlarında  valideynlərin və müəllimlərin diqqətini  cəlb edən  istedad və bacarıqlarını, yaradıcılıq  potensiallarını  inkişaf etdirmək  məqsədilə   məktəbdənkənar  təhsil  müəssisələrinin nəzdində   fəaliyyət göstərən yaradıcılıq  dərnəklərinə  üzv yazılırlar. Məşhur  peşə sahiblərinin, korifey sənətkarların, rəssamların, heykəltəraşların, musiqiçilərin və incəsənət xadimlərinin  həyat və fəaliyyət tarixçələrini  vərəqləyərkən    diqqəti cəlb edən bir  vacib amil  bu gün haqqında danışacağımız  bu tipli yaradıcılıq dərnəklərinin  vacibliyini və  mahiyyətini   bir daha təsdiqləyir. Yəni, birmənalı olaraq  uşaqlarda  şəkil çəkməyə, rəqs etməyə, mahnı oxumağa və başqa sahələrə həvəs lap elə kiçik yaşlarından başlayır.

Bu gün haqqında  ürəkdolusu söhbət  açmaq istədiyim  uşaq  da saysız-hesabsız uğurlara imza atıb. Kim bilir, bəlkə  də bu  uşaq gələcəyin tanınmış korifey sənətkarları  kimi tanınacaq,  bu gün həvəslə məşğul olduğu yaradıcılıq mərkəzinə şərəf qazandıracaq,  üzərində əməyi olan Nərmin müəllimin  başını uca edəcək...

Qazandığı uğurlar

6 yaşlı Kövsərin  yaradıcılığı  ilə tanış olarkən qazandığı uğurlar  adamı heyran edir. Bu yaşda 17 diplom və 14 beynəlxalq sertifikat böyük uğurdur. Kiçikyaşlı olmasına baxmayaraq  bu qızcığaz “Palitra” rəsm dərnəyinin ən istedadlı və bacarıqlı üzvlərindən biridir. Dəfələrlə respublika və beynəlxalq sərgilərin qalibi olub. Bir-birindən maraqlı, çoxmənalı və çoxməzmunlu,  rəngarəng rəsmləri ilə nəinki  yerli, hətta xarici rəssamları da heyrətə gətirib. Bu  günlərdə “Gələcəyin rəssamı mənəm” adlı onlayn fərdi sərginin ilk iştirakçısı  da elə o  olub.

Müəllimi rəssam Nərmin Abdullayevadır.  Kövsər Qurban  2014-cü ildə Bakı şəhərində, rəssam ailəsində dünyaya göz açıb.

Valideynləri hələ onun 3 yaşında olarkən yaradıcılığa maraq göstərdiyini rəsm çəkmə, rəngləmə, plastilinlə yapma və aplikasiyaya olan həvəsini  müşahidə ediblər və bu, onlarda uşağa diqqəti artırıb. 2018-ci ildə balaca Kövsəri valideynləri  Naxçıvan şəhərində Heydər Əliyev Uşaq-Gənclər Yaradıcılıq Mərkəzinin rəsm dərnəyinə üzv yazdırıblar. Əməkdar rəssam Səyyad Bayramovun rəhbərlik etdiyi dərnəkdə  balaca Kövsər  yavaş-yavaş  inkişaf etməyə başlayıb.

“Sehrli fırçam” ilk fərdi sərgisi 

2019-cu ildə 5 yaşı tamam olan balaca rəssamın  mərkəzdə “Sehrli fırçam” devizi altında  ilk fərdi sərgisi keçirilib. Mərkəzin direktoru, Əməkdar rəssam Murad Babayev   Kövsərin istedad və bacarığı ilə yaşıdlarından fərqləndiyini qeyd edib və onu  diplomla mükafatlandırıb. Sərgidə iştirak edən sənətsevər  qonaqlar da  öz çıxışlarında balaca  həvəskar  rəssamın  istedad və bacarığı, rəng duyumu,  fantaziyası  ilə   öz yaşıdlarından  seçildiyini vurğulayaraq ona hədiyyələr təqdim ediblər. Və nəhayət, ailə Bakı şəhərinə köçüb və 2019-cu ilin sentyabr  ayından Kövsər Bakı şəhər 3 nömrəli Uşaq Gənclər İnkişaf Mərkəzinin “Palitra” rəsm studiyasına üzv yazılıb.

Rəsmlərində daha çox şən obrazlar

Kövsərin rəsmlərindəki zəngin rəng çalarları, əlvan kolorit, gözoxşayan kompozisiya duyumu və düşüncələrini ustalıqla  kağıza köçürməsi  onun fitri istedada malik olmasına  işarədir. Rəsmlərində daha çox rast gəldiyimiz gülən günəş, sülh göyərçinləri, təbəssümlü şən obrazlar Kövsərin xoşbəxt uşaq dünyasının  yaradıcılıq  təxəyyülünün məhsullarıdır.

“Vətənim Azərbaycan”

Kövsər mütəmadi olaraq  respublika və beynəlxalq  səviyyəli sərgilərdə,  müsabiqələrdə iştirak edir. Müxtəlif  illərdə “Mənim yay tətilim”, “Vətənim Azərbaycan” , “Koronovirusa birgə qalib gələk!”, “Evdə qalmağın xeyri” onlayn rəsm müsabiqələrində  uğur qazanaraq diplomlarla mükafatlandırılıb. Beynəlxalq Türk Mədəniyyəti və İrsi Fondunun təşkilatçılığı ilə keçirilən “Dünyamızı qoruyaq: Türk dünyasının adət-ənənələri” adlı onlayn rəsm müsabiqəsində  “Dostluq” nominasiyası üzrə “Sertifikat”,  2021-ci ilin divar və stolüstü təqvimlərinə, hədiyyəlik çantalara üz qabığı olaraq Kövsərin rəsminin nəşri (Beynəlxalq Türk Mədəniyyəti və İrsi Fondu),  1 nömrəli Uşaq-Gənclər İnkişaf Mərkəzinin təşkilatçılığı ilə “Mənim milli adət-ənənələrim” adlı beynəlxalq onlayn rəsm müsabiqəsinin qalibi olub və I yerə layiq görülüb.

“Ölkəmin nağılları”

21 sentyabr Beynəlxalq Sülh Günü münasibətilə Dünya Sülh Fondunun Yaponiyanın Goi Sülh Fondu ilə birgə ABŞ-da təşkil etdiyi 22-ci Beynəlxalq Sülh Dostları Rəsm Sərgi və Müsabiqəsində  Finalçı “Sertifikat”a, Macarıstanın Azərbaycandakı səfirliyinin təşkil etdiyi “Dyula Bentsur” uşaq rəsm sərgi müsabiqəsində diploma,  10-cu beynəlxalq “Ölkəmin nağılları” rəsm müsabiqəsində  III yerə, Londonda fəaliyyət göstərən “Cosmourse” onlayn rəsm kurslarının təşkil etdiyi “Öz evini dizayn et” mövzusunda Payız Challenge-i  “Runner Up” müsabiqəsində  mükafata layiq görülüb.  “Möcüzəli sualtı” adlı XV Beynəlxalq sualtı rəsm festivalının yekununda diplom (Rusiya), Beynəlxalq Kosmos Fondu tərəfindən təşkil edilən XI Beynəlxalq Uşaq-Gənclər rəsm müsabiqəsində “Sertifikat” (ABŞ, CO), italiyalı incəsənət tarixi doktoru dr.Antonia Pesarenin pandemiya dövründə təsis etdiyi və müəllifi olduğu layihədə ilk  beynəlxalq müsabiqə laureatı olub.

Kövsər beynəlxalq rəsm müsabiqələrində  qazandığı uğurlarını artırır. Bunun  çox böyük bir siyahını təşkil edəcəyini düşünüb bununla kifayətlənirik. Bu qədər uğura imza atan bu istedadlı  həvəskar rəssamın vur-tut  6 yaşı var.

Sifai SƏFƏROVA