|
 Naxçıvan
Dövlət Universitetində görkəmli oftalmoloq-alim,
akademik Zərifə xanım Əliyevanın anadan olmasının 90-cı
ildönümünə həsr olunmuş elmi konfrans keçirilmişdir.
Konfransdan əvvəl universitetin tibb fakültəsində "Stomatologiya"
laboratoriyası və "Əczaçılıq tədrisi" kabinetinin
açılışı olmuşdur.
Universitetin rektoru, akademik İsa Həbibbəyli qeyd
etmişdir ki, Azərbaycan Prezidenti İlham Əliyevin
akademik Zərifə Əliyevanın 90 illik yubileyinin
keçirilməsi haqqında Sərəncamına və Naxçıvan Muxtar
Respublikası Ali Məclisinin sədri Vasif Talıbovun
tədbirlər planına uyğun olaraq müxtəlif tədbirlər
keçirilməkdədir. Tibb fakültəsində yeni laboratoriya və
kabinetin yaradılması da Azərbaycan tibb elminin
görkəmli simalarından olan Zərifə xanım Əliyevanın
anadan olmasının 90 illiyinə töhfədir. Tədbir
iştirakçıları stomatologiya və əczaçılıq ixtisası üçün
alınmış müasir tibbi avadanlıqlar və tədris vəsaitləri
ilə tanış olmuşlar.
Elmi konfransda rektor, akademik İsa Həbibbəyli çıxış
edərək dünya şöhrətli alimin oftalmologiya sahəsində
qazandığı nailiyyətlərdən, elmi və ictimai
fəaliyyətindən, mənalı ömür yolundan danışmışdır. O
bildirmişdir ki, xalqımızın qəlbində əbədi yaşayan
görkəmli elm xadimi Zərifə xanım Əliyevanın mənalı ömür
yolu, əziz xatirəsi elmin işığında, nur verdiyi
insanların qəlbində əbədi yaşayacaqdır.
"Akademik Zərifə xanım Əliyevanın həyatı və elmi-pedaqoji
fəaliyyəti" mövzusunda məruzə etmiş tibb fakültəsinin
dekanı, dosent Bəhruz Məmmədov görkəmli alimin
Azərbaycan tibb elminin inkişafındakı xidmətlərindən
danışmışdır. Qeyd olunmuşdur ki, Zərifə xanım Əliyeva
görmə orqanında peşə xəstəliyini öyrənən ilk görkəmli
alimdir. Zərifə xanım Əliyeva gərgin həkimlik və
alimlik fəaliyyətindən, harada yaşamasından və
işləməsindən asılı olmayaraq həmişə Naxçıvanla sıx bağlı
olmuş, regionda bir sıra təhlükəli göz xəstəliklərinin
müalicə edilməsində öz səylərini əsirgəməmiş, yüzlərlə
insana dünyada əvəzedilməz nemət olan göz işığı bəxş
etmişdir. Bütün bunlara görə də Zərifə xanım Əliyevanın
adı hər bir azərbaycanlı üçün doğma və əzizdir.
Tibb fakültəsinin klinik xəstəxanasının baş həkimi, tibb
üzrə fəlsəfə doktoru Yaşar Rzayev "Azərbaycan
oftalmologiya elminin tükənməz xəzinəsi" mövzusunda
məruzəsində vurğuladı ki, Zərifə xanım Əliyevanın
alimlik fəaliyyətinin əsas istiqamətlərindən birini də
peşə oftalmologiyası təşkil edirdi. "Azərbaycanın kimya
sənayesi müəssisələrində işçilərdə görmə orqanlarının
vəziyyəti" mövzusunda doktorluq işi yazaraq
oftalmologiyada peşə xəstəlikləri problemlərinin əsasını
qoymuşdur. Bütün bu tədqiqatların uğurlu nəticələrinə
görə Zərifə xanım Əliyeva oftalmologiyada ən mötəbər
mükafata - akademik M.İ.Averbax adına mükafata layiq
görülmüşdür.
| 