ADPU-nun nəzdində Azərbaycan Dövlət Pedaqoji Kollecində ümummilli lider Heydər Əliyevin 95 illik yubileyinə həsr olunmuş   “Mənalı ömrün izi ilə” adlı tədbir keçirilib. Tədbirdə Yasamal Rayon İcra Hakimiyyətinin, Rabitə İşçiləri Həmkarlar İttifaqı Respublika Komitəsinin nümayəndələri, müəllimlər  və KİV əməkdaşları iştirak ediblər.

Azərbaycan Dövlət Pedaqoyi Kollecinin direktoru, hüquq üzrə fəlsəfə doktoru Qulu  Novruzov ümummilli lider Heydər Əliyevin həyat yoluna nəzər salıb. Ulu öndərin nəsillərə örnək olan şərəfli həyat yolundan, milli dövlətçilik  tariximizdəki misilsiz  xidmətlərindən  danışan Q.Novruzov Heydər Əliyevin əziz  xatirəsinin  xalqımızın yaddaşında  əbədi yaşayacağını bildirib.

Tədbirdə Yasamal Rayon İcra Hakimiyyətinin şöbə müdiri  Zöhrab  Cəfərov, “İki sahil”  qəzetinin  baş redaktoru Vüqar Rəhimzadə və başqaları da  çıxış ediblər.

Qeyd olunub ki, müasir Azərbaycan dövlətinin banisi Heydər Əliyevin misilsiz idarəçilik bacarığı, gərgin əməyi nəticəsində əldə olunmuş nailiyyətlər sonrakı illərdə ölkə iqtisadiyyatının davamlı və dinamik inkişafı üçün  möhkəm zəmin yaratdı.  Ulu öndərin  daxili və xarici siyasəti nəticəsində  ölkədə  sabitlik  yarandı.

Kollecin tələbələrinin ifasında ulu öndərə aid şeir söylənilib, mahnı oxunub, rəqs edilib və  ədəbi-bədii kompozisiya  nümayiş olunub.

Sonda qonaqlar  tələbələrlə xatirə şəkli çəkdiriblər.

Şakir CƏFƏROV