Son  vaxtlar azərbaycanlı gənclərin dünyanın nüfuzlu elmi  nəşrlərində müntəzəm olaraq tədqiqat məhsulları ilə çıxış etmələri onların  intellektual potensialından və tədqiqatçılıq bacarıqlarından xəbər verir.   Bu,  olduqca sevindirici və qürurlandırıcı məqamdır.  Bu günlərdə  Böyük Britaniyanın London İqtisadiyyat və Siyasi Elmlər Məktəbinin məzunu,    Azərbaycan Elm Assosiasiyasının həmsədri, gənc tədqiqatçı İnqilab Şahbazovun    növbəti məqaləsi "International Journal of Law, Crime and Justice"  jurnalında (impakt faktoru 0.846) dərc olunub.  ''Exploring the attitudes of university students and criminal justice professionals towards electronic monitoring in Azerbaijan: a focus group study'' adlı kriminoloji tədqiqatda   bir sıra əhali qrupları üzrə respondentlərin alternativ cəza tədbirləri (elektron bilərzik) haqqındakı rəyləri öyrənilib.  Araşdırma nəticəsində məlum olub ki,   universitet tələbələri və hüquq-mühafizə orqanlarında çalışan 35 nəfərin əksəriyyəti elektron bilərziyin istifadəsini reabilitasiya imkanlarına görə dəstəkləsə də, onun potensial cinayətkarlarda qorxu yaratmaq gücünün zəif olduğu qənaətindədirlər.

Məqalənin tam forması ilə  www.sciencedirect.com/science/article/pii/S1756061619300783   səhifəsindən tanış olmaq olar.
  

Qeyd edək ki,  İnqilab Şahbazovun  BDU-nun "Cinayət hüququ"  kafedrasının müəllimi  Elsevər Muradovla qələmə aldıqları  ''Excessive use of pre-trial detention in Azerbaijan: Examination of the causes'' adlı məqalə bu ilin əvvəllərində  Hollandiyanın  hüquq və kriminologiya elmləri sahəsində yüksək nüfuza malik "International Journal of Crime, Law and Justice"  elmi jurnalında  (0,724)  dərc edilib.  Məqalə  yüksək nüfuzlu jurnallarda Azərbaycanın ədliyyə sistemi barədə ilk  elmi-tədqiqat işi kimi tarixə düşüb. Məqalədə həbs qəti imkan tədbirinin normadan artıq istifadəsi, bunun səbəbləri və həlli istiqamətində bütün dünyada atılan addımlardan bəhs edilir. İnqilab Şahbazovun  bu yaxınlarda  çapdan çıxmış  "Tədqiqat metodları" adlı  kitabı da  gənc tədqiqatçının Azərbaycan elminə töhfəsidir.

Oruc MUSTAFAYEV