“Clarivate Analytics”  Şirkətinin Təhsil Proqramları üzrə şöbəsinin rəhbəri Valentin Bogorov Lənkəran Dövlət Universitetində (LDU) olub. LDU-nun rektoru vəzifəsini icra edən professor Natiq İbrahimov son illər universitetdə ali təhsilin davamlı inkişafına nail olunması, alimlərin elmi məqalələrinin nüfuzlu beynəlxalq nəşrlərdə dərc olunmasına dəstək göstərilməsi istiqamətində görülən işlər barədə qonağa ətraflı məlumat verib. 2015-ci ildə Təhsil Nazirliyi ilə dünyanın ən böyük elektron elmi-analitik informasiya bazası olan “Clarivate Analytics” (əvvəlki adı "Thomson Reuters") şirkəti arasında əməkdaşlıq sazişinin imzalandığını xatırladan universitet rəsmisi bildirib ki, hazırda Azərbaycanın 40 ali təhsil müəssisəsi “Web of Science®” elmi platformasına çıxış əldə edib və bu universitetlər arasında LDU da var.

“Clarivate Analytics” ilə əməkdaşlığın artıq müsbət nəticələr verdiyini deyən Valentin Bogorov bildirib ki, son 5 ildə Azərbaycan alimlərinin impakt faktorlu jurnallarda dərc olunmuş məqalələrinin ölkə üzrə ümumi sayı 74 faiz artıb, ali təhsil müəssisələri üzrə müvafiq göstərici 88 faiz təşkil edib. “Web of Science®” elmi bazasında 2017-ci ildə 1160 elmi-tədqiqat işi qeydə alınıb ki, bu da son 25 ildə Azərbaycan üzrə publikasiya sayında rekord göstəricidir. Həmin məqalələrin, təxminən, 43 faizi ali təhsil müəssisələrinin payına düşür. “Web of Science®” bazasına daxil olan məqalələrin artım dinamikasına görə Azərbaycan son 3 ildə Cənubi Qafqaz ölkələri arasında davamlı olaraq 1-ci yerdə qərarlaşıb. 2015-ci ildə Azərbaycandan cəmi 2 jurnal “Web of Science®” bazasında indeksləşdirilmişdisə, 2017-ci ildə bu göstərici 7-yə çatıb.

Şirkət təmsilçisi qeyd edib ki, “Clarivate Analytics”  ilə Azərbaycan ali təhsil müəssisələri arasında əməkdaşlığın növbəti 3 il ərzində davam etdirilməsinə dair  qəbul edilmiş qərar, həmçinin Təhsil Nazirliyi ilə “Clarivate Analytics” şirkəti arasında 2018-2021-ci illəri əhatə edən əməkdaşlıq üzrə Fəaliyyət Planı  Azərbaycanda elmin inkişafına böyük təkan verəcək.

Sonra Təhsil proqramları üzrə şöbənin rəhbəri Valentin Bogorov LDU-da professor-müəllim heyəti, doktorant və magistrantların birgə iştirakı ilə “Web of Science®” bazasından istifadə qaydaları, bu şəbəkənin məlumat bazasında yerləşən elmi məqalələr, onlardan istifadə yolları, elmi nəşrlər və sair barədə geniş maarifləndirici seminar keçirib. Seminarda LDU-dan olan alimlərin də bu  nəşrlərdə elmi məqalələr çap etdirməsini yüksək dəyərləndirən V.Bogorov digər əməkdaşları, bütövlükdə Lənkəran Dövlət Universitetini bu qurumla  sıx əlaqələr qurmağa dəvət edib, universitet kitabxanasına yeni elmi ədəbiyyat hədiyyə edib.

Sonda iştirakçıları maraqlandıran suallar cavablandırılıb.