Sentyabrın 18-19-da Elm və Ali Təhsil üzrə Dövlət Agentliyinin təşkilatçılığı və QS Beynəlxalq Reytinq Agentliyinin regional direktoru Sergey Xristolyubovun iştirakı ilə ali təhsil müəssisələrinin beynəlxalq reytinqlər üzrə məsul şəxsləri arasında növbəti təlim və komanda quruculuğu görüşü baş tutub.

 

Bu barədə "Azərbaycan müəllimi"nə  agentlikdən məlumat verilib.

 

Açılış nitqi ilə çıxış edən Elm və Ali Təhsil üzrə Dövlət Agentliyinin direktoru Ülkər Səttarova əsas hədəfin yerli universitetlərin beynəlxalq reytinqlərdəki mövqeləri deyil, müəssisələrin daxilində təhsil və elmi prosesləri əks etdirməsi olduğunu qeyd edib. Eyni zamanda  beynəlxalq reytinqlərdə iştirakın ali təhsil müəssisələrinin beynəlxalq nüfuzunun artırılması üçün yaratdığı imkanların və qarşıda duran hədəflərə nail olmaq üçün ali təhsil müəssisələri arasında əməkdaşlığın əhəmiyyətini vurğulayıb. Direktor qeyd edib ki, ali təhsil müəssisələrinin siyasətinin və uzunmüddətli strategiyasının müəyyənləşdirilməsi üçün beynəlxalq reytinqlərdə iştirak nəticəsində üzə çıxan təhlillər vacib amillərdən biridir. 

 

QS Agentliyinin regional direktoru Sergey Xristolyubov “Ali təhsil müəssisələrinin qlobal rəqabətə davamlılığının artırılmasında reytinqlərin rolu” mövzusunda təqdimatla çıxış edib və Azərbaycan üzrə təhlil məlumatlarlarına əsaslanan hesabatları təqdim edib. Eyni zamanda, görüş çərçivəsində reytinq göstəriciləri üzrə mövqelərin yaxşılaşdırılması üçün yaradılan imkanlar və prosesdə yaranan çətinliklər barədə geniş müzakirələr aparılıb.

Sonda sessiya iştirakçılarına sertifikatlar təqdim olunub.

 

Qeyd edək ki, “Beynəlxalq görünürlük, beynəlmiləlləşmə və inkişaf” mövzularında məlumatlılığının artırılması məqsədilə təşkil olunmuş sessiyada 30 ali təhsil müəssisəsindən nümayəndələr iştirak edib.