Fövqəladə Hallar Nazirliyinin (FHN) Tikintidə Təhlükəsizliyə Nəzarət Dövlət Agentliyinin S.Ə.Dadaşov adına Elmi-Tədqiqat və Layihə-Konstruktor İnşaat Materialları İnstitutu ilə Azərbaycan Memarlıq və İnşaat Universiteti (AzMİU) arasında əməkdaşlıq müqaviləsi imzalanıb.

 

AzMİU-dan "Azərbaycan müəllimi"nə  bildirilib ki, əməkdaşlıq müqaviləsində AzMİU-nun İnşaat konstruksiyaları kafedrası ilə institut arasında əlaqələrin genişləndirilməsi, birgə elmi-tədqiqat işlərinin aparılması, inşaat konstruksiyaları üzrə sınaqların həyata keçirilməsi, birgə kadr hazırlığı və bu kimi məsələlər nəzərdə tutulub.

 

Sənədi AzMİU-nun rektoru professor Gülçöhrə Məmmədova və S.Ə.Dadaşov adına Elmi-Tədqiqat və Layihə-Konstruktor İnşaat Materialları İnstitutunun direktoru Rüstəm Bağırov imzalayıblar.

 

Müqavilənin imzalanması və əməkdaşlıq məsələlərinin müzakirə edilməsi məqsədilə FHN Tikintidə Təhlükəsizliyə Nəzarət Dövlət Agentliyinin direktor müavini Elxan Əsədovun rəhbərlik etdiyi nümayəndə heyəti AzMİU-da olub.

 

Qonaqlarla görüşdə AzMİU-nun rektoru professor Gülçöhrə Məmmədova universitetin elmi-texniki potensialı, professor-müəllim heyəti və tədqiqat istiqamətləri haqqında ətraflı məlumat verib. Rektor bildirib ki, elmi potensialın inkişafını dəstəkləyən mexanizmlərin tətbiqi ilə mövcud potensialı inkişaf etdirmək və nəticədə qlobal arenada universitetin reytinqli ali təhsil müəssisəsinə çevrilməsini əhəmiyyətli dərəcədə sürətləndirmək mümkündür. Müasir dövrdə universitetlərin beynəlxalq elm arenasında tanınmasını şərtləndirən əsas amilin “QS”, “THE” və bu kimi digər aparıcı reytinq sistemlərindəki yeri olduğunu vurğulayan professor Gülçöhrə Məmmədova qeyd edib ki, bu reytinq sistemlərində təmsil olunmağın ən vacib meyarlarından biri universitetin elmi-tədqiqat fəaliyyətidir: “Qarşıya qoyulan hədəflərə çatmaq üçün Azərbaycan Memarlıq və İnşaat Universitetində sistemli işlər həyata keçirilir. Yeni tədqiqat laboratoriyalarının yaradılması, aktiv elmi-tədqiqatla məşğul olan alimlərin sayının artırılması ilə yanaşı, AzMİU-nun elmi-tədqiqat institutları ilə mövcud əlaqələri daha da inkişaf etdirilir, yeni əməkdaşlıqlar qurulur.

 

Hesab edirəm ki, S.Ə.Dadaşov adına Elmi-Tədqiqat və Layihə-Konstruktor İnşaat Materialları İnstitutu ilə əməkdaşlığın genişləndirilməsi inşaatın bir sıra istiqaməti üzrə tədqiqatın səviyyəsini yüksəldəcək, yeni elmi-texniki ixtiraların, metodların formalaşması ilə nəticələnəcək”.

 

Görüşdə Fövqəladə Hallar Nazirliyi Tikintidə Təhlükəsizliyə Nəzarət Dövlət Agentliyinin direktor müavini Elxan Əsədov agentliyin fəaliyyət istiqamətləri, tədqiqat obyektləri haqqında ətraflı məlumat verib. Direktor müavini agentliyin texniki imkanları, nümunələrin götürülməsi, sınaq edilməsi və nəticələrinin rəsmiləşdirilməsi prosedurları, eləcə də tikinti materiallarının standartlaşdırılması sahəsində görülmüş işlər barədə danışıb: “AzMİU inşaat sahəsi üzrə böyük elmi potensiala, professor-müəllim heyətinə, tədqiqatçılara sahibdir. S.Ə.Dadaşov adına Elmi-Tədqiqat və Layihə-Konstruktor İnşaat Materialları İnstitutunun bazasında mövcud olan laboratoriyaları və AzMİU-nun elmi potensialını nəzərə alsaq, deyə bilərik ki, əməkdaşlığımız ölkəmiz, o cümlədən inşaat sektorumuz üçün mühim nəticələrin əldə olunmasına yol açacaq”.

 

Daha sonra nümayəndə heyətlərinin də iştirakı ilə müzakirələr aparılıb. Müzakirələrdə Elektron Beton İzləmə Sisteminin (EBİS) təşkili, onun proqram təminatının hazırlanması və texniki müşayiəti, binaların dayanıqlılığının innovativ üsullarla artırılması, texnologiyanın imkanlarından istifadə edərək yeni növ və səmərəli inşaat materiallarının əldə olunması və digər məsələlərə toxunulub.

 

Bundan əlavə, AzMİU və FHN Tikintidə Təhlükəsizliyə Nəzarət Dövlət Agentliyinin birgə təşkilatçılığı ilə beynəlxalq konfransın keçirilməsi ilə bağlı ilkin razılıq əldə olunub.