2024-2025-ci tədris ili üçün bir sıra lisey və gimnaziyaların rus bölməsi üzrə uşaqlar I sinfə müsabiqəsiz qəbul edilib.

 

"Azərbaycan müəllimi" xəbər verir ki, bu barədə Məktəbəqədər və Ümumi Təhsil üzrə Dövlət Agentliyi (MÜTDA) məlumat yayıb.

 

Qeyd edilib ki, rus bölməsi üzrə birinci sinfə qəbulu müsabiqə yolu ilə aparılan ümumi təhsil müəssisələrinə qeydiyyat iyunun 20-də tamamlanıb. Bir sıra lisey və gimnaziyaların rus bölməsi üzrə birinci sinfinə qəbul üçün nəzərdə tutulmuş boş yerlərin sayı müraciət edən uşaqların sayından çox olduğundan müsabiqə ləğv edilib.

 

Müsabiqəyə qeydiyyatdan keçirilən uşaqlar müsabiqədə iştirak etmədən I sinfə qəbul edilib.

 

Qeyd edək ki, 2024-2025-ci tədris ili üçün lisey və gimnaziyaların rus bölməsi üzrə uşaqların I sinfə qeydiyyatına 12 iyun tarixində start verilib. Uşaqların elektron qaydada məktəbə qəbulunda hər bir valideyn üçün əlçatanlığın təmin edilməsi həyata keçirilir.