Oktyabrın 26-da VI Bakı Beynəlxalq Humanitar Forumun iştirakçıları olan Moskva Dövlət Linqvistik Universitetinin (MDLU) rektoru, professor İrina Krayeva, amerikalı politoloq, beynəlxalq jurnalist Piter Teys və Almaniyanın Berlin Humboldt Universitetinin “Azərbaycan tarixi” kafedrasının müdiri, professor Yeva Mariya Aux Bakı Slavyan Unversitetində (BSU)  olublar.

Qonaqları qəbul edən BSU-nun rektoru, professor Nurlana Əliyeva rəhbərlik etdiyi ali təhsil müəssisəsinin beynəlxalq  elmi əlaqələri, dünyanın tanınmış universitetləri ilə qurulan əməkdaşlıq çərçivəsində tələbə və müəllim mübadiləsi, elmi-pedaqoji kadrların ixtisaslarının artırılması sahəsində beynəlxalq əməkdaşlıq və digər məsələlər barədə söz açıb. BSU-nun Moskva Dövlət Linqvistik Universiteti ilə əlaqələrindən danışan N.Əliyeva qeyd edib ki, hər iki ali təhsil müəssisəsi arasındakı müqaviləyə əsasən birgə elmi tədbirlər təşkil olunur, elmi nəşrlər hazırlanır və bir sıra başqa istiqamətlər üzrə faydalı əməkdaşlıq həyata keçirilir. BSU tərəfindən xaricdə Azərbacan dili və mədəniyyəti mərkəzinin ilk dəfə məhz MDLU-da açıldığını deyən N.Əliyeva BSU-da fəaliyyət göstərən Rusiya Tədris və Mədəniyyəti Mərkəzi nəzdində “Moskva auditoriyası” barədə məlumat verib. Söhbət zamanı N.Əliyeva Almaniyanın təhsil müəssisələri ilə də BSU-nun əlaqələrinə toxunub. O bildirib ki, BSU-da 2010-cu ildən bəri “Alman filologiyası” kafedrası, 2015-ci ildən isə Germanistika İnstitutu fəaliyyət göstərir. Rektor, o cümlədən institut nəzdində Vilhelm fon Humboldt adına alman dili və mədəniyyəti mərkəzinin işindən, alman dili ixtisası üzrə kadr hazılığından söz açıb.

Azərbaycan dövlətinin təhsilə qayğısını yüksək qiymətləndirən MDLU-nun rektoru, professor  İrina Krayeva  BSU-dakı təhsil sisteminin, burada yaradılan şəraitin bunun bariz nümunəsi olduğunu deyib. BSU ilə MDLU arasındakı əməkdaşlığın Azərbaycan və Rusiya ali məktəbləri arasında əlaqələrin daha da möhkəmlənməsinə xidmət etdiyini vurğulayan İ. Krayeva MDLU-dakı Azərbaycan dili və mədəniyyəti mərkəzində Azərbaycanın mədəniyyətinin, tarixi ənənələrinin yüksək səviyyədə əcnəbi tələbələrə tədris olunduğunu və rusiyalı tələbələrin Azərbaycan dilinə olan marağını xüsusi qeyd edib.

Sonra tərəflər BSU ilə Moskva Linqivistik Universiteti arasında 2005-ci ildən mövcud olan əməkdaşlığa dair yenilənmiş müqaviləni  imzalayıblar.

Tədbirin sonunda qonaqlar Moskva və Sankt-Peterburq Tədris Mədəniyyət mərkəzlərində, Türkiyə Araşdırmaları Tədris Mədəniyyət Mərkəzində olub, auditoriyalarda dərslərin gedişini izləyiblər. Qonaqlar BSU-nun Akt zalında slavyan ölkələrinin, Türkiyə və Azərbaycanın milli rəqslərinə tamaşa ediblər.