Böyük Britaniyanın ali təhsil xidmətləri sahəsində ixtisaslaşmış “Times Higher Education” (THE) nəşrinin biznesin inkişafı üzrə direktoru Maykl Lyubaç hesab edir ki, reytinqlər ali  təhsil müəssisələrinə qlobal brend şüurunu artırmağa, strateji tərəfdaşlıqlar qurmağa və beynəlxalq istedadları cəlb etməyə kömək edir. M.Lyubaç “Universitetlər dünya reytinqində niyə iştirak etməlidirlər?” adlı məqaləsində qlobal reytinqdə iştirakın ali təhsil müəssisələrinə verə biləcəyi yeddi fayda barədə yazır: 

1. Təşkilati idarəetmə və strategiya

Reytinqlər təşkilatın fəaliyyəti ilə bağlı sağlam daxili dialoqu təşviq edir. İqtisadi Əməkdaşlıq və İnkişaf Təşkilatının (OECD) universitet liderləri arasında apardığı sorğuya əsasən, onların 68%-i strateji, təşkilati, idarəetmə və ya akademik dəyişiklikləri həyata keçirmək üçün reytinqlərdən idarəetmə vasitəsi kimi istifadə edir. Reytinqlər institusional səviyyədə və ya konkret departamentlər daxilində məqsədyönlü razılaşmalar yaratmaq üçün istifadə oluna bilər və bir çox qurumlar belə mövzuları müzakirə etmək üçün xüsusi rəhbər komitələr yaradırlar.

2. Brend və tanınma

Tələbələr və onların ailələri, eləcə də bütün dünya üzrə alimlər, universitet rəhbərləri və hökumətlər üçün mühüm resurs olan World University Rankings hər il 30 milyondan çox insanı vebsaytımıza cəlb etməyə kömək edir və onlar bütün dünyada qəzetlərin manşetlərinə çevrilir; yüz milyonlarla insana təsir edir. Avropa Universitetlər Assosiasiyası (EUA) tərəfindən 2014-cü ildə 39 ölkədən 171 ali təhsil müəssisəsi arasında aparılan sorğu nəticəsində məlum olub ki, universitetlərin 34-dən çoxu öz reytinq mövqelərindən marketinq və tanıtım məqsədləri üçün istifadə edib.

3. Əməkdaşlıq və tərəfdaşlıqlar

Reytinqlər əməkdaşlıq və tərəfdaşlıq üçün qurumları müəyyən etmək baxımından mühüm başlanğıc nöqtəsi ola bilər. Yüksək reytinqli tərəfdaşa sahib olmaq, öz növbəsində, qurumun reputasiyasını yüksəldə bilər. EUA sorğusunda iştirak edən respondentlərin yarıdan çoxu bu reytinqlərin onların institutlarına akademik tərəfdaşlıq qurmağa və beynəlxalq əməkdaşlığı təşviq etməyə kömək etdiyini bildirib. Qeyd etmək vacibdir ki, universitetin THE reytinqlərində iştirakı ali təhsil sektorundan kənar bir qurum və ya şirkətin sizi tərəfdaş seçib-seçməməsinə və ya maliyyə qurumunun universitetinizdə tədqiqata investisiya qoymasına təsir edə bilər.

4. İşə qəbul

Tələbələr arasında keçirilmiş “THE Student Pulse” sorğusu göstərdi ki, universitet reytinqi gələcək beynəlxalq tələbələr arasında harada təhsil alacaqlarını seçərkən, ən çox araşdırılan ikinci amildir və respondentlərin 34%-i bunun onlar üçün təhsil qiymətlərindən sonra və təklif olunan kurslardan əvvəl vacib olduğunu deyib. Alimlər də öz sahələrində prestijli sayılan qurumlarda iş axtarmağa meyillidirlər.

5. Müqayisəli təhlil

THE 100-dən çox ölkə və regionda 3500-dən çox universitetdən 10 milyondan çox fərdi məlumat toplayıb, bənzərsiz məlumat toplusu yaradıb və THE-ni ali təhsil analitikasında qlobal lider kimi qurub. Universitet liderləri performansa nəzarət etmək, strategiya hazırlamaq və həmkarları  ilə müqayisə etmək üçün reytinqlərdən tutmuş əsas performans göstəricilərindən getdikcə daha çox istifadə edirlər. EUA sorğusunda iştirak edən respondentlərin böyük əksəriyyəti öz qurumlarının reytinqlərdəki fəaliyyətini izlədiklərini və qurumun yüksək səviyyəli rəhbərliyinin bu prosesdə iştirak etdiyini bildirib. Bəzilərinin hətta bunun üçün xüsusi personalı və ya bölmələri var.

Bençmarkinq və analitik proqram təminatı olan “DataPoints” 2016-cı ildə universitetin fəaliyyətinin bütün əsas sahələri üzrə təfərrüatlı performans məlumatı təqdim etmək və digər institutlarla - istər rəqiblər, istərsə də tərəfdaşlar - region, mövzu və digər əsas meyarlar üzrə müqayisə etmək üçün istifadəyə verilib.

6. Məlumatların toplanması

THE reytinqlər təşkilatlara hərtərəfli, yüksək keyfiyyətli məlumat və institusional fəaliyyət haqqında məlumat toplamaq bacarıqlarını təkmilləşdirməyə kömək edir. Reytinqlər həm milli, həm institusional səviyyədə müqayisəli məlumatların müzakirəsinə və toplanmasına təsir edir, həm də geniş ictimaiyyət üçün məlumatların dərc olunmasını təşviq edir.

7. Reputasiya

Reytinqlərimiz dünya üzrə universitetlərə tədqiqat, tədris və davamlılıq sahəsində nailiyyətlərini qeyd etmək üçün bir platforma təqdim edir. THE reytinqlərinin qlobal populyarlığı və təsiri universitetlərin sosial təsirini vurğulamağa, müsbət ictimai dialoq yaratmağa və universitetlərin nailiyyətlərini,  nüfuzunu artırmağa kömək edir. OECD sorğusuna əsasən, universitet liderləri reytinqlərin bir qurumun mövqeyini və nüfuzunu qoruyub saxlamağa və artırmağa kömək etdiyinə inanırlar. Bundan əlavə, EUA sorğusunda iştirak edən respondentlərin 63%-i reytinqlərin onların təşkilatının nüfuzuna, ümumilikdə müsbət təsir etdiyini bildirib.

Oruc MUSTAFAYEV