Çağrı mərkəzləri, ASAN Xidmət mərkəzlərində təşkil edilən elektron xidmətlər, elektron müraciət imkanı yaradan portal.edu.az, həmçinin “Whatsapp” və sosial media platformaları. Bütün bu vasitələrdən istifadə edərək Elm və Təhsil Nazirliyinə üz tutanlar hər gün minlərlə müraciətin harada toplandığını, kimin əlindən keçdiyini düşünmür. Çoxumuz yığdığımız üçrəqəmli nömrələrə cavab verən həzin, mülayim, sakit səsin sahibi ilə də maraqlanmır. Nəyinə lazımdır, elə deyil? Onu, sadəcə qarşılaşdığı problem və çıxış yolu narahat edir. Müraciətini göndərir, cavabını gözləyir.

Amma “Azərbaycan müəllimi” qəzeti üçün maraqlıdır. Çoxçeşidli platformalarla bu qədər geniş auditoriyadan göndərilən müraciətlər harada araşdırılır, necə cavablandırılır? Bu auditoriyanın, ümumilikdə 2.4 milyon insanı əhatə edən təhsil sistemi olduğunu nəzərə alsaq, üstəlik, sistemdəki ailələrini, yaxınlarını, valideynlərini də hesaba qatsaq, mənzərənin ciddiliyi nəzərimizdə aydınlaşar.

Gəlin görək, təhsil sistemində müraciətləri araşdıran və cavablandıran şəxslər kimlərdir?

Elm və Təhsil Nazirliyi ilə vətəndaşlar arasındakı körpü

Onlar İnformasiya və vətəndaşlara xidmət şöbəsində birləşiblər. Bu şöbə təhsil sistemi ilə  və vətəndaş arasında “körpüdür”.

Elm və təhsil sistemində vətəndaşlar üçün çətinliyə çevrilən məsələləri həll etmək üçün şöbənin vətəndaş xidmətləri çox genişdir.

Vətəndaşların qəbulu mərkəzində: ÜZ-ÜZƏ

Beləliklə, “Azərbaycan müəllimi” nazirliyə üz tutanların girdiyi ilk qapıdadır. Burada vətəndaşların qəbulu həyata keçirilir. Elm və Təhsil Nazirliyində şagird yerdəyişməsinin hələ başlamadığı günlərdən birinə təsadüf etdiyindən, bu zalın nisbətən sakit olduğu günlərdən biridir. Amma vətəndaşların suallarının cavablandırıldığı 6 masanın hamısı doludur. Məsələn, masalardan birində cavab gözləyən Sevda Sadıqova nazirliyə yaranmış çətinliyə görə gəlib. Sabirabad rayonunda yaşayan qardaşı Türkədi kənd şəhid Ramin Məmmədov adına tam orta məktəbin VIII sinfində oxuyan oğlunun təhsilinə görə narahatdır. Çünki oğlu bir il gec qeydiyyatdan keçib: “Uşaq bacısı ilə eyni sinfə gedib, hətta bacısından da yaxşı oxuyur. Ancaq valideynə xəbər veriblər ki, oğlan məktəbə vaxtında qeyd olunmayıb. Yəni faktiki VIII sinifdə oxuyan uşaq məktəbin qeydiyyatında VII sinif şagirdidir. Baş verən çətinliyi nazirliyə çatdırmağa gəlmişəm”.

Səidə Quliyeva 2006-2012-ci illərdə Kazan Dövlət Tibb Universitetində təhsil alıb.Təhsilini tamamladıqdan sonra Azərbaycana qayıdıb və  həmin vaxt diplomu təsdiq olunub. Lakin həmin təsdiq itdiyindən yenidən sənədlərini toplayaraq Elm və Təhsil Nazirliyinə müraciət edib.

Məsumə Əhmədova övladını məktəbəqədər hazırlıq qruplarına qeyd etməyə gecikib. Bakıxanov qəsəbəsində yaşayan ailə nazirliyə müraciət edib: “Gəldim ki, oğlum məktəbdən qalmasın və nazirlik onun məktəbəqədər qruplarda təhsilə başlaması üçün mənə kömək etsin”.

Zemfira Abdullayeva nəvəsinə görə buradadır: “Nəvəm Sevər Həsənzadə Astara Pedaqoji Kollecində oxuyub. Fortepiano üzrə ixtisası bitirər-bitirməz ailə qurub və diplomunu almayıb. Həmin ixtisas bağlandığı üçün o, diplom üçün nazirliyə müraciət edib. Nəvəm Astarada yaşayır və biri 3, o biri 4 yaşında 2 uşağı var. Uşaqlar böyüyüb və nəvəm artıq çalışmaq istəyir”.

Gülər Quliyeva MİQ-də iştirak edərək 50 bal toplayıb və müddətli müqavilə ilə Bilgəh qəsəbəsində ona iş təklif olunub. Təklifi qəbul edərək 11 nömrəli inteqrasiya təlimli internat məktəbində ingilis dili müəllimliyinə başlayıb: “Sənədlərimi məktəbə təqdim etdim, 2 həftədir dərs də deyirəm, amma şəxsi kabinetimə indiyədək təsdiq gəlməyib”.

Ceyhun Heydərov Düzcə Universitetində Turizm ixtisası üzrə III kurs tələbəsidir. Növbəti tədris ilindən Azərbaycana köçürülmək istəyir: “Xaricdə təhsil almaq arzusu ilə bu universiteti seçmişdim. Amma ailə vəziyyəti ilə əlaqədar artıq təhsilimi xaricdə davam etdirə bilməyəcəyəm. Ona görə də ixtisasım üzrə Azərbaycandakı universitetlərdə davam etməyi düşünürəm. Bunun mümkün olması üçün məndən nə tələb olunur, öyrənməyə gəldim”.

C.Heydərovu 6-cı masada qəbul edən İnformasiya və vətəndaşlara xidmət şöbəsinin əməkdaşı Mikayıl Allahverdiyev ona məlumat verir ki, tələbələrin köçürülməsi həyata keçirilən zaman transfer.edu.az portalından elektron qaydada müraciət edə bilər. “Köçürülmənin başlanma vaxtı barədə nazirliyin rəsmi saytında məlumat veriləcək”.

İnformasiya və vətəndaşlara xidmət şöbəsinin Vətəndaşların qəbulu Mərkəzinin rəhbəri Rəşad Nəsibov bu mərkəz haqqında: “Elm və təhsil sahəsində çətinliyi yaranan və bizə üz tutan vətəndaşlara əlimizdən gələn köməyi əsirgəmirik”.

R.Nəsibov iş yükünü belə izah edib: “Müşahidələr göstərir ki, insanlar üz-üzə münasibətlərə daha çox üstünlük verirlər. Bu il ərzində 16 mindən çox müraciət qəbul etmişik. Onların arasında şəhid ailələri, qazilər, müharibə veteranları, hərbçilər olub ki, onları hər zaman növbədənkənar qəbul edirik. Çalışırıq ki, problemlərinə daha həssas yanaşaq, gözlətməyək və qarşılaşdıqları çətinliklərin asan yolla həllini göstərək”.

R.Nəsibov özlərinin qarşılaşdıqları çətinliklərdən də danışıb: “Bəzi hallarda qəbul mərkəzlərinə bir vətəndaşın məsələsinə görə başqası, üçüncü şəxslər gəlir və nəticədə kömək etməyimiz çətinləşir”.

O qeyd edib ki, Elm və Təhsil Nazirliyi humanistliyinə, vətəndaşyönümlü olduğuna görə dövlət qurumları arasında ilk sıralarda yer alır: “Problemi qanunvericilik əsasında vətəndaşın xeyrinə həll etmək üçün əlimizdə alternativ variant varsa, ondan mütləq istifadə edirik ki, vətəndaş məmnun qalsın”.

146 Çağrı Mərkəzinə xoş gəlmisiniz!

“Elm və Təhsil Nazirliyinin 146 Çağrı Mərkəzinə xoş gəlmisiniz”!

Bu 3 rəqəmi daxil edən kimi eşitdiyimiz səs sonrakı prosesi idarə edir, hansı rəqəmin nazirliyin hansı tabe qurumuna çıxış imkanı yaratdığını söyləyir.

Bu, Elm və Təhsil Nazirliyinin vətəndaşlarla təqdim etdiyi xidmətlərdən biri olan Çağrı Mərkəzidir. Operativlik və vətəndaşların çevik məlumatlandırılması baxımından önəmli rol oynayan Çağrı mərkəzlərinin də son illərdə fəaliyyət dairəsi kifayət qədər genişlənib. Əvvəllər, sadəcə 1 xətt - 146-1 fəaliyyət göstərir, bütün müraciətlər bura daxil olurdu, hazırda 9 istiqamət üzrə Çağrı mərkəzi fəaliyyət göstərir. Artıq nəinki nazirliyin tabe qurumlarının,  hətta regional təhsil idarələrində də Çağrı mərkəzləri yaradılıb.Operatorlardan biri, Aidə Əsədullayeva “146” yığanlara 1 ildir cavab verir. Operator olduğu müddətdə onunla əsəbi danışanlar da olub, “sizinlə fəxr edirik” deyənlər də. Xoş söz deyənlər onu nə qədər qürurlandırsa da, əsəbi danışanlara isə xüsusi yanaşaraq müraciətləri cavablandırıb. Eyni zamanda: “Stressin idarə edilməsi üzrə xüsusi təlimlər keçirik. Onlarla mehriban danışır, problemlərinin həlli yollarını axtarırıq”.

Hazırda “146” Çağrı Mərkəzinə Nərmin Şəfizadə rəhbərlik edir. 146-6 komandasında 10 nəfərdirlər və vətəndaşların suallarına cavab verirlər.

Onlar qanunla müəyyən olunmuş iş günlərində səhər 9.00-dan axşam 18.00-dək fasiləsiz işləyirlər. Buna baxmayaraq, “146-6” Çağrı Mərkəzinə düşmək asan deyil”, - deyə qeyd edənlər hələ də tapılır. Yeri gəlmişkən, “Azərbaycan müəllimi” “146-6”-nı yoxladı və cəmi 1 dəqiqə içərisində “Nərmin buyurun” səsini eşitdi. Odur ki, tövsiyə edirik, Elm və Təhsil Nazirliyinin Çağrı Mərkəzindən istifadə edin, əmin olun ki, əməkdaşlar sizə mütləq cavab verəcək. 

Elektron müraciətlərə 3-5 iş günü cavab verilir

Vətəndaş məmnuniyyətinə nail olmaq üçün suallara vaxtında cavab tapmaq və müdaxilə etmək vacibdir. Ona görə də, Nazirlik vətəndaşlarla əlaqə kanallarını daim genişləndirir. Bu çevik və operativ kanallardan biri də elektron müraciətlərdir.

Elektron müraciətlər portal.edu.az saytının vətəndaş müraciətləri bölməsi vasitəsilə aparılır, tətbiq olunmuş təkmil daxili sistem hesabına daha qısa zaman çərçivəsində müraciətlər aidiyyəti struktur bölmələrə yönləndirilir və cavablandırılır.

Elektron müraciətlərin hərəkət trayektoriyası vətəndaşlar tərəfindən izlənilə bilir. Portal.edu.az platformasından vahid bazaya toplanan müraciətləri oxuduqdan sonra müvafiq sahələr üzrə mütəxəssislər onları cavablandırır. Rəhbər şəxslərin təsdiqindən sonra vətəndaşa SMS vasitəsilə bildiriş göndərilir və vətəndaş portal.edu.az platformasındakı şəxsi kabinetində “Mənim müraciətim” bölməsinə daxil olaraq həmin cavabı görə bilər. İnformasiya və vətəndaşlara xidmət şöbəsinin əməkdaşı Aysel Orucova deyir ki, təhlillər onu göstərir ki, son zamanlar vətəndaşlar yazılı müraciətlərdən çox elektron müraciətlərə üstünlük verirlər. “Elektron müraciətlər 3-5 iş günü ərzində cavablandırılmalı, vətəndaşa təqdim edilməlidir. Ona görə də vətəndaşlar müraciətlərinə cavabları daha tez alırlar.

“Sosial media və WhatsApp xidməti”

2021-ci ilin aprel ayından etibarən nazirliyin rəsmi “WhatsApp” xidməti yaradılıb. O vaxtdan başlayaraq peşəkar mütəxəssislər həm “WhatsApp”,  həm də sosial media platformaları vasitəsilə daxil olan müraciətləri dərhal cavablandırırlar.

Qeyd edək ki, Elm və Təhsil Nazirliyi rəsmi “WhatsApp” lisenziyalı biznes hesabı vasitəsilə vətəndaşların müraciətlərini cavablandıran ilk dövlət qurumudur.

Nazir nə vaxt qəbul edir?

Vətəndaşlar təhsilə dair müraciətlərini, təkliflərini həm yuxarıda qeyd olunan kommunikasiya kanallarından istifadə edərək, həm də birbaşa rəhbər şəxslərə ünvanlaya bilərlər. Belə ki, Elm və Təhsil Nazirliyinin bütün rəhbər vəzifəli şəxsləri, tabe qurumlarının rəhbərlərinin həftəlik və aylıq əsasda vətəndaş qəbulları təşkil olunur. Qəbula 146-6 çağrı mərkəzi vasitəsilə, “WhatsApp xidməti”və portal.edu.az platformasından yazılmaq mümkündür. Nazirin qəbulu ayda 1 dəfə bölgələr üzrə keçirilir.

Nazirliyə vətəndaş müraciəti var

Elm və Təhsil Nazirliyinə elektron müraciətlərlə yanaşı yazılı müraciətlər də daxil olur. İnformasiya və vətəndaşlara xidmət şöbəsinin əməkdaşı Təbriz Nəsibov “Azərbaycan müəllimi” qəzetinə yazılı müraciətlərin sistem daxilində keçdiyi yoldan danışıb: “Daxil olan məktublar qeydiyyata alınır, icraçılara yönləndirilir və elə yazılı olaraq da cavablandırılır”.  

Yazılı müraciətlərin elektron müraciətlərdən fərqli olaraq baxılma müddəti 15 iş günü təşkil edir: “Müraciətdən asılı olaraq, daha tez cavablandırılanlar da olur. Məlumat xarakterli müraciətlər araşdırma tələb edən məsələlərlə müqayisədə daha tez cavablandırılır”.

Onun məsləhəti də var: “Məsləhət görərdik ki, yazılı müraciətlərdə əlaqə vasitələrini, ünvanlarını və müraciətin məzmununu dəqiq qeyd etsinlər. Çox zaman yazılı müraciətlərdə ünvanın düzgün qeyd olunmaması, əlaqə vasitələrinin yazılmaması kimi hallarla rastlaşırıq”.

Bu ilin ilk  9 ayı ərzində nazirliyin ünvanına 18337 vətəndaş müraciəti daxil olub.

Sara Mirzəyeva İnformasiya və vətəndaşlara xidmət şöbəsinin Dəftərxana sektorunun əməkdaşıdır. Vətəndaş müraciətlərini, elektron sənəd dövriyyəsi ilə daxil olan məlumatları təhlil edir: “Daxil olan məlumatların mütəmadi olaraq analitik təhlilini aparırıq. Bura həm vətəndaşlardan daxil olan müraciətlər, həm də digər qurum və təşkilatlardan daxil olan müraciətlərin təhlili daxildir. Vaxtaşırı hesabatlar aparılır, nazirliyə daxil olan sənədlərin dövriyyəsi təşkil olunur, elektron sənəd dövriyyə sisteminin təkmilləşdirilməsi həyata keçirilir. Əldə olunan məlumatların təhlili növbəti qərarvermə prosesində önəmli rol oynayır, sistemlərin təşkil olunmasına və təkmilləşdirilməsinə səbəb olur. Bu nəticələrə əsaslanaraq deyə bilərəm ki, gördüyüm iş faydalı və maraqlıdır”.

“ASAN”-laşan elm və təhsil xidmətləri

Elm və təhsil sahəsi ilə bağlı vətəndaşların istifadəsində olan daha 10 xidmət Elm və Təhsil Nazirliyi ilə Prezident yanında Vətəndaşlara Xidmət və Sosial İnnovasiyalar üzrə Dövlət Agentliyi (ASAN) arasında qarşılıqlı əməkdaşlığa dair Anlaşma Memorandumu çərçivəsində 2022-ci ilin aprel ayından başlayaraq “ASAN Xidmət” mərkəzlərində göstərilir. Bakıda və regionlarda olmaqla ümumilikdə 16 “ASAN Xidmət” Mərkəzində elm və təhsil xidmətləri həyata keçirilir və vətəndaşlara göstərilən xidmətin əlçatanlığının artırılması məqsədi daşıyır.

Əksər təhsil xidmətləri elektronlaşdırılaraq bir platformada təqdim olunur

Yazılı müraciətlərin olmasına baxmayaraq, müraciətçilər daha çox elektron üsullara üstünlük verir. Məsələn, 2022-ci ildə vətəndaşlardan 27461 yazılı, 32138 elektron müraciət daxil olub və cavablandırılıb. 2023-cü ilin ilk 9 ayı ərzində 18337 yazılı, 30716 elektron, Çağrı mərkəzləri vasitəsilə 300 mindən çox, vətəndaş qəbulu və “ASAN Xidmət” mərkəzlərində 30000-dən çox, “Sosial Media - WhatsApp” Xidməti vasitəsilə 105000-dən çox vətəndaş müraciətləri cavablandırılıb.

Rəqəmlərdən göründüyü kimi, Elm və Təhsil Nazirliyi də operativliyi, şəffaflığı təmin etmək üçün elektron xidmətlərdən aktiv istifadə edir.Nazirliyin İnformasiya və vətəndaşlara xidmət şöbəsinin əməkdaşı Həmid Qasımov  elektron xidmətlərə əhəmiyyət verdiklərini təsdiqləyir. Onun sözlərinə görə, “hazırda vətəndaşlara təqdim olunan əksər xidmətlər elektronlaşdırılaraq portal.edu.az  platformasında birləşib. Həmin xidmətlərə “Ali və orta ixtisas təhsili müəssisələrinə təhsilalan qeydiyyatı”, “Əlavə təhsilə elektron sənəd qəbulu”, “Peşə təhsil müəssisələrinə işə qəbul”, “Arayış əldə etmək üçün müraciət” və s daxildir. Beləliklə, vətəndaşlar onlayn formatda portal.edu.az plaftomasına bir mənbədən daxil olaraq xidmətlərdən istifadə edə bilərlər”.

Vətəndaşa xidmət edən komanda davamlı təlimləndirilir

Nazirlikdə vətəndaşlarla kommunikasiya vasitələri uğurla qurulduğu kimi, komandanın hazırlığına da xüsusi əhəmiyyət verilir. İnformasiya və vətəndaşlara xidmət şöbəsinin əməkdaşı Altun Rəcəblinin sözlərinə görə, əməkdaşların təcrübə və bilikləri ilə yanaşı, onların psixoloji hazırlıqları, kommunikasiya və problem həlletmə bacarıqları, yüksək etik standartlara yiyələnmələri də önəmli faktorlardır: “Bütün bu göstəriciləri ölçmək üçün tərtib edilən meyarlar var. Buraya dinləmə bacarığı, empatiya, müzakirə və problemi həlletmə bacarığı, effektiv həll təklifləri kimi keyfiyyətlər aiddir: “Əməkdaşlarımızın həmin meyarlara cavab verməsini təmin etmək məqsədilə vaxtaşırı “Vətəndaş qəbulunun əsasları”, “Vətəndaş məmnunluğunun idarə olunması” mövzularında təlimlər təşkil edirik. Bu təlimlərdə Elm və Təhsil Nazirliyinin və regional təhsil idarələrinin əməkdaşları ilə yanaşı, məktəb direktorları, direktor müavinləri, ali təhsil müəssisələrinin əməkdaşları da iştirak edirlər”.

A.Rəcəbli məlumat verib ki, Elm və Təhsil Nazirliyinin təşəbbüsü ilə “ASAN” İnnovativ İnkişaf Mərkəzində son 1 il ərzində, ümumilikdə 1500-dən çox təhsil işçisinə, məktəb direktorları, direktor müavinləri, məktəbəqədər təhsil müəssisələrinin müdirləri, regional təhsil idarələrinin əməkdaşlarına maarifləndirici təlimlər keçilib.

Keyfiyyəti daha da artırmaq hədəfdir

Şöbə əməkdaşlarını, sadəcə təlimləndirməklə kifayətlənmir, həm də göstərdiyi xidmətə nəzarət edir. İnformasiya və vətəndaşlara xidmət şöbəsinin müdir müavini Səbuhi Rzayev müraciətlərin hansı kommunikasiya kanalından daxil olduğundan asılı olmayaraq, hər bir müraciətə eyni həssaslıqla yanaşıldığını vurğulayıb: “Daxil olan müraciətlərin izlənilməsi və maneəsiz informasiya axınının təmin edilməsi üçün qabaqcıl proqram təminatından istifadə edirik. Həmin sistem vasitəsilə müraciətlər yönləndirilir, proses müəyyən ardıcıllığa uyğun olaraq aparılır. Təmin edilən informasiyanın dəqiqliyindən və etibarlılığından əmin olmaq üçün müntəzəm olaraq yoxlanılır. Müraciətlərin cavablandırılmasında keyfiyyəti artırmaq üçün monitorinq prosesi davam edəcək”.

S.Rzayevin fikrincə, hər  müraciət həm də yenilik və inkişaf üçün bir fürsətdir: “Vətəndaşların özlərini prosesin fəal iştirakçısı kimi görməsini təmin etməyə çalışırıq. Bu baxımdan sosial şəbəkələri misal çəkə bilərik. Həmin platformalar vasitəsilə hər bir vətəndaş öz təklif və iradlarını bildirir və onların şərhləri hər kəsə açıq şəkildə görünür. Vaxtaşırı məmnuniyyət sorğuları keçirilir, nəticələrə əsasən təkmilləşdirilmə işləri aparılır. Bütün kanallar üzrə daxil olan vətəndaş müraciətlərinin həftəlik, aylıq, rüblük və illik əsasda statistik təhlilləri aparılır. Bu təhlillər eyni zamanda mövzular, istiqamətlər, regionlar üzrə həyata keçirilir və rəhbərliyə təqdim olunur. Beləliklə, nəticələr əsasında müvafiq tapşırıqlar verilir”.

Vətəndaş qəbulunda yeniliklər

Nazirlik vətəndaş məmnuniyyətinin artırılması istiqamətində bir sıra yeniliklər planlaşdırır. İnformasiya və vətəndaşlara xidmət şöbəsinin müdiri Rəşad Xanlarovun sözlərinə görə, ilk növbədə, yeni yaradılan Məktəbəqədər və Ümumi Təhsil üzrə Dövlət Agentliyinin və Elm və Ali Təhsil üzrə Dövlət Agentliyinin Vətəndaşlara Xidmət mərkəzləri, Çağrı mərkəzləri yaradılacaq: “Elm və təhsilə dair bütün xidmətləri agentliklərdə də təşkil olunacaq. Elm və Təhsil Nazirliyindən verilən müxtəlif təhsil arayışların elektronlaşdırılması prosesi davam etdiriləcək.. Bu həm vətəndaşın  rahatlığı, həm də sənədlərin operativ təmin olunması baxımından çox faydalıdır”.

Nazirliyin tabe qurumlarında və regionlarda vətəndaşlara xidmət keyfiyyətini artırmaq məqsədilə monitorinq prosesi gücləndiriləcək: “Həmçinin, “ASAN Xidmət” mərkəzləri ilə əməkdaşlığımızı daha da genişləndirəcəyik. Çağrı mərkəzləri şəbəkəsinin genişlənməsi prosesi çərçivəsində olmayan regional təhsil idarələrində  mərkəzlər yaradılacaq. Bununla yanaşı, vətəndaşların xidmətlər barədə rəylərini, təklif və şikayətlərini daha operativ şəkildə bildirmələri üçün istifadə etdiyimiz üsulları daha da təkmilləşdirəcək, xidmət keyfiyyətini artıracağıq.

Müraciətiniz uğurla, operativ cavablansın deyə...

Sualların vaxtında cavablanması üçün vətəndaşların da diqqət etməli olduğu məqamlar var. Məsələn, nazirliyin göstərdiyi hər  xidmətlə bağlı edu.gov.az rəsmi saytında xidmətlər səhifəsi, sual-cavab, təqvim və əlaqə bölməsi mövcuddur. Həmin bölmələrlə tanış olmaqla sizi düşündürən məqamlara aydınlıq gətirə bilər, təhsil sistemində qarşılaşacağınız çətinliyin həllinə cavab tapa bilərsiniz.

Elektron müraciət edərkən məzmunun dəqiq qeyd edilməsi,  müraciətlərinin cavablandırılmasını sürətləndirir.

Və unutmayın. Yaşadığınız regionda da sizə xidmət edən regional təhsil idarələri və “ASAN Xidmət” Mərkəzləri  var.

Ruhiyyə DAŞSALAHLI