Bakıda keçirilən 74-cü Beynəlxalq Astronavtika Konqresində iştirak etmək məqsədilə ölkəmizdə səfərdə olan mexanika və aerokosmik mühəndislik sahəsində tanınmış azərbaycanlı alim, İstanbul Ticarət Universitetinin professoru Abdulla Sofiyev (Avey) Bakı Mühəndislik Universitetinin (BMU) müəllim-tələbə heyəti ilə görüşüb.

Qonağı təqdim edən BMU-nun rektoru Yaqub Piriyev professor Abdulla Sofiyevlə uzun illərə söykənən elmi əməkdaşlıq və dostluq münasibətlərindən bəhs edib. Rektor Azərbaycan elminin dünyada tanıdılmasında böyük əməyi olan alimin Stenford Universitetinin apardığı araşdırma nəticəsində dünyanın ən nüfuzlu alimləri siyahısına daxil edildiyini, eyni zamanda Research.com akademik platformasının tərtib etdiyi Ən Yaxşı Alimlər reytinq siyahısında yer aldığını bildirib. A.Sofiyevin 300-dən artıq fundamental elmi məqaləsinin nüfuzlu jurnallarında işıq üzü gördüyünü, “Scopus”, “Web of science” kimi platformalarda yer alan məqalə və nəşr sayının 150-dən çox, elmi məhsuldarlığın elmmetrik göstəricisi olan H-İndeksinin 43 olduğunu deyən Y.Piriyev professorun elm sahəsinə verdiyi digər töhfə və nailiyyətləri nəzərə çatdırıb.

Sonra A.Sofiyev onu böyük elmə aparan yolun başlanğıcı ilə bağlı məlumatları tədbir iştirakçıları ilə bölüşüb. Elmi fəaliyyətinin ən məhsuldar dövrünün məhz 2002-2014-cü illərə təsadüf etdiyini deyən alim bu dövrdə dünyanın ən nüfuzlu jurnallarında elmi məqalələrinin cap olunduğunu, elmi araşdırmalarının nəticələrinə görə çoxsaylı mükafatlara layiq görüldüyünü və s. qeyd edib. Hazırkı fəaliyyətindən də söz açan professor fundamental araşdırmaları davam etdirdiyini, Dördüncü Sənaye İnqilabının yaratdığı imkanlar çərçivəsində bu araşdırmaların rolu, eyni zamanda sözügedən texnoloji inqilabın qlobal iqtisadiyyata təsiri ilə bağlı fikirlərini paylaşıb.

Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 44 günlük Vətən müharibəsində əldə etdiyi Şanlı Zəfərə də toxunan soydaşımız məhz bu dövrdə fəaliyyətini müvəqqəti dayandıraraq, alim kimi mövqeyini ortaya qoyduğunu, yerli və xarici mətbuatda məqalələrlə çıxış etdiyini bildirib.

Daha sonra “Funksional dərəcəli materiallar” (FGM) mövzusunda məruzə ilə çıxış edən A.Sofiyev FGM-nin mexaniki termal davranışlarında tədqiqatlar, yeni nanokompozitlərin əldə olunması ilə bağlı nəticələr və s. haqda geniş məlumat verib.

Alim çıxışını bugünkü mövqedə qərarlaşmasında böyük xidmətləri olmuş valideyn və müəllimlərini minnətdarlıqla xatırlamaqla bitirib.  

Qonağa maraqlı təqdimat və zəngin elmi araşdırmalara söykənən məruzə üçün kollektiv adından təşəkkür edən Y.Piriyev ölkəmizdə elm sahəsinə, bu sahədə çalışanlara verilən böyük dəyərdən danışıb. Eyni zamanda, rektor BMU-da elmi-tədqiqat fəaliyyətinin daha da gücləndirilməsinə yönələn hədəflər və tədbirləri diqqətə çatdırıb.