Azərbaycan Memarlıq və İnşaat Universitetində (AzMİU) yaz semestrinin imtahan sessiyasına start verilib.

Rektor professor Gülçöhrə Məmmədova imtahan prosesinin gedişini izləyib və tələbələrlə söhbət aparıb.

AzMİU-da imtahan sessiyası təsdiq olunmuş imtahan cədvəlinə uyğun olaraq yazılı, test üsulu, qabiliyyət tələb edən fənlər üzrə isə ənənəvi qaydada fakültələrdə keçirilir. Ümumilikdə imtahanda 8000-dən çox tələbə iştirak edir.

2022-2023-cü tədris ilinin yaz semestrinin imtahan sessiyasında tələbələrin biliyinin qiymətəndirilməsində şəffaflığın və obyektivliyin təmin edilməsi məqsədi ilə AzMİU-nun rektoru G.Məmmədova tərəfindən “İmtahan sessiyasının təşkili və keçirilməsi” barədə əmr imzalanıb. Əmrə əsasən, yazılı imtahan işlərinin şifrələnməsi, işlərin qiymətləndirilməsi üçün ekspertlərə təqdim olunması, yoxlama prosesinə nəzarət, şifrələrin açılması, universitetin elektron səhifəsinə daxil edilməsi işləri üzrə universitetin müəllim və əməkdaşlarından ibarət işçi qrup formalaşdırılıb.

Sessiyanın gedişi zamanı imtahanların nəticəsindən yarana biləcək narazılıqların, neqativ halların mövcud qaydada araşdırılması və həll edilməsi məqsədi ilə AzMİU-nun rəhbər və məsul şəxslərindən, universitetdə fəaliyyət göstərən ictimai təşkilatların nümayəndələrindən ibarət İmtahan Qərargahı yaradılıb.

İmtahan sessiyası dövründə birbaşa rektorun sədrliyi ilə yaradılmış Apelyasiya Komissiyası da fəaliyyət göstərəcək. Burada imtahanların nəticələri barədə müraciətlərə baxılacaq və aşkar edilmiş çatışmazlıqlar aradan qaldırılacaq.

İmtahan sessiyası iyulun 5-dək davam edəcək.