Gəncə şəhərində keçirilən  Azərbaycan gənclərinin VIII forumunun ilk zona toplantısı çərçivəsində Gəncə Dövlət Filarmoniyasının foyesində ali məktəblərin tələbə-gənclər təşkilatlarının, QHT-lərin və gənclər birliklərinin fəaliyyətini əks etdirən sərgi nümayiş etdirilib.

Gənclər və İdman naziri Azad Rəhimov, Təhsil nazirinin müavini Firudin Qurbanov, Azərbaycan Tələbə-Gənclər Təşkilatları İttifaqının sədri, millət vəkili Şahin İsmayılov, millət vəkilləri Naqif Həmzəyev, Pərvin Kərimzadə və şəhər ziyalıları sərgi vasitəsi ilə gənclərin son ildə gördükləri işlər barədə ətraflı məlumat alıblar.

Azərbaycan Dövlət Aqrar Universiteti Tələbə gənclər təşkilatı üçün ayrılmış guşədə fəallar  tələbələrin,universitetdə tələbə gənclər təşkilatının uğurlarını əks etdirən fəxri fərmanlar, diplomlar, bukletlər, qonaqlara təqdim edilib. Nümayiş etdirilən uğurlu layihələr qonaqlarda xoş təəssürat yaradıb. Tədbirin rəsmi hissəsində Tələbə gənclər təşkilatının sədri Valeh Əsədov "Azərbaycan gəncliyinin vətənpərvərlik və vətəndaşlıq tərbiyəsi" mövzusunda çıxış edib.