Azərbaycan Dövlət İqtisad Universitetində (UNEC) “Oxu mədəniyyəti” layihəsi çərçivəsində Almaniyada yaşayan azərbaycanlı alim Rasim Sadiqin “Hay soyu ərmən cildində” adlı kitabının təqdimatı keçirilib.

Ümumi fənlərin tədrisinin təşkili departamentinin direktoru dosent Gülnarə Rzayevanın moderatorluğu ilə keçən tədbirdə Azərbaycan Milli Elmlər Akademiyasının tarixçi-alimləri və UNEC-in professor-müəllim heyəti iştirak edib.

UNEC rektoru professor Ədalət Muradov Azərbaycanın tarixi düşmənləri olan ermənilərin hay soyu tarixi barədə həqiqətlərinin dünyaya çatdırılmasında təqdim olunan kitabın mühüm rol oynayacağını bildirərək, müəllifi təbrik edib. Rektor UNEC-də fəaliyyət göstərən Ermənistan İqtisadiyyatının Araşdırma mərkəzində hər iki ölkənin iqtisadiyyatı ilə bağlı tədqiqatların aparıldığını, həmçinin Ermənistanın iqtisadi durumu ilə bağlı erməni dilində olan mənbələrdən daha dolğun məlumat əldə etmək məqsədilə universitetdə 2 dəfə erməni dili kurslarının təşkil olunduğunu diqqətə çatdırıb. Qarabağın işğaldan azad olunmasından sonra belə tədqiqatlara böyük ehtiyacın yarandığını deyən rektor, UNEC alimlərinin Qarabağın iqtisadiyyatı, tarixi ilə bağlı tədqiqatlarını daha da genişləndirdiklərini qeyd edib.

Kitabın müəllifi dosent Rasim Sadiq bildirib ki, Prezident İlham Əliyev Xocavənd rayon ictimaiyyətinin nümayəndələri ilə görüşdə hay-erməni və Hayastan-Ermənistan paralellərinin öyrənilməsinin Azərbaycan tarixçilərinin vəzifəsi olduğunu söyləyib. Müəllif bu gün həmin vəzifəni yerinə yetirdiyi üçün qürur duyduğunu bildirərək, apardığı araşdırmanın 44 günlük müharibədə qazanılmış möhtəşəm qələbəmizin zəminində gündəmə gəldiyini və “Yalanlar tarixinin gerçək üzü” layihəsinin nəticələrindən yaranmış birinci kitab olduğunu deyib. Müəllif son üç yüz ildə dünya tarixşünaslığına təlqin edilən “beş min illik erməni tarixi” tədqiqinin, bu günkü ermənilərin əcdadı olan “hay” etnosunun yaranmasının, onların Anadoluya və Cənubi Qafqaza miqrasiyasının tarixi, səbəbləri, səbəbkarları və nəticələrinin kitabda öz əksini tapdığını qeyd edib.

Tədbirdə çıxış edənlər kitabın müasir dövrümüz üçün çox faydalı olduğunu və dünyanın müxtəlif dillərinə tərcümə olunaraq, yayılmasının vacibliyini bildiriblər.

Tədbir iştirakçıları sonda Qarabağ kitablarından ibarət sərgi ilə tanış olublar.