Azərbaycan Texniki Universitetinin (AzTU) “TEKNOFEST Azərbaycan”da iştirak etmiş komandaları ilə görüş keçirilib. Görüşdə AzTU-nun rektoru Vilayət Vəliyev, universitetin əməkdaşları və tələbə-müəllim heyəti iştirak edib.

Rektor V.Vəliyev Türkiyənin ən böyük aviasiya, kosmos və texnologiya festivalı olan “TEKNOFEST”in Azərbaycanda keçirilməsinin önəmindən danışıb, festivalın başlamasından bir gün öncə Türkiyənin “Baykar” şirkətinin texnoloji lideri, TEKNOFEST”in İdarə Heyətinin və T3 Fondu Qəyyumlar Şurasının sədri Selcuk Bayraktarın AzTU-nun qonağı olmasını, ona universitetin Fəxri doktoru adının verilməsini xüsusi qeyd edib. Bildirib ki, müdafiə sənayesi üzrə dünyanın ən tanınmış mütəxəssislərindən olan Selcuk Bayraktarın AzTU-nun fəxri qonağı olması, tələbələrlə görüşü həm universitet, həm də ölkə üçün mühüm hadisə idi. Bu görüş, həmçinin universitetin gördüyü işlər, həyata keçirdiyi layihələrlə bağlı məsuliyyətini daha da artırıb.

“TEKNOFEST Azərbaycan”da  iştirak edən AzTU komandalarının uğurlarını qeyd edən rektor növbəti festivallarda universitetin komandalarının daha böyük nailiyyətlər qazanacağına ümidvar olduğunu bildirib. V.Vəliyev “TEKNOFEST Azərbaycan”da “Sosialyönümlü texnologiyalar” müsabiqəsinin B kateqoriyasında ikinci yerə layiq görülən AzTU-nun "TwoDice Sabah", “Robotexnika” müsabiqəsinin B kateqoriyasında üçüncü yeri tutan "Hi-Tech", həmçinin “Robotexnika” müsabiqəsinin A kateqoriyasında ikinci olan AzTU-nun mentorluq etdiyi şəhid ailələrinin övladlarından ibarət “Zəfər” komandasını təbrik edib.

Sonra AzTU-nun rəqəmsallaşma və layihələr üzrə prorektoru Rəşad Əliyev “TEKNOFEST Azərbaycan”la bağlı universitetin gördüyü işlər, komandaların festivala hazırlıq prosesi və digər məsələlər haqqında geniş təqdimatla çıxış edib.

Tədbirin sonunda AzTU-nun “TEKNOFEST Azərbaycan”da iştirak etmiş komandalarına sertifikat təqdim olunub.