Robot-müəllimlər haqqında danışmaq artıq adi hala çevrilib. Bəs robot-tələbələr barədə nə demək olar?.  “Teleiştirak sistemi”   universitetə gedə bilməyən tələbələrə robotlar şəklində məşğələlərə qatılmağa imkan verir. Teleiştirak robotu müvəqqəti olaraq evdə qalan tələbənin yerinə dərsə gedir. Bu cür qurğular ilk növbədə xəstəlik səbəbindən dərsə gedə bilməyən tələbələr üçün nəzərdə tutulub. Bu robotlar universitetlər üçün də məşğələlərin  onlayn yayımından fərqli olaraq daha asandır.  Siz sadəcə hər bir məşğələnin videokonfransını təşkil etmək zəruriliyindən xilas olursunuz, robotun köməyi ilə  tələbə  bütün həmyaşıdları ilə bərabər olaraq məşğələlərdə iştirak edə, sinifdə gəzişə, qrup yoldaşlarının üzünü görə,  bir auditoriyadan digərinə keçə bilər.

Kolorado Universitetində aparılmış eksperiment gedişində tədrisdə  virtual robotlardan istifadənin səmərəliliyi yoxlanılıb. Semestr ərzində fiziki cəhətdən məşğələlərə  gedə bilməyən 11 tələbə Kubi robotunun köməyi ilə oxuyub.

Sınaqlar göstərib ki, “teleiştirak”  o qədər də böyük olmayan  auditoriyalarda  kiçik dinləyici qruplarına keçilən dərslərdə çox səmərəlidir.  Kubi vasitəsilə kursları keçmiş tələbələrin nəticələri əyani təhsil alan tələbələrin nəticələrindən o qədər də fərqlənməyib. Universitetin nümayəndəsi bildirib ki, Kubi sistemi istifadədə çox sadədir  və onu tədris  prosesinə tətbiq etmək asandır. Həmçinin, robot müəllimlərin işinə minimal təsir göstərir,  onlara dərsin gedişini yenidən qurmaq lazım deyil.

Oruc MUSTAFAYEV